America: సినిమాలంటే చాలా మందికి పిచ్చి ఉంటుంది. అయితే ఆ పిచ్చి ఒక్కొక్కరిలో ఒక్కోలా ఉంటుంది. కొంతమంది కొన్ని రకాల సినిమాలు చూస్తారు.. మరికొందరు తమ నచ్చిన హీరో హీరోయిన్ల సినిమాలే చూస్తారు. ఇంకొందరైతే ప్రాంతీయత, భాష తేడాలు లేకుండా అన్ని సినిమాలు చూస్తారు. ఇక అలానే తన సినిమా పిచ్చితో ఓ వ్యక్తి ఏకంగా గిన్నిస్ వరల్డ్ రికార్డు సొంతం చేసుకున్నాడు.
అమెరికా యువకుడు..
అమెరికాకు చెందిన జాక్ ఏడాదిలో ఏకంగా 777 సినిమాలు చూసి గిన్నిస్ బుక్లో స్థానం దక్కించుకున్నాడు. అంతకు ముందు ఫ్రాన్స్కు చెందిన విన్సెంట్ క్రాన్ పేరిట ఈ రికార్డు ఉండేది. 2018 ఇతను ఏడాదికి 717 సినిమాలు చూసి ఈ రికార్డుడు నెలకొల్పాడు. తాజాగా దానిని జాక్ బద్దలు కొట్టాడు. అంటే జాక్ సగటున రోజుకు మూడు సినిమాల వరకు చూశాడు. అయితే ఈ రికార్డు కోసం 2022 జూలై నుంచి సినిమాలు చూడటం మొదలుపెట్టాడు. ఈ ఏడాది జూలై నాటికి మొత్తం 777 సినిమాలను చూడటం పూర్తిచేసి రికార్డ్ సొంతం చేసుకున్నాడు.
సినిమాలంటే ఇష్టమట..
తనకి ఎప్పటి నుంచో సినిమాలు చూడటమంటే చాలా ఇష్టమని చెప్పిన జాక్ ఏడాదికి సగటున 150 సినిమాలు చూసేవాడినని చెప్పాడు. అయితే ఇప్పుడు రికార్డు కోసమే 777 సినిమాలు చూసినట్లు పేర్కొన్నాడు. అయితే జాక్ సినిమాలను అతను ఏ ఓటీటీ ఫ్లాట్ ఫామ్ లోనో చూడలేదు. సినిమా థియేటర్కు వెళ్లే చూశాడు. అందులోనూ రీగల్ సినిమా హాల్లోనే అన్ని సినిమాను చూశాను. ఇందుకోసం అతడు మెంబర్షిప్ స్కీమ్లో కూడా చేరాడు. ఈ స్కీంలో నెలకు 22 డాలర్లు చెల్లిస్తే ఎన్ని సినిమాలు కావాలంటే అన్ని సినిమాలు చూడవచ్చు.
గిన్నిస్ నిబంధన ఇలా..
గిన్నిస్ రికార్డ్స్ వారి నిబంధనల ప్రకారం, ఈ రికార్డు నెలకొల్పేందుకు అభ్యర్థులు సినిమాను మొత్తం మొదటి నుంచి చివరి వరకు చూడాల్సి ఉంటుంది. అంతేకాదు థియేటర్లో సినిమా నడుస్తుండగా మొబైల్ చూసుకోవడం, లేదా చిన్న కునుకు తీయడం వంటివి అస్సలు చేయకూడదు. జాక్ ఈ నిబంధనలు ఫాలో అవుతున్నాడో లేదో సినిమా హాల్ వాళ్లే పర్యవేక్షించారు. అయితే ఈ రికార్డు కోసం జాక్ నిమిషం కూడా వదలకుండా సినిమా మొత్తం చూసేవాడు. అయితే ఇక్కడ ఇంకో విశేషం ఏంటంటే వీడెవడో ఖాళీగా ఉన్నాడు అందుకే అన్ని సినిమాలు చూశాడు అనుకుంటే పొరపాటే. జాక్ ఉదయం నుంచి మధ్యాహ్నం రెండు గంటల వరకు జాజ్ చేస్తాడు. ఆ తరువాతే సినిమాలు చూసేవాడు. అలా రోజుకు సరాసరి మూడు సినిమాలు, వీకెండ్లో ఇంకా ఎక్కువ సినిమాలు చూస్తూ ఈ రికార్డును నెలకొల్పాడు.
