YSRCP: అధికారంలో ఉన్నప్పుడు పిఆర్సి ఇచ్చింది లేదు. పైగా గవర్నమెంట్ టీచర్లకు వైన్ షాపుల దగ్గర డ్యూటీ వేశారు. హక్కుల కోసం రోడ్లమీదకి ఎక్కితే ఉద్యోగుల మీద కేసులు పెట్టారు. సాక్షాత్తు ప్రభుత్వ వైద్యుడు సుధాకర్ ను కరోనా సమయంలో ఏం చేశారో అందరికీ తెలుసు. డిఏలు అడిగినందుకు ఉద్యోగులను జైలు పాలు చేశారు.. ఇలా చెప్పుకుంటూ పోతే జగన్ పరిపాలన కాలంలో జరిగిన అద్భుతాల గురించి పుస్తకం కాదు ఏకంగా గ్రంథమే రాయచ్చు.
ఉద్యోగులకు కడుపు మండి.. జగన్ పరిపాలన తీరును చూసి తట్టుకోలేక కూటమి పరిపాలనకు జై కొట్టారు. చంద్రబాబు నాయకత్వాన్ని కోరుకున్నారు. చంద్రబాబు అధికారంలోకి రాగానే ఉద్యోగులకు ఉన్న బకాయిలను చెల్లిస్తున్నారు. డిఏలు చెల్లిస్తున్నారు. పిఆర్సి ఏర్పాటుకు కూడా అడుగులు వేస్తున్నారు. ఉద్యోగాల ప్రకటన చేస్తున్నారు. సాధ్యమైనంతవరకు ఉద్యోగులను కడుపులో పెట్టుకొని చూసుకుంటున్నారు.
ఇదంతా ఉద్యోగులు చూస్తూనే ఉన్నారు. వైసీపీకి అనుకూలంగా ఉన్న కొంతమంది ఉద్యోగ సంఘాల నాయకులు మాత్రమే ప్రభుత్వం మీద బురద చల్లడానికి ప్రయత్నిస్తున్నారు. కాకపోతే వారి ప్రయత్నాలు అంతగా ఫలించడం లేదు. ఈ సమయంలో ప్రభుత్వాన్ని ఇబ్బంది పెట్టేందుకు వైసిపి కుట్రకు శ్రీకారం చుట్టింది. దీనికోసం స్థానిక ఎన్నికలను పావుగా వాడుకుంది. కూటమి అధికారంలో ఉన్న ప్రస్తుత కాలంలో ఉద్యోగులకు ఎటువంటి ప్రయోజనాలు జరగడం లేదట. వాళ్లకు సకాలంలో జీతాలు కూడా రావడం లేదట. అందువల్లే స్థానిక ఎన్నికల్లో వైసీపీకి పోస్టల్ బ్యాలెట్ ద్వారా ఉద్యోగులు జై కొట్టారట. పైగా ఈ విషయాన్ని వైసిపి సోషల్ మీడియాలో గట్టిగా ప్రచారం చేసుకుంటున్నది. అంతేకాదు వచ్చే ఎన్నికల్లో కూటమికి దెబ్బ తప్పదని.. వైసిపికి ఉద్యోగులు జై కొడతారని ఆ పార్టీ నేతలు కలలు కంటున్నారు. సోషల్ మీడియాలో గొప్పగా ప్రచారం చేసుకుంటున్నారు..
వాస్తవానికి రాష్ట్రంలో ఏ ఒక్క జిల్లాలో కూడా కూటమికి మించి వైసిపికి పోస్టల్ ఓట్లు రాలేదు. ఈ ఫలితాలు చూసి లోకేష్.. పవన్ ఆశ్చర్యపోయారు. కూటమికిపడిన ఊహించని మెజారిటీ ఓట్లు ఇప్పుడు చర్చకు దారితీస్తున్నాయి. అయితే కొన్నిచోట్ల కొంతమంది ఉద్యోగులు వైసిపికి ఓట్లు వేశారు. అయితే ఇక్కడ ప్రభుత్వ ఉద్యోగులైనా సరే వాళ్లకు వ్యక్తిగత ఆసక్తులు ఉంటాయి. ప్రజాస్వామ్యంలో వ్యక్తిగత అభిప్రాయాల కంటే మెజారిటీ మాత్రమే తుది ఫలితాన్ని ఇస్తుంది. ఉద్యోగుల్లో అత్యధిక శాతం కూటమి వైపు నిలబడ్డారు అనేది ఈ ఫలితాలు స్పష్టం చేస్తున్నాయి.
వైసీపీ నాయకులు రకరకాలుగా ప్రయత్నాలు చేసినప్పటికీ.. విష ప్రచారం కొనసాగినప్పటికీ ఉద్యోగులు ప్రభుత్వం వైపు ఉన్నారు. పోస్టల్ బ్యాలెట్ లెక్కల ద్వారా ఇది తెలుస్తోంది. జగన్ ముఖ్యమంత్రిగా ఉన్నప్పుడు ప్రభుత్వ విధానాలతో ఉద్యోగులు ఇబ్బంది పడ్డారు. రాష్ట్రంలో మార్పు కోరుకున్నారు. కూటమికి జై కొట్టారు. అందువల్లే చంద్రబాబు తిరుగులేని మెజారిటీతో ప్రభుత్వాన్ని ఏర్పాటు చేశారు. అయితే ప్రభుత్వం చేస్తున్న మంచిని వేరే విధంగా మార్చడానికి.. మసి పూసి మారేడు కాయ చేయడానికి వైసిపి ఫేక్ ప్రచారం మొదలుపెట్టింది. పోస్టల్ బ్యాలెట్ ఓట్లు తమకే ఎక్కువగా వచ్చాయని ప్రచారం చేసుకుంది. కానీ వాస్తవం మాత్రం వేరే విధంగా ఉంది.
