Allu Arjun Family : టాలీవుడ్లో స్టైలిష్ స్టార్గా మొదలైన అల్లు అర్జున్ ప్రయాణం.. ఇప్పుడు పాన్ ఇండియా స్టార్గా మారే స్థాయికి చేరింది. ముఖ్యంగా ‘పుష్ప’ సిరీస్ తర్వాత దేశవ్యాప్తంగా ఆయనకు వచ్చిన గుర్తింపు, అభిమానగణం తెలుగు సినిమా మార్కెట్ను మరింత విస్తరించింది. అయితే అదే సమయంలో అల్లు అర్జున్, ఆయన కుటుంబంపై సోషల్ మీడియాలో ట్రోలింగ్ కూడా ఎక్కువైంది. తాజాగా ఆయన తమ్ముడు చేసిన వ్యాఖ్యలు ఈ చర్చకు మరోసారి తెరలేపాయి.
అల్లు అర్జున్ తమ్ముడు అల్లు శిరీష్.. తమ కుటుంబం ఎదుర్కొంటున్న అర్ధరాత్రి 2 గంటల వరకూ భక్తి పేరుతో మైక్ లు పెడుతూ సౌండ్ పొల్యూషన్ చేస్తున్నారని పరిస్థితులపై స్పందిస్తూ ‘‘మాకు ఇబ్బందిగా ఉంది’’ అన్నట్టుగా చేసిన వ్యాఖ్యలు సోషల్ మీడియాలో వైరల్గా మారాయి. అయితే ఈ వ్యాఖ్యలపై చర్చ జరగాల్సిన స్థానం కాస్తా.. అల్లు అర్జున్ను టార్గెట్ చేస్తూ ట్రోలింగ్కు దారితీసిందనే అభిప్రాయాలు వ్యక్తమవుతున్నాయి. ఒక కుటుంబ సభ్యుడు తన వ్యక్తిగత అనుభవాన్ని చెప్పినంత మాత్రాన.. అందులోకి అల్లు అర్జున్ కెరీర్, వ్యక్తిగత జీవితం, కుటుంబాన్ని లాగడం ఎంతవరకు సమంజసమనే ప్రశ్నలు వినిపిస్తున్నాయి.
పాన్ ఇండియా స్టార్గా ఎదిగిన తర్వాతే..
అల్లు అర్జున్ కెరీర్ను గమనిస్తే.. తెలుగు ప్రేక్షకుల్లో ఆయనకు ఎప్పటి నుంచో ప్రత్యేకమైన క్రేజ్ ఉంది. కానీ ‘పుష్ప: ది రైజ్’ తర్వాత ఆయన ఇమేజ్ ఒక్కసారిగా దేశవ్యాప్తంగా విస్తరించింది. ‘‘తగ్గేదేలే’’ అంటూ ఆయన చెప్పిన డైలాగ్, పుష్పరాజ్ పాత్ర, ఆయన స్టైల్, డ్యాన్స్.. భాషా భేదాలను దాటి ప్రేక్షకులను ఆకట్టుకున్నాయి.
‘పుష్ప 2: ది రూల్’తో ఈ క్రేజ్ మరింత పెరిగింది. తెలుగు హీరో ఒకరు హిందీ మార్కెట్లో భారీ వసూళ్లు సాధించడం, దేశవ్యాప్తంగా అభిమానులను సంపాదించుకోవడం.. టాలీవుడ్ స్థాయిని మరో మెట్టు ఎక్కించిందనే అభిప్రాయం ఉంది.
అయితే స్టార్కు ఎంత పెద్ద గుర్తింపు వస్తే.. అంతే స్థాయిలో విమర్శలు, ట్రోలింగ్ కూడా రావడం సోషల్ మీడియా యుగంలో సాధారణంగా మారింది. అభిమానుల మధ్య పోటీ, హీరోల ఫ్యాన్ వార్స్, సోషల్ మీడియా ట్రెండ్స్, వైరల్ కంటెంట్ కోసం చేసే ప్రయత్నాలు.. ఇవన్నీ కలిసి ఒక చిన్న వ్యాఖ్యను కూడా పెద్ద వివాదంగా మార్చేస్తున్నాయి.
