Trump Iran Tension: అగ్రరాజ్యం అమెరికా అధ్యక్షుడు డొనాల్డ్ ట్రంప్ ఇరాన్పై దాడికి భయపడ్డాడా.. గంటల వ్యవధిలోనే తన వైఖరిని ఒక్కసారిగా మార్చుకోవడం ఇందుకు బలం చేకూరుస్తోంది. రాత్రికి ఇరాన్పై తీవ్రమైన దాడులు చేస్తామని, వెనెజువెలా తరహాలో ఇరాన్ కథ ముగిస్తామని ప్రకటించాడు. దీంతో ప్రపంచ వ్యాప్తంగా ఆందోళనలు వ్యక్తమయ్యాయి. రాత్రి ఏం జరుగుతుందో అన్న టెన్షన్ నెలకొంది. కానీ రాత్రి కాగానే దాడులు ఆపేస్తున్నట్లు ప్రకటించాడు. దీంతో ప్రపంచ ఊపిరి పీల్చుకుంది. అయితే ట్రంప్ వైఖరిలో సడెన్ మార్పు ఇప్పుడు చర్చనీయాంశమైంది.
ఇరాన్కు బలమైన హెచ్చరిక..
ట్రంప్ ముందుగా ఇరాన్ను లక్ష్యంగా చేసుకుని కఠినమైన సందేశం పంపారు. ఈ రాత్రి బలమైన దాడులు చేస్తామని, ఖర్గ్ ద్వీపం సహా ఇతర ముఖ్యమైన ఆయిల్ కేంద్రాలను స్వాధీనం చేసుకుంటామని ప్రకటించారు. ఆ దేశ ఆయిల్, గ్యాస్ మార్కెట్లను వెనిజులా తరహాలో తమ నియంత్రణలోకి తెచ్చుకుంటామని చెప్పారు. ఇరాన్ రక్షణ వ్యవస్థ ఇప్పటికే బలహీనపడిందని అభిప్రాయపడ్డారు.
దాడులు ఆపేస్తున్నట్లు ప్రకటన..
గంటల తర్వాతే ట్రంప్ తన నిర్ణయాన్ని మార్చుకున్నారు. ఇరాన్ అగ్రనాయకత్వంతో చర్చలు ఉన్నత స్థాయిలో ముందుకు సాగుతున్నాయని, ఒప్పందానికి సంబంధించిన ముఖ్య అంశాలపై తుది ఒప్పందం దాదాపు పూర్తయిందని తెలిపారు. ఈ అంశాలను పాకిస్తాన్, యునైటెడ్ అరబ్ ఎమిరేట్స్ సహా మిత్ర దేశాలు అంగీకరించాయని వెల్లడించారు. దీంతో రాత్రి షెడ్యూల్ చేసిన దాడులను నిలిపేస్తున్నట్లు ప్రకటించారు.
నావల్ బ్లాకేడ్ కొనసాగుతుంది…
ఒప్పందం పూర్తిగా ఖరారు కాకుండా అమెరికా నావల్ బ్లాకేడ్ను కొనసాగిస్తామని ట్రంప్ స్పష్టం చేశారు. ఇరాన్తో డీల్ సంతకం అయ్యే వరకు ఈ బ్లాకేడ్ కొనసాగుతుందని పేర్కొన్నారు. ట్రంప్ ప్రకటనల్లోని ఈ వేగవంతమైన మార్పు ఇరాన్ సంక్షోభంలో అమెరికా వైఖరి ఎంత వేగంగా మారుతోందో చూపిస్తోంది. హెచ్చరికల నుంచి చర్చల వైపు మళ్లడం ద్వారా పరిస్థితిని శాంతింపజేసే ప్రయత్నం చేస్తున్నట్లు కనిపిస్తోంది. అయితే, ఒప్పందం ఎంత వేగంగా ఖరారవుతుందనేది ఇంకా స్పష్టంగా తెలియాలి.
