Minister Pawan Kalyan: డిప్యూటీ సీఎం పోస్టుల విషయంలో ఆనవాయితీకి చంద్రబాబు బ్రేక్ ఇచ్చారు. పవన్ కళ్యాణ్ ఒక్కరికే డిప్యూటీ సీఎం హోదా కట్టబెట్టారు. పంచాయితీ రాజ్, గ్రామీణాభివృద్ధి శాఖ తో పాటు డిప్యూటీ సీఎం హోదాను పవన్ దక్కించుకున్నారు. ఏపీలో కూటమి ప్రభుత్వం అధికారంలోకి రావడానికి పవన్ కీలక పాత్ర పోషించారు. పొత్తులో భాగంగా జనసేనకు 21 అసెంబ్లీ, రెండు పార్లమెంట్ స్థానాలను కేటాయించారు. శత శాతం స్ట్రైక్ రేటుతో జనసేన అన్నిచోట్ల విజయం సాధించింది. ఏకంగా కూటమి 166 స్థానాల్లో గెలుపొందింది. దీంతో జనసేన అధినేత పవన్ కు ఎనలేని ప్రాధాన్యం దక్కింది. అందుకే చంద్రబాబు పవన్ కు డిప్యూటీ సీఎం హోదా ఇచ్చేందుకు డిసైడ్ అయ్యారు. గతం మాదిరిగా ఇద్దరికీ కాకుండా.. పవన్ ఒక్కరికి గౌరవం దక్కేలా డిప్యూటీ సీఎం పదవిని ప్రకటించడం విశేషం
ఉమ్మడి ఏపీలో కాంగ్రెస్ పార్టీ అధికారంలోకి వచ్చిన ప్రతిసారి.. డిప్యూటీ సీఎం హోదాను ప్రకటించడం ఆనవాయితీగా వచ్చింది. 2014లో నవ్యాంధ్రప్రదేశ్ కు తొలి సీఎంగా చంద్రబాబు బాధ్యతలు చేపట్టారు. ఆ సమయంలో ఇద్దరు మంత్రులకు డిప్యూటీ సీఎం హోదా కట్టబెట్టారు. 2019లో అధికారంలోకి వచ్చిన జగన్ ఏకంగా ఐదుగురు మంత్రులకు డిప్యూటీ సీఎం హోదాను ప్రకటించారు. అయితే ఈసారి ఆ ఆనవాయితీకి బ్రేక్ ఇచ్చారు చంద్రబాబు. పవన్ కు ప్రత్యేక గౌరవం ఇచ్చేందుకుగాను.. ఆయన ఒక్కరికే డిప్యూటీ సీఎం పదవి ప్రకటించారు.
తొలుత పవన్ కళ్యాణ్ కు హోంమంత్రి పదవి ఇస్తారని ప్రచారం జరిగింది. అన్ని శాఖలకు మాతృకగా హోం శాఖను పిలుస్తారు. సీఎం తర్వాత అంతటి అధికారం కూడా ఆ శాఖకే ఉంటుంది. అన్ని శాఖలపై అజమాయిషీ ఉంటుంది. అందుకే అంతటి కీలకమైన మంత్రి పదవిని పవన్ కళ్యాణ్ కు అప్పగిస్తే సముచితంగా ఉంటుందన్న విశ్లేషణలు వచ్చాయి. అటు జన సైనికులు సైతం పవన్ కళ్యాణ్ ను హోంమంత్రి పదవిలో చూడాలని అనుకున్నారు. అయితే పవన్ కళ్యాణ్ మాత్రం గ్రామీణ నేపథ్యం ఉన్న మంత్రిత్వ శాఖలను కావాలని కోరినట్లు తెలుస్తోంది. ఈ తరుణంలోనే పవన్ కళ్యాణ్ కు గ్రామీణాభివృద్ధి, పంచాయతీరాజ్ శాఖ, పర్యావరణ, అటవీ శాఖలను చంద్రబాబు కేటాయించారు. పవన్ కోరిన విధంగానే శాఖలు దక్కడంతో పాటు.. ఏకైక డిప్యూటీ సీఎం పోస్టు పొందడంతో జనసైనికులు సంబరాలు చేసుకుంటున్నారు.
