YS Jagan Mohan Reddy: ఇటీవల కాలంలో జగన్ మీడియా ముందుకు తరచుగా వస్తున్నారు. గంటల తరబడి మాట్లాడుతున్నారు. నేతలతో కూడా చర్చలు సాగిస్తున్నారు. చివరికి కమ్యూనిస్టు నాయకులను కూడా వదిలిపెట్టడం లేదు. వాస్తవానికి ఇటీవల సాక్షిలో కమ్యూనిస్టు పార్టీల నాయకులకు ప్రయారిటీ దక్కినప్పుడే అందరికీ అర్థమైంది.. ఏదో జరుగుతోంది అని..
వాస్తవానికి సింహం సింగిల్ గా వస్తుంది.. మా జగనన్న కూడా సింగిల్గానే పోటీ చేస్తారని పదేపదే వైసిపి నాయకులు ఎలివేషన్లు ఇచ్చుకునేవారు. కానీ కమ్యూనిస్టు నాయకులతో జగన్ మాట్లాడింది కేవలం ప్రజా సమస్యల మీద కాదు.. స్థానిక ఎన్నికల్లో పొత్తులు కుదుర్చుకోవడానికి.. జగన్ వ్యవహార శైలి తెలిసిన వారు ఎవరు ఆయనతో పొత్తు పెట్టుకోవడానికి సిద్ధంగా ఉండరు. అందువల్లే ఏపీలో ఆయనకు ఏ పార్టీ కూడా సపోర్ట్ చేయదు. ఇక ఏపీలో కమ్యూనిస్టు పార్టీ నాయకులకు పెద్దగా ఓటు బ్యాంకు లేదు. ఇప్పుడు జరిగేవి స్థానిక ఎన్నికలు. ఈ ఎన్నికల్లో కూటమి పార్టీల ఓటు బ్యాంకు చెక్కు చెదిరిపోదు. అలాంటప్పుడు కాస్తలో కాస్త గౌరవాన్ని కాపాడుకోవాలి. సీట్ల విషయం పక్కన పడితే కనీసం పోటీలో అయినా ఉండాలని వైసీపీ అధినేత జగన్ భావిస్తున్నారు.
ఎన్నడూ లేనివిధంగా కమ్యూనిస్టు నాయకులతో భేటీ అయ్యారు. ప్రజా సమస్యల మీద మాట్లాడారని.. కూటమి ప్రభుత్వం మీద ఒత్తిడి తీసుకురావడానికి ప్రయత్నాలు చేస్తున్నారని.. సాక్షిలో గొప్ప గొప్పగా కథనాలు వచ్చినప్పటికీ.. వాస్తవానికి అసలు విషయం వేరే ఉంది. 2024 లో దారుణమైన ఓటమి తర్వాత క్షేత్రస్థాయిలో వైసిపి పరిస్థితి గొప్పగా మారలేదు. కనీసం ఓటు బ్యాంకును పెంచుకోవడానికి ఆ పార్టీ నాయకులు ప్రయత్నించలేదు. పైగా ఒకరి మీద ఒకరు విమర్శలు చేసుకుంటున్నారు. ఇటీవల ఉత్తరాంధ్ర ప్రాంతంలో జరిగిన ఘటన ఒక బలమైన నిదర్శనం. ఇలా చెప్పుకుంటూ పోతే చాలా ఉన్నాయి. పార్టీలో ఉన్న సమస్యలను జగన్ గాలికి వదిలేసినట్టే కనిపిస్తోంది. నేతలతో మాట్లాడినట్టు వార్తలు వచ్చినప్పటికీ.. వాస్తవానికి వాటి ద్వారా పార్టీ లో సమస్యలు పరిష్కారం కావడం లేదు. పైగా నేతలు ఒకరి మీద ఒకరు అంతర్గతంగా విమర్శలు చేసుకుంటున్నారు. కొన్ని సందర్భాలలో బహిరంగంగా కూడా మాట్లాడుకుంటున్నారు.
ఇప్పుడు స్థానిక ఎన్నికలు జరుగుతున్న నేపథ్యంలో కమ్యూనిస్టు పార్టీ నాయకులతో పొత్తు పెట్టుకున్నంత మాత్రాన ఫ్యాన్ పార్టీ పరిస్థితి మారుతుందా.. కమ్యూనిస్టు నాయకులను ప్రజలు నమ్ముతారా. వారు చేసే ఉద్యమాలను ప్రజలు ఒప్పుకుంటారా.. అనేది తేలాల్సి ఉంది. స్థానిక ఎన్నికల్లో కమ్యూనిస్టు పార్టీలతో జగన్ పొద్దు కుదుర్చుకుంటే.. అప్పుడు వైసిపి కార్యకర్తల ముఖచిత్రం ఎలా ఉంటుందో చూడాలని టిడిపి నేతలు అంటున్నారు. అంతేకాదు సోషల్ మీడియాలో విమర్శలు.. ట్రోల్స్ చేస్తూ వైసీపీ కార్యకర్తలకు ఊపిరి సలపకుండా చేస్తున్నారు.
