ఆ ఎమ్మెల్యేల విషయంలో జగన్ నిర్ణయం ఇదే..!

రాష్ట్రంలోని వైసీపీ ప్రభుత్వంపై ఆ పార్టీ ఎమ్మెల్యేలు, ఎంపిలు కొద్దీ రోజులుగా అసంతృప్తి వ్యక్తం చేస్తున్నారు. ఏడాది పూర్తయిన సందర్భంగా ఎమ్మెల్యేలలో అసంతృప్తి స్థాయి బాగా పెరిగిందనే చెప్పాలి. ఈ వ్యవహారంలో కొందరు సీనియర్ నాయకులు ఉన్నారు. మాజీ మంత్రి ఆనం రామనారాయణ రెడ్డి ఆయన నియోజకవర్గ పరిధిలో అభివృద్ధి పనులు చేయించుకోలేక పోవడంతో అసంతృప్తి తో ఉన్నారు. మరో మాజీ మంత్రి ధర్మాన ప్రసాదరావుది ఇదే పరిస్థితి. బొల్లా బ్రహ్మనాయుడు మళ్ళీ పోటీ చేసే అవకాశం లేదని ఇప్పుడే నియోజకవర్గ ప్రజలకు ఏదైనా మేలు చేయాలని భావిస్తున్నారు. ఈ క్రమంలో ఎదురవుతున్న సమస్యలతో సతమతం అవుతున్నారు. ఎంపీ రఘురామ కృష్ణంరాజు బీజేపీ సంబంధాలు ఉన్నాయని బహిరంగంగా ప్రకటించారు. వీరు ఇసుక విధానం, టిటిడి భూముల అమ్మకం, అభివృద్ధి పనులు, ప్రభుత్వ విధానాలపై విమర్శలు చేసారు.

సహజంగా జాతీయ పార్టీల్లో నాయకులకు స్వతంత్రం ఎక్కువగా ఉంటుంది. ఏ విషయాన్ని అయినా మీడియా ముందు వ్యక్తం చేస్తారు. వైసీపీ, టీడీపీ వంటి ప్రాంతీయ పార్టీల నాయకులకు ఏ విషయాన్ని అయినా పార్టీ ముఖ్య నాయకులతో చర్చించాలే తప్ప బహిరంగంగా ప్రస్తావిస్తే చర్యలు తప్పవు. అందులో జగన్ వంటి నాయకుడి వద్ద అటువంటి సాహసన్ని చేయడం మాములు విషయం కాదనే చెప్పాలి. వైసీపీ ప్రభుత్వం ఏడాది పాలన పూర్తి చేసుకున్న శుభ సందర్భంలో పార్టీలో అసంతృప్తి రాగాలు కొంత భంగ పాటును కలిగించాయి. తగిన ప్రాధాన్యత ఇవ్వకపోవడంతోనే ఇటువంటి వ్యాఖ్యలు చేస్తున్నారని పార్టీలో మరికొందరు నాయకులు చెబుతున్నారు.

వీరి విషయంలో తీసుకోవాల్సిన చర్యలపై పార్టీ వ్యవహారాలు పర్యవేక్షిస్తున్న నాయకులు చర్చలు సాగిస్తున్నారు. ఈ నేపథ్యంలో అసంతృప్తి ఎమ్మెల్యేలతో సీఎం జగన్ ఒక సమావేశం నిర్వహించాలని నిర్ణయం తీసుకున్నారు. త్వరలోనే ఈ సమావేశం జరిగే అవకాశాలు ఉన్నాయని సమాచారం. ఈ నెల 16వ తేదీ నుంచి అసెంబ్లీ సమావేశాలు నిర్వహించనుండటం తో అంతకు ముందు ఏ సమావేశాన్ని నిర్వహించాలా లేక అసెంబ్లీ సమావేశాల సమయంలోనే నిర్వహించాలా అనే అంశంపై చర్చలు జరుగుతున్నాయి.