మళ్లీ పట్టాలెక్కబోతున్న టాలీవుడ్

టాలీవుడ్ చిత్రసీమను తిరిగి గాడిలో పెట్టేందుకు సీనిపెద్దలు ప్రయత్నిస్తున్నారు. ఇందులో భాగంగానే గురువారం మెగాస్టార్ ఇంట్లో సీనిపెద్దలు బేటీ అయ్యారు. రెండు నెలలుగా థియేటర్లు మూతపడటం, సినిమా షూటింగులు వాయిదాపడటంతో ఇండస్ట్రీ ఎదుర్కొంటున్న ఇబ్బందులను తెలంగాణ సినిమాటోగ్రఫీ మంత్రి తలసాని శ్రీనివాస్ యాదవ్ తో చర్చించారు. ప్రభుత్వం ఎప్పటి నుంచి షూటింగులకు అనుమతి ఇస్తుందో చెప్పాలని మంత్రి తలసానిని సినీ పెద్దలు కోరారు. ఈమేరకు ఆయన స్పందిస్తూ పోస్టు ప్రొడక్షన్ పనులు చేసుకోవచ్చని తెలిపారు. అయితే షూటింగుల విషయంలో ముఖ్యమంత్రి కేసీఆర్ దే తుది నిర్ణయం తెలిపారు. దీంతో సినీ పెద్దలు ముఖ్యమంత్రి కలిసి కార్మికులు ఎదుర్కొంటున్న ఇబ్బందులను ప్రభుత్వం దృష్టికి తీసుకెళ్తామని చెప్పారు. ముఖ్యమంత్రిని కలిసి వినతిప్రతం అందజేస్తామని తెలిపారు. దీనిపై రెండ్రోజుల్లోనే తేల్చేస్తామని తలసాని శ్రీనివాస్ యాదవ్ ప్రకటించారు. ఈనేపథ్యంలో శుక్రవారం సాయంత్రం సీనిపెద్దలు ముఖ్యమంత్రితో బేటీ కావడం ప్రాధాన్యతను సంతరించుకుంది.

టాలీవుడ్ సీనిపెద్దలు శుక్రవారం ముఖ్యమంత్రి కేసీఆర్ తో బేటీ అయి తమ సమస్యలను విన్నవించారు. రెండునెలలు షూటింగులు లేకపోవడంతో ఇండస్ట్రీని నమ్ముకొని జీవిస్తున్న వేలాదిమంది కార్మికులు ఇబ్బందులు పడుతున్నారని ముఖ్యమంత్రి దృష్టికి తీసుకెళ్లారు. ప్రభుత్వం షూటింగులకు అనుమతిస్తే ప్రభుత్వ నిబంధనలకు లోబడి పని చేస్తామని వారు వివరించారు. సీనిపెద్దలు చెప్పిన విషయాన్నింటిని సావధానంగా ముఖ్యమంత్రి విన్నారు. సీని పరిశ్రమ మంచిగా బతకాలనే ఆకాంక్షను వ్యక్తం చేశారు. ఈమేరకు పోస్టు ప్రొడక్షన్ పనులు రెండు మూడురోజుల్లో చేసుకోవచ్చని అన్నారు. రాష్ట్రంలో ప్రస్తుతం కరోనా విభృంభిస్తుండటంతో తగు జాగ్రత్తలు తీసుకోవాల్సిన అవసరం ఉందన్నారు. ఈమేరకు సినిమాటోగ్రఫీ మంత్రి తలసాని శ్రీనివాస్ యాదవ్ తో చర్చించాలని సూచించారు.

ఎంతమందితో షూటింగులు నిర్వహించాలి? ఎలాంటి జాగ్రత్తలు తీసుకోవాలనేది దానిపై ప్రభుత్వం మార్గదర్శకాలను చేస్తుందని తెలిపారు. ఈ నిబంధనలు పాటిస్తూ షూటింగులు జరుపుకోవచ్చని కేసీఆర్ హామీ ఇచ్చారు. ఈమేరకు మంత్రి తలసాని శ్రీనివాస్ మార్గదర్శకాలను తయారుచేసే పనిలో నిమగ్నమయ్యారు. ఒకటి రెండ్రోజుల్లో షూటింగులకు సంబంధించిన గైడ్ లైన్స్ ప్రభుత్వం విడుదల చేయనుంది. అదేవిధంగా సినీ కార్మికులకు ఆదుకునేందుకు తగు చర్యలు తీసుకోనుంది. ఈమేరకు జూన్ మొదటివారంలో సినిమా షూటింగులు ప్రారంభం కానున్నట్లు తెలుస్తోంది. తమ విజ్ఞప్తికి ప్రభుత్వం సానుకూలంగా స్పందించడంతో సినీపెద్దలు ప్రభుత్వానికి కృతజ్ఞతలు తెలిపారు.