ముంబైలోని వోక్ హార్ట్ హాస్పిటల్ లో పనిచేస్తున్న ముగ్గురు డాక్టర్లు, 26 మంది నర్సులకు కరోనా వైరస్ సోకింది. దీంతో ఆ ఆసుపత్రిని బృహన్ ముంబై మున్సిపల్ కార్పొరేషన్ (బీఎంసీ) సీజ్ చేసింది. వారందరికి టెస్టులు నిర్వహించి నెగెటివ్ వచ్చే దాకా ఎవరూ బయటకు రాకూడదని మున్సిపల్ అధికారులు ఆదేశాలు జారీచేశారు. హాస్పిటల్ యాజమాన్యం సరైన రక్షణ చర్యలు తీసుకోకపోవడంతో ఆ దవాఖానకు చెందిన 300 మంది సిబ్బందిని ఇప్పటికే క్వారంటైన్ కు తరలించారు. మార్చి 20న ఇద్దరు కరోనా అనుమానితులను నగరంలోని కస్తూర్భా గాంధీ హాస్పిటల్ నుంచి వోక్హార్ట్ దవాఖానకు తరలించారు. అయితే వారిని సాధారణ ఐసీయూ వార్డులో ఉంచారు. సరైన రక్షణ చర్యలు తీసుకోకపోవడంతో వారి బాగోగులను చూసుకుంటున్న ఇద్దరు నర్సులకు మార్చి 28న కరోనా పాజిటివ్ అని తేలింది. క్రమంగా 26 మంది నర్సులు, ముగ్గురు డాక్టర్లు ఈ వైరస్ బారిన పడ్డారు.
కరోనా ప్రత్యేక సాయాన్ని ప్రభుత్వం సిబ్బంది కాకుండా వైసిపి అభ్యర్థులు పంపిణీ చేయడాన్ని ఎన్నికల సంఘం సీరియస్ గా తీసుకుంది. ఈ అంశంపై ఇప్పటికే బిజెపి, సిపిఐ పార్టీలు రాష్ట్ర ఎన్నికల సంఘానికి లేఖలు రాశాయి. ఈ లేఖలను పరిశీలించిన రాష్ట్ర ఎన్నికల కమిషనర్ రమేష్ కుమార్ విచారణకు ఆదేశించారు. ఈ మేరకు అన్ని జిల్లాల కలెక్టర్లకు రాష్ట్ర ఎన్నికల సంఘం లేఖ రాసింది. కొన్నిచోట్ల అధికార పార్టీకి చెందిన, స్థానిక సంస్థల ఎన్నికల బరిలో నిలిచిన అభ్యర్థులు పంపిణీ చేసినట్లు ఫిర్యాదులో పేర్కొన్నారని, రానున్న ఎన్నికల్లో లబ్ధి పొందేందుకు అధికార పార్టీకి చెందిన అభ్యర్థులు నగదు సాయం పంపిణీ చేస్తూ ఎన్నికల ప్రచారానికి పాల్పడుతున్నట్లు పేర్కొన్నారని ఇందుకు సంబంధించి కొన్ని పత్రికల్లో వచ్చిన వార్తలు, వీడియోలు సమర్పించినట్లు వాటిని పరిశీలించి నివేదిక ఇవ్వాల్సిందిగా కోరింది. ప్రస్తుతానికి ఎన్నికల కోడ్ అమలులో లేదని, ఎన్నికలలో వాయిదా వేయడం వల్ల ప్రస్తుతం ప్రచారానికి అనుమతి లేదని తెలిపింది. నిబంధనలను ఉల్లంగించి ఎన్నికల ప్రచారాన్ని నిర్వహిస్తే నివేదికలు రూపొందించే రాష్ట్ర ఎన్నికల సంఘానికి అందించాల్సిందిగా కలెక్టర్లకు సూచించారు
లాక్ డౌన్ ప్రభావంతో సామాన్యుడు బయటకు రాలేని పరిస్థితుల్లో ఉండటంతో పేదలకు నిత్యావసరాలతో పాటు వెయ్యి రూపాయలు చొప్పున ఆర్థిక సాయం పంపిణీ చేస్తున్న ఏపీ ప్రభుత్వంపై ప్రతిపక్షాలు విమర్శలు చేయడం సరికాదని వైసీపీ ఎమ్మెల్యే అంబటి రాంబాబు హితవు పలికారు. గుంటూరు జిల్లా తాడేపల్లిలోని వైసీపీ కేంద్ర కార్యాలయంలో ఇవాళ ఏర్పాటు చేసిన మీడియా సమావేశంలో ఆయన మాట్లాడుతూ, కేంద్ర ప్రభుత్వం ఇచ్చిన సాయాన్ని రాష్ట్ర ప్రభుత్వం ఇస్తున్నట్టుగా సీఎం జగన్ చెప్పుకుంటున్నారంటూ బీజేపీ నేతలు ఆరోపణలు చేయడం కరెక్టు కాదని అన్నారు.
