Allu Arjun: డిసెంబర్ 4వ తేదీ రాత్రి హైదరాబాద్ లోని ఆర్టీసీ క్రాస్ రోడ్స్ వద్ద ఉన్న సంధ్య థియేటర్లో తొక్కిసలాట చోటు చేసుకుంది. ఈ ఘటనలో రేవతి అనే ఒక వివాహిత కన్నుమూసింది. ఆమె కుమారుడు అపస్మారక స్థితికి చేరుకున్నాడు. ప్రస్తుతం ఆ బాలుడికి చికిత్స జరుగుతుంది. రేవతి మృతిపై పుష్ప 2 టీమ్ దిగ్బ్రాంతి వ్యక్తం చేశారు. నష్టపరిహారంగా రూ. 25 లక్షలు ప్రకటించారు. అలాగే బాలుడు వైద్యానికి అయ్యే ఖర్చు భరిస్తామని హామీ ఇచ్చారు. అన్ని విధాలుగా ఆ కుటుంబానికి అండగా ఉంటామని తెలియజేశారు.
మహిళ మృతిపై కేసు నమోదు చేసిన పోలీసులు సంధ్య థియేటర్ యాజమాన్యం, మేజర్ తో పాటు పలువురిని అరెస్ట్ చేశారు. ఈ కేసులో ఏ 1 గా అల్లు అర్జున్ పేరు చేర్చారు. ఈ క్రమంలో డిసెంబర్ 13న అల్లు అర్జున్ ని అరెస్ట్ చేశారు. నాంపల్లి కోర్టు ఆయనకు 14 రోజుల రిమాండ్ విధించింది. మధ్యంతర బెయిల్ కొరకు అల్లు అర్జున్ హైకోర్టును ఆశ్రయించారు. అల్లు అర్జున్ తరపున అడ్వకేట్ నిరంజన్ రెడ్డి వాదించారు. ఆయన వాదనలతో ఏకీభవించిన హైకోర్టు అల్లు అర్జున్ కి 4 వారాల మధ్యంతర బెయిల్ మంజూరు చేసింది.
అల్లు అర్జున్ కి బెయిల్ వచ్చినప్పటికి ఒకరోజు రాత్రి చంచల్ గూడ జైలులో సాధారణ ఖైదీలా గడపాల్సి వచ్చింది. మరుసటి రోజు అల్లు అర్జున్ అరెస్ట్ అయ్యారు. అల్లు అర్జున్ అరెస్ట్ వెనుక రాజకీయ కుట్ర ఉంది. అల్లు అర్జున్ ని ఇబ్బంది పెట్టాలనే శుక్రవారం అరెస్ట్ చేశారు. శని, ఆదివారం కోర్టుకు సెలవు దినాలు కావడంతో అల్లు అర్జున్ ని ఎలాగైనా జైలు పాలు చేయాలని ప్రణాళిక పన్నారంటూ విమర్శలు వెల్లువెత్తాయి.
అలాగే హైకోర్టులో అల్లు అర్జున్ తరపున వాదించిన నిరంజన్ రెడ్డి.. అరెస్ట్ సరికాదని అన్నారు. అల్లు అర్జున్ ని కస్టడీలోకి తీసుకుని విచారిస్తే సరిపోతుంది. గతంలో షారుఖ్ ఖాన్ నటించిన రాయన్ మూవీ విడుదల సమయంలో ఒక అభిమాని థియేటర్ వద్ద మృతి చెందాడు. అప్పుడు షారుఖ్ ఖాన్ ని బాధ్యుడిని చేస్తూ అరెస్ట్ చేయలేదన్న విషయాన్ని జడ్జికి గుర్తు చేశాడు.
అయితే పోలీసుల వివరణ ప్రకారం అల్లు అర్జున్ తప్పు చేశాడు. పుష్ప 2 మూవీ హీరో, హీరోయిన్, దర్శక నిర్మాతలు ఎవరూ థియేటర్ వద్దకు రావడానికి వీలు లేదు. లా అండ్ ఆర్డర్ సమస్య వస్తుందని సంధ్య థియేటర్ యాజమాన్యానికి లేఖ ద్వారా తెలియజేశాము. పోలీసుల సూచనలు అల్లు అర్జున్ పట్టించుకోలేదు. వద్దని చెప్పినా కారులో ర్యాలీగా సంధ్య థియేటర్ కి వచ్చాడు. అందుకే ప్రమాదం జరిగింది. అల్లు అర్జున్ ని అరెస్ట్ చేసి, రిమాండ్ కి పంపడానికి కారణం ఇదే అంటూ.. స్పష్టం చేస్తున్నారు. దీనికి సంబంధించిన నోటీస్ వైరల్ అవుతుంది.
