Google Photos స్మార్ట్‌ఫోన్ వినియోగదారులకు గూగుల్ ఫొటోస్ (Google Photos) ఎంతో ఉపయోగకరమైన యాప్. ఫొటోలు, వీడియోలను భద్రపరచుకోవడంతో పాటు అవసరమైనప్పుడు వాటిని వెతుక్కోవడానికి ఈ యాప్ సహాయపడుతుంది. అయితే గూగుల్ ఫొటోస్ వినియోగదారుల కోసం త్వరలో రెండు కీలక మార్పులు తీసుకురాబోతోంది. ఒకవైపు డిలీట్ చేసిన ఫొటోలు, వీడియోలను రీస్టోర్ చేసుకునే గడువును తగ్గించాలని నిర్ణయించగా.. మరోవైపు ఫొటోల్లో ఉన్న ఈవెంట్ వివరాలతో నేరుగా గూగుల్ క్యాలెండర్‌లో ఈవెంట్స్ క్రియేట్ చేసుకునే కొత్త ఫీచర్‌ను అభివృద్ధి చేస్తోంది.
డిలీట్ చేసిన ఫొటోలకు ఇక 30 రోజులే గడువు!
గూగుల్ ప్రకటించిన వివరాల ప్రకారం.. 2026 డిసెంబర్ 5 నుంచి గూగుల్ ఫొటోస్‌లో కొత్తగా డిలీట్ చేసే ఫొటోలు, వీడియోల బిన్ రిటెన్షన్ పీరియడ్ 60 రోజుల నుంచి 30 రోజులకు తగ్గనుంది. ప్రస్తుతం యూజర్లు ఏదైనా ఫొటో లేదా వీడియోను పొరపాటున డిలీట్ చేస్తే.. బిన్‌లోకి వెళ్లి 60 రోజుల వరకు తిరిగి రికవరీ చేసుకునే అవకాశం ఉంది. అయితే కొత్త నిబంధన అమల్లోకి వచ్చిన తర్వాత ఈ గడువు సగానికి తగ్గిపోనుంది.
డిసెంబర్ 5, 2026 నుంచి బిన్‌లోకి వెళ్లే కొత్త ఫొటోలు, వీడియోలకు మాత్రమే ఈ నిబంధన వర్తిస్తుంది. అంతకుముందే బిన్‌లో ఉన్న ఫొటోలు, వీడియోల విషయంలో పాత 60 రోజుల గడువే కొనసాగుతుంది. నిర్ణీత 30 రోజుల గడువు పూర్తయిన తర్వాత ఆ ఫొటోలు, వీడియోలు శాశ్వతంగా తొలగిపోతాయి. వాటిని మళ్లీ రికవరీ చేసుకునే అవకాశం ఉండదు.
అందువల్ల పొరపాటున ముఖ్యమైన ఫొటోలు డిలీట్ చేసిన వారు వెంటనే బిన్‌ను చెక్ చేసుకుని రీస్టోర్ చేసుకోవడం మంచిది. ముఖ్యంగా కుటుంబ జ్ఞాపకాలు, ప్రయాణాలకు సంబంధించిన ఫొటోలు, ముఖ్యమైన డాక్యుమెంట్లను భద్రపరుచుకునే విషయంలో యూజర్లు మరింత జాగ్రత్తగా ఉండాలి.
పోస్టర్ చూస్తే చాలు.. క్యాలెండర్‌లో ఈవెంట్ క్రియేట్!
మరోవైపు గూగుల్ ఫొటోస్‌లో త్వరలో అందుబాటులోకి రానున్న మరో ఫీచర్ టెక్నాలజీ ప్రియులను ఆకట్టుకునేలా ఉంది. సాధారణంగా ఏదైనా కార్యక్రమానికి సంబంధించిన పోస్టర్, ప్రకటన లేదా ఆహ్వాన పత్రిక కనిపిస్తే అందులోని తేదీ, సమయం, ప్రదేశం వంటి వివరాలను మనమే క్యాలెండర్‌లో నమోదు చేసుకోవాలి. అయితే కొత్త ఫీచర్ అందుబాటులోకి వస్తే ఈ పని ఆటోమేటిక్‌గా పూర్తవుతుంది.