అసూయా? లేక ఫ్యాన్ వార్ ప్రభావమా?
అల్లు అర్జున్పై వస్తున్న ప్రతి విమర్శను ‘‘అసూయ’’గా చూడటం కూడా సరైంది కాదు. ఒక స్టార్పై విమర్శలు రావడానికి అనేక కారణాలు ఉండొచ్చు. అయితే విమర్శ పేరుతో వ్యక్తిగత దూషణలు చేయడం, కుటుంబ సభ్యులను టార్గెట్ చేయడం మాత్రం ఆరోగ్యకరమైన చర్చ కాదనే అభిప్రాయం బలంగా వినిపిస్తోంది.
మరోవైపు.. తెలుగు హీరో పాన్ ఇండియా స్థాయిలో గుర్తింపు తెచ్చుకోవడాన్ని కూడా కొందరు జీర్ణించుకోలేకపోతున్నారనే చర్చ సోషల్ మీడియాలో కనిపిస్తోంది. ముఖ్యంగా స్టార్ హీరోల అభిమానుల మధ్య ఉన్న పోటీ కారణంగా ఒక హీరో సాధించిన విజయాన్ని మరో హీరో అభిమానులు తక్కువ చేసి చూపించే ప్రయత్నాలు తరచూ కనిపిస్తుంటాయి.
విజయమే కారణమా?
అల్లు అర్జున్ విషయంలో మరో ఆసక్తికరమైన అంశం ఏమిటంటే.. ఆయన తన కెరీర్ను కేవలం తెలుగు మార్కెట్కే పరిమితం చేయకుండా దేశవ్యాప్తంగా తీసుకెళ్లగలిగారు. ‘పుష్ప’ పాత్ర ఉత్తరాది ప్రేక్షకులకు కూడా కనెక్ట్ కావడం, ఆయన డ్యాన్స్కు, స్టైల్కు అక్కడ కూడా అభిమానులు ఏర్పడటం ఆయన కెరీర్లో కీలక మలుపు.
అందుకే ఇప్పుడు ఆయనపై వచ్చే ప్రతి వ్యాఖ్యకు జాతీయ స్థాయిలో కూడా స్పందన వస్తోంది. ఒకప్పుడు టాలీవుడ్కు పరిమితమైన చర్చ.. ఇప్పుడు దేశవ్యాప్తంగా సోషల్ మీడియా చర్చగా మారుతోంది.
అయితే ఒక విషయం మాత్రం స్పష్టంగా చెప్పాలి. ఒక స్టార్ విజయాన్ని అభినందించడం ఒక వైపు.. ఆయనపై అభిప్రాయాలు వ్యక్తం చేయడం మరో వైపు. కానీ కుటుంబ సభ్యుల వ్యాఖ్యలను పట్టుకుని వ్యక్తిగత దూషణలకు దిగడం మాత్రం అవసరం లేని పరిణామం.
అల్లు అర్జున్ కుటుంబంపై నిజంగా ‘‘అసూయ’’ ఉందా? లేక ఫ్యాన్ వార్స్, సోషల్ మీడియా ట్రోలింగ్ సంస్కృతి ప్రభావమా? అనే ప్రశ్నకు సమాధానం ఒక్కటే కాకపోవచ్చు. కానీ తెలుగు సినిమా ప్రపంచ స్థాయికి వెళ్లాలని కోరుకునే సమయంలో.. మన హీరోల విజయాలను వ్యక్తిగత పోటీగా కాకుండా తెలుగు సినిమా విజయంగా చూడాల్సిన అవసరం ఉందనే అభిప్రాయం మాత్రం బలపడుతోంది.
