BMW F 450 R : ప్రీమియం బైక్‌లకు ప్రపంచవ్యాప్తంగా గుర్తింపు పొందిన జర్మన్‌ మోటార్‌సైకిల్‌ తయారీ సంస్థ BMW Motorrad మరో కొత్త మోడల్‌ను ఆవిష్కరించింది. ఇప్పటికే అడ్వెంచర్‌ విభాగంలో F 450 GSతో ఆకట్టుకుంటున్న సంస్థ.. అదే ప్లాట్‌ఫామ్‌పై కొత్త స్ట్రీట్‌ నేకెడ్‌ బైక్‌ను తీసుకొచ్చింది. BMW F 450 R పేరుతో పరిచయం చేసిన ఈ మోటార్‌సైకిల్‌.. కంపెనీ రోడ్‌స్టర్‌ లైనప్‌లో ఎంట్రీ లెవల్‌ మోడల్‌గా నిలవనుంది. ప్రస్తుతం నిలిపివేసిన G 310 R స్థానాన్ని ఈ కొత్త బైక్ భర్తీ చేయనుంది.
F 450 GS ప్లాట్‌ఫామ్‌పై కొత్త బైక్
BMW F 450 Rలోని ఇంజిన్‌, చాసిస్‌, సస్పెన్షన్‌ వంటి కీలక అంశాలు F 450 GS నుంచి తీసుకున్నారు. అయితే అడ్వెంచర్‌ బైక్ తరహా డిజైన్‌కు బదులుగా స్పోర్టీ, అగ్రెసివ్‌ స్ట్రీట్ఫైటర్ లుక్‌ను అందించారు. ముఖ్యంగా BMW S 1000 R నుంచి స్ఫూర్తి పొందిన డిజైన్ అంశాలు ఈ బైక్‌లో కనిపిస్తాయి. రోడ్డుపై స్పోర్టీ రైడింగ్‌ను కోరుకునే యువతను దృష్టిలో పెట్టుకుని దీనిని రూపొందించినట్లు కంపెనీ వెల్లడించింది.
420cc ట్విన్ సిలిండర్‌ ఇంజిన్‌
BMW F 450 Rలో 420cc, లిక్విడ్‌-కూల్డ్‌ ప్యారలల్‌ ట్విన్ ఇంజిన్‌ను ఉపయోగించారు. ఈ ఇంజిన్‌ 48hp పవర్‌ను 8,750rpm వద్ద, 43Nm టార్క్‌ను 6,750rpm వద్ద ఉత్పత్తి చేస్తుంది. F 450 GSలోని ఇంజిన్‌ అవుట్‌పుట్‌తో ఇవి సమానంగా ఉన్నప్పటికీ.. రోడ్‌ రైడింగ్‌కు అనుగుణంగా ఇంజిన్‌ ట్యూనింగ్‌లో మార్పులు చేసినట్లు BMW తెలిపింది. ఇంజిన్‌కు 6-స్పీడ్‌ గేర్‌బాక్స్‌ను జత చేశారు. టాప్‌ వేరియంట్‌లో Innovation Package ద్వారా Easy Ride Clutch సదుపాయం అందుబాటులో ఉంటుంది.
స్పోర్టీ చాసిస్‌, Brembo బ్రేకులు
F 450 Rలో ట్యూబ్యులర్‌ స్టీల్‌ ఫ్రేమ్‌ను ఉపయోగించారు. ఇందులో ఇంజిన్‌ కూడా స్ట్రెస్డ్‌ మెంబర్‌గా పనిచేస్తుంది. ముందు భాగంలో 43mm KYB USD ఫోర్క్‌, వెనుక KYB మోనోషాక్‌ ఉన్నాయి. 17-అంగుళాల అల్లాయ్‌ వీల్స్‌కు Eurogrip Protorq Extreme టైర్లను అమర్చారు.
బ్రేకింగ్‌ కోసం ముందు భాగంలో 310mm డిస్క్‌తో Brembo నాలుగు-పిస్టన్‌ మోనోబ్లాక్‌ కాలిపర్‌, వెనుక 240mm డిస్క్‌ ఉన్నాయి. డ్యూయల్‌-ఛానల్‌ ABSను స్టాండర్డ్‌గా అందించారు.
175 కిలోల బరువు
BMW F 450 R మొత్తం బరువు 175 కిలోలు. ఇది F 450 GS కంటే 3 కిలోలు తక్కువ. స్టాండర్డ్‌ సీట్‌ హైట్‌ 790mmగా ఉంది. రైడర్ల అవసరాలకు అనుగుణంగా 775mm లో సీట్‌, 810mm హై సీట్‌ను యాక్సెసరీలుగా ఎంచుకోవచ్చు.
నాలుగు వేరియంట్లు.. 6.5 అంగుళాల TFT
BMW F 450 Rను ప్రపంచ మార్కెట్లలో నాలుగు వేరియంట్లలో అందించనుంది. అవి Base, Exclusive, M Sport, M Sport with Innovation Package. అన్ని వేరియంట్లలో 6.5-అంగుళాల TFT డిస్‌ప్లే, Bluetooth కనెక్టివిటీ, నావిగేషన్‌, మ్యూజిక్‌ కంట్రోల్‌, హీటెడ్‌ గ్రిప్స్‌ వంటి ఫీచర్లు స్టాండర్డ్‌గా లభిస్తాయి.
భారత్‌లో ఎప్పుడు?
BMW Motorrad ఇంకా F 450 R భారత మార్కెట్‌ ధరను, అధికారిక లాంచ్‌ తేదీని వెల్లడించలేదు. ప్రస్తుతం భారత్‌లో F 450 GS ప్రారంభ ధర రూ.4.95 లక్షలుగా ఉంది. F 450 R దాని కంటే తక్కువ ధరలో అందుబాటులోకి వచ్చే అవకాశం ఉంది. భారత మార్కెట్లో ఈ కొత్త నేకెడ్‌ బైక్ 2027లో విడుదలయ్యే అవకాశం ఉందని అంచనా. భారత్‌లోకి వస్తే G 310 R స్థానాన్ని భర్తీ చేస్తూ BMW రోడ్‌స్టర్‌ లైనప్‌లో కీలక మోడల్‌గా నిలిచే అవకాశం ఉంది.