Android Authority నివేదిక ప్రకారం.. Google Photos వెర్షన్ 8.0 APK కోడ్ పరిశీలనలో ‘Add to Calendar’ అనే కొత్త ఆప్షన్‌కు సంబంధించిన వివరాలు బయటపడ్డాయి. గూగుల్ తన Ask Photos ఫీచర్ సాయంతో ఫొటోల్లోని సమాచారాన్ని గుర్తించి క్యాలెండర్ ఈవెంట్‌గా మార్చే సదుపాయాన్ని తీసుకురానున్నట్లు తెలుస్తోంది.
ఉదాహరణకు ఏదైనా సంగీత కార్యక్రమం, సినిమా ఈవెంట్, సమావేశం లేదా ఇతర కార్యక్రమానికి సంబంధించిన పోస్టర్‌ను గూగుల్ ఫొటోస్‌లో ఓపెన్ చేస్తే.. అందులోని ఈవెంట్ పేరు, తేదీ, సమయం, వివరణ వంటి వివరాలను Ask Photos గుర్తిస్తుంది. అనంతరం ‘Add to Calendar’ ఆప్షన్ ద్వారా ఆ వివరాలతో నేరుగా క్యాలెండర్‌లో ఈవెంట్‌ను క్రియేట్ చేసుకోవచ్చు.
ఒరిజినల్ పోస్టర్ లింక్ కూడా!
ఈ ఫీచర్‌లో మరో ఆసక్తికరమైన అంశం కూడా ఉంది. ఆటోమేటిక్‌గా క్రియేట్ అయ్యే క్యాలెండర్ ఈవెంట్‌లో అసలు పోస్టర్‌కు సంబంధించిన లింక్ కూడా ఉంటుందని సమాచారం. దీనివల్ల క్యాలెండర్‌లో ఈవెంట్‌ను చూసినప్పుడు తిరిగి ఒరిజినల్ పోస్టర్‌ను ఓపెన్ చేసి వివరాలను పరిశీలించుకోవచ్చు.
అయితే ఈ సదుపాయాన్ని ఉపయోగించుకోవడానికి యూజర్లు గూగుల్ క్యాలెండర్ యాక్సెస్‌కు అనుమతి ఇవ్వాల్సి ఉంటుంది. మొదటిసారి సెటప్ చేసేటప్పుడు అనుమతి నిరాకరిస్తే.. తర్వాత దాన్ని ఎనేబుల్ చేసుకోవాలని యాప్ నోటిఫికేషన్ ద్వారా సూచించే అవకాశం ఉంది.
టైమ్ జోన్ విషయంలో సమస్యలు?
ఈ ఫీచర్‌పై పరీక్షలు నిర్వహించిన సమయంలో కొన్ని సమస్యలు కూడా బయటపడినట్లు నివేదిక పేర్కొంది. ముఖ్యంగా పోస్టర్‌లో టైమ్ జోన్ వివరాలు లేకపోయినప్పటికీ Ask Photos అమెరికా టైమ్ జోన్‌ను ఉపయోగించినట్లు సమాచారం. దీంతో క్యాలెండర్‌లో ఈవెంట్ తేదీ, సమయం తప్పుగా నమోదయ్యే అవకాశం ఉంది. ఈ సమస్యను గూగుల్ పరిష్కరించాల్సి ఉంటుంది.
ప్రస్తుతం ‘Add to Calendar’ ఫీచర్ అభివృద్ధి దశలోనే ఉంది. దీనిపై గూగుల్ అధికారికంగా ఎలాంటి ప్రకటన చేయలేదు. ఎప్పుడు అందుబాటులోకి వస్తుందనే విషయంపై కూడా స్పష్టత లేదు.
గూగుల్ ఫొటోస్ తీసుకురాబోతున్న ఈ రెండు మార్పులు యూజర్లకు కీలకమైనవే. ఒకవైపు డిలీట్ చేసిన ఫొటోలను తిరిగి పొందేందుకు సమయం తగ్గుతుండగా.. మరోవైపు ఫొటోల నుంచే క్యాలెండర్ ఈవెంట్స్ క్రియేట్ చేసుకునే స్మార్ట్ ఫీచర్ అందుబాటులోకి రానుంది. ముఖ్యంగా రోజువారీ కార్యక్రమాలు, సమావేశాలు, ఈవెంట్లను మిస్ కాకుండా చూసుకోవాలనుకునే వారికి ఈ కొత్త ఫీచర్ ఉపయోగకరంగా మారనుంది.
