విదేశాల నుండి వచ్చి, చడీ చప్పుడు లేకుండా తిరుగుతూ, లక్నోలో విలాసవంతమైన దావత్ లో పాల్గొని, అక్కడ ఆమెను కలిసిన మాజీ సీఎం వస్టుంధార రాజేతో సహా పలువురు రాజకీయ ప్రముఖులను స్వీయనిర్బంధంలోకి పంపి పెను దుమారం రేపిన బాలీవుడ్ సింగర్ కనికాకపూర్కు మరోసారి కరోనా వైరస్ పాజిటివ్ అని వైద్యులు తేల్చారు.
ఇది వరుసగా ఆమెకు పాజిటివ్ రావడం మూడోసారి. ప్రస్తుతం లక్నోలోని ఓ హాస్పిటల్లో చికిత్స పొందుతున్నారు. ఇంకా వైద్యుల పర్యవేక్షణలోనే ఉన్నారు. ఆమె ఒక సెలబ్రెటీ వలే కాకుండా, ఒక రోగి వలే వ్యవహరిస్తూ, తమకు సహకరించాలి అంటూ వైద్యులు ఆమెపై చికాకు కనబరచడం తెలిసిందే. అయితే వైద్యులే తనను వేధిస్తున్నారని అంటూ ఆమె ఎదురు దాడికి పాల్పడ్డారు.
లండన్ నుంచి వచ్చిన కనికాకపూర్ కరోనావైరస్ బారిన పడ్డారు. ఆ తర్వాత రోగ లక్షణాలు గుర్తించిన వైద్యులు ఆమెకు మార్చి 20న, మార్చి 23న నిర్ధారణ పరీక్షలు నిర్వహించారు. తాజాగా మూడోసారి నిర్వహించిన పరీక్షల్లో కరోనావైరస్ ఆమెకు తీవ్రస్థాయిలో ఉన్నదనే విషయాన్ని వైద్యులు మరోసారి నిర్దారించారు.
కాగా ఆమెతో సన్నిహితంగా ఉన్నవారందరి వివరాలను సేకరించారు. వారందరికి కరోనా పరీక్షలు నిర్వహించగా 63మందికి నెగెటివ్ ఉన్నట్లు వైద్యులు నిర్ధారించారు.
మరోవంక, కరోనా విస్తరిస్తున్న నేపథ్యంలో కనికాకపూర్ బాధ్యతారాహిత్యంగా, నిర్లక్ష్యపూరితంగా వ్యవహరించారనే ఆరోపణలపై ఆమెపై కేసు నమోదు చేశారు.
వెంటనే కరోనా వైరస్ నుండి బైటపడలేని పక్షంలో ప్రపంచ ఆర్ధిక పరిస్థితులు దుర్భరంగా మారే అవకాశం ఉన్నదని అంతర్జాతీయ ద్రవ్య నిధి (ఐఎంఎఫ్) నేడు హెచ్చరించింది. కరోనా దెబ్బకు యావత్ ప్రపంచం ఇప్పటికే ఆర్థిక సంక్షోభంలోకి అడుగుపెట్టిన్నట్లు నేడు అధికారికంగా ప్రకటించింది.
ప్రస్తుతం దేశీయ, అంతర్జాతీయ రవాణా వ్యవస్థలు దిగ్బంధనం కావడంతో కొత్తగా దేశంలోకి కరోనా వైరస్ కేసులు వచ్చే అవకాశం దాదాపుగా లేదు. దేశంలోపల సహితం ఈ వ్యాధి ఉద్భవించిన దాఖలాలు కూడా లేవు. కేవలం విదేశాల నుండి వచ్చిన వారికి సోకడం, అది బయటపడక వారు యధావిధిగా తిరుగుతూ ఉండడంతో వారి కుటుంభం సభ్యులకు, వారికి సన్నిహితంగా వచ్చిన వారే రోజు రోజుకు పాజిటివ్ కేసులుగా బయటపడుతున్నాయి.
క్వారంటైన్లో ఉన్నవారి కదలికల పై నిఘా కోసం ఆంధ్రప్రదేశ్ పోలీసులు సాంకేతిక పరిజ్ఞానాన్ని వినియోగించుకోవాలని నిర్ణయించారు. ఇందుకోసం హౌస్ క్వారంటైన్ యాప్ పేరుతో సరికొత్త మొబైల్ యాప్ ను అందుబాటులోకి తీసుకు వచ్చారు. ఒక్కరోజులోనే హౌస్ క్వారంటైన్ అప్లికేషన్ లో విదేశాల నుండి ఆంధ్రప్రదేశ్ కు వచ్చిన ఐదు వేల మంది వివరాలను పోలీసులు పొందుపరచారు. మరో 24 గంటల్లో 20 వేల మంది వివరాలను నమోదు చేయనున్నట్లు పోలీసు అధికారులు తెలిపారు. అప్లికేషన్ లో నమోదైన వివరాలు జియో ట్యాగింగ్ తో అనుసంధానం చేస్తారు. వారి కదలికలపై ఎప్పటికప్పుడు నిఘా ఉంచుతారు.
