Rare Turtle Species Facts: ప్రపంచంలోని చాలా జీవుల్లో పుట్టబోయే పిల్లల లింగాన్ని సెక్స్ క్రోమోజోమ్స్ నిర్ణయిస్తాయి. కానీ సముద్ర తాబేళ్లలో మాత్రం ప్రకృతి ఒక అద్భుతమైన విధానాన్ని అమలు చేస్తుంది. వీటిలో అనేక జాతుల పిల్లలు మగవారా? ఆడవారా? అన్నది గుడ్లు పొదిగే సమయంలో ఉండే ఉష్ణోగ్రత ఆధారంగా నిర్ణయించబడుతుంది. ఈ ప్రత్యేకత కారణంగా సముద్ర తాబేళ్లు శాస్త్రవేత్తలను ఎప్పటికప్పుడు ఆశ్చర్యానికి గురిచేస్తూనే ఉన్నాయి.ప్రపంచ తాబేలు దినోత్సవం (World Turtle Day)ను ప్రతి సంవత్సరం మే 23 న ప్రపంచవ్యాప్తంగా జరుపుకుంటారు. ఈ సందర్భంగా సముద్ర తాబేళ్ల జీవనం గురించి..
తాబేళ్ల సంతానోత్పత్తి చాలా ఆసక్తిగా ఉంటుంది. ఈ తాబేళ్ల గుడ్లు ఉన్న గూటి ఉష్ణోగ్రత 27.7 డిగ్రీల సెల్సియస్ కంటే తక్కువగా ఉంటే ఎక్కువగా మగ తాబేళ్లు పుడతాయి. అదే ఉష్ణోగ్రత 31 డిగ్రీల సెల్సియస్కి పైగా ఉంటే ఆడ తాబేళ్లు జన్మిస్తాయి. మధ్యస్థ ఉష్ణోగ్రతల్లో మగ, ఆడ తాబేళ్లు కలగలిపి పుడతాయి. ఈ ప్రక్రియను శాస్త్రవేత్తలు ‘టెంపరేచర్ డిపెండెంట్ సెక్స్ డిటర్మినేషన్’ అని పిలుస్తారు.
ఈ ప్రత్యేక లక్షణం Green sea turtle, Red-eared slider వంటి తాబేళ్ల జాతుల్లో ఎక్కువగా కనిపిస్తుంది. వాతావరణ మార్పులు పెరుగుతున్న నేపథ్యంలో గ్లోబల్ వార్మింగ్ కారణంగా ఇసుక ఉష్ణోగ్రతలు పెరిగితే ఆడ తాబేళ్ల సంఖ్య అధికమయ్యే ప్రమాదం ఉందని శాస్త్రవేత్తలు హెచ్చరిస్తున్నారు. దీని వల్ల భవిష్యత్తులో ఈ జాతుల సమతుల్యత దెబ్బతినే అవకాశం ఉందని చెబుతున్నారు.
సముద్ర తాబేళ్లలో అత్యంత విశేషమైన జాతిగా Leatherback sea turtle గుర్తింపు పొందింది. ఇవి ప్రపంచంలోనే అతిపెద్ద సముద్ర తాబేళ్లు మాత్రమే కాకుండా అద్భుతమైన డైవర్స్ కూడా. ఆహారం కోసం సముద్రంలో సుమారు 3 వేల అడుగుల లోతు వరకు వెళ్లగల సామర్థ్యం వీటికి ఉంది. తీవ్రమైన ఒత్తిడిని తట్టుకుని లోతైన సముద్రాల్లో సంచరించే ఈ తాబేళ్లు ప్రకృతిలోని అద్భుత జీవులలో ఒకటిగా నిలిచాయి.
