Telangana Tiger Viral Video: దండకారణ్యాలలో పులులు సంచరిస్తుంటాయి. ఆకలి వేసినప్పుడు వేటాడుతుంటాయి. పులి వేటాడితే సాలిడ్ గా ఉంటుంది. ప్రత్యర్థి జంతువు ఎంత బలంగా ఉన్నప్పటికీ పులి పంజా దెబ్బకు అది తలవంచాల్సిందే. పులికి ఆహారం కావాల్సిందే.
మనదేశంలో పులికి ఆవాసంగా ఉన్న అడవులు చాలా ఉన్నాయి. తెలంగాణ రాష్ట్రంలో కూడా చాలానే అడవులు ఉన్నాయి. ఉమ్మడి ఆదిలాబాద్.. ఉమ్మడి పాలమూరు, ఉమ్మడి మెదక్, ఉమ్మడి ఖమ్మం జిల్లాలో దట్టమైన అరణ్యాలు ఉన్నాయి. ఈ అడవులలో పులులు నివసిస్తున్నాయి. గతంలో పులుల సంఖ్యను అటవీశాఖ అధికారులు ఉజ్జయింపుగా మాత్రమే చెప్పేవారు. అయితే కొంతకాలంగా అడవులలో సీసీ కెమెరాలను అధికారులు ఏర్పాటు చేశారు. ఆ కెమెరాలలో రికార్డు అయిన దృశ్యాల ఆధారంగా అధికారులు పులుల సంఖ్యను లెక్కిస్తున్నారు. ఆ పులులకు పేర్లు కూడా పెట్టారు.
తెలంగాణ రాష్ట్రంలో ఉమ్మడి ఆదిలాబాద్ తర్వాత.. ఆ స్థాయిలో పులులు ఎక్కువగా సంచరించేది ఉమ్మడి పాలమూరు జిల్లాలో ఉన్న అడవుల్లోనే. ముఖ్యంగా నాగర్ కర్నూల్ పరిధిలోని నల్లమల్ల అడవుల్లో పులులసంఖ్య అధికంగా ఉంటుంది. నల్లమల అడవుల్లోని ఫరహాబాద్ వ్యూ పాయింట్ సమీపంలో ఇటీవల ఎఫ్ 55 అనే ఆడ పులి అటవీ శాఖ అధికారులకు దర్శనమిచ్చింది. అటవీశాఖ అధికారులు మూడు రోజుల పర్యటనలో భాగంగా అడవిని సందర్శించారు. ఈ క్రమంలో అటవీశాఖాధికారి సువర్ణ నల్లమల అడవుల్లో పర్యటిస్తుండగా.. ఆడ పులి కనిపించింది.
అటవీ శాఖ అధికారులు ఆడ పులిని అత్యంత సమీపం నుంచి చూశారు. ఆడపులి వేటను ముగించుకుని.. కడుపునిండా మాంసాన్ని తిని..బ్రేవ్ మంటూ బయటికి వచ్చింది. వచ్చిన తర్వాత కాసేపు ఆటవిడుపు కోసం ఒక చెట్టును ఎక్కింది. వెంటనే దిగి మళ్లీ లోపలికి వెళ్ళిపోయింది. ఈ దృశ్యాలను అటవీశాఖ అధికారులు వాహనాలలో ఉండి.. తమ ఫోన్లలో చిత్రీకరించారు.. ఆ దృశ్యాలు ఇప్పుడు సోషల్ మీడియాలో విపరీతంగా సర్కులేట్ అవుతున్నాయి..” పులి బయటకు వచ్చింది. వేట ను ముగించుకుని వస్తుండగా మేం చూశాం. పులి సరదాగా అటూ ఇటూ తిరిగిందని” అటవీ శాఖ అధికారులు చెప్పారు.
