Nagar kurnool: తెలంగాణ రాష్ట్రంలోని నాగర్ కర్నూల్ జిల్లాలో దారుణం చోటుచేసుకుంది. ఈ జిల్లాలోని లింగాల పోలీస్ స్టేషన్ ఎస్ఐ కొందరు యువకులకు శిరో ముండనం చేయించాడు. ఇది స్థానికంగా సంచలనం సృష్టించింది. ఎస్సై దగ్గరుండి గుండు కొట్టించడంతో ఓ యువకుడు తీవ్ర మనస్థాపానికి గురయ్యాడు. తట్టుకోలేక ఆత్మహత్యకు యత్నించాడు. ప్రస్తుతం ఆ యువకుడు నాగర్ కర్నూల్ ప్రభుత్వ ఆసుపత్రిలో చికిత్స పొందుతున్నాడు. ఆ యువకుడి ఆరోగ్యం అత్యంత విషమంగా ఉందని తెలుస్తోంది. ఈ సంఘటన ఆలస్యంగా వెలుగులోకి వచ్చింది. లింగాల పోలీస్ స్టేషన్ పరిధిలో ఉన్న పెట్రోల్ బంక్ లో పెట్రోల్ కొట్టించుకునే విషయంలో యువకులు, బంక్ సిబ్బంది మధ్య వాగ్వాదం జరిగింది. దీంతో బ్యాంక్ నిర్వాహకులు పోలీసులకు ఫిర్యాదు చేశారు. ఈ కేసు విచారణ నిమిత్తం పోలీసులు ఆ యువకులను పిలిపించారు.. పోలీస్ స్టేషన్ ఎస్ఐ ఇరు వర్గాలను విచారిస్తుండగా.. ఓ యువకుడు ఎస్ఐ ముందు నిలుచుని తల దువ్వుకున్నాడు. దీంతో ఆ ఎస్ఐ ఆగ్రహంతో రెచ్చిపోయాడు. దీంతో అతనితో పాటు మరో ఇద్దరి యువకులకు కూడా గుండు కొట్టించాడు.
ఎస్సై చేసిన పనితో..
ఎస్ఐ చేసిన పనితో తీవ్రమైన మనస్థాపానికి గురైన ఓ యువకుడు ఉరివేసుకొని ఆత్మహత్యకు యత్నించాడు. దీంతో అతడి కుటుంబ సభ్యులు యుద్ధ ప్రాతిపదికన నాగర్ కర్నూల్ జిల్లా కేంద్రంలోని గవర్నమెంట్ హాస్పిటల్ కు తీసుకెళ్లారు. అయితే ఆ యువకుడి పరిస్థితి అత్యంత విషమంగా ఉందని తెలుస్తోంది. ఈ ఘటనపై పోలీసు ఉన్నతాధికారులు అంతర్గతంగా విచారణ జరుపుతున్నారని తెలుస్తోంది. ఈ వ్యవహారంపై ఇంటెలిజెన్స్ తో ఇప్పటికే ఒక నివేదిక తెప్పించుకున్నారని సమాచారం.. ఎస్సై అందరి ముందు గుండు కొట్టించడంతో ఆ యువకుడు తీవ్రమైన మనస్థాపానికి గురైనట్టు స్థానికులు చెబుతున్నారు. పైగా అందరూ చూస్తుండగానే గుండు కొట్టించడం అతడిని మనస్థాపానికి గురయ్యాలా చేసిందని.. అందువల్లే అతడు ఆత్మహత్యకు యత్నించాడని చెబుతున్నారు. పెట్రోల్ బంక్ లో పెట్రోల్ కొట్టించుకునే సమయంలో ఆ యువకుల తప్పులేదని.. పెట్రోల్ బంక్ నిర్వాహకులే అనవసరంగా పోలీసులకు ఫిర్యాదు చేశారని.. ఆ తర్వాత జరిగిన పరిణామాలు ఇంతటి దారుణానికి కారణమయ్యాయని స్థానికులు అంటున్నారు. ఆ యువకుడు ఉరి వేసుకోవడం వల్ల.. గొంతు భాగం వద్ద గాయమైంది. పైగా ఆ తాడు నైలాన్ ది కావడంతో గొంతుకు తీవ్రమైన ఒత్తిడి ఏర్పడింది. ఆ భాగంలో కమిలి పోయింది. శ్వాస సరిగా ఆడక పోవడంతో అంతర్గతంగా అవయవాలు దెబ్బతిన్నాయని వైద్యులు అంటున్నారు. ప్రస్తుతం అతడి ఆరోగ్య పరిస్థితి విషమంగా ఉందని చెబుతున్నారు. అతడికి ఐసీయూలో చికిత్స అందిస్తున్నారు.
