Motorola Signature 27 : ప్రముఖ స్మార్ట్‌ఫోన్ తయారీ సంస్థ మోటరోలా మరో ఫ్లాగ్‌షిప్ ఫోన్‌ను మార్కెట్లోకి తీసుకొచ్చేందుకు సిద్ధమైంది. కంపెనీకి చెందిన సిగ్నేచర్ సిరీస్‌లో రెండో మోడల్‌గా వస్తున్న Motorola Signature 27 లాంచ్ తేదీని అధికారికంగా ప్రకటించింది. నవంబర్ 5న ఈ స్మార్ట్‌ఫోన్‌ను ప్రపంచవ్యాప్తంగా విడుదల చేయనున్నట్లు వెల్లడించింది. ఇప్పటికే ఈ ఫోన్‌కు సంబంధించిన పలు ఫీచర్లు బయటకు రాగా.. తాజాగా గీక్‌బెంచ్ బెంచ్‌మార్కింగ్ ప్లాట్‌ఫామ్‌పై కూడా కనిపించింది. దీంతో ఫోన్‌లో ఉపయోగించనున్న ప్రాసెసర్, ర్యామ్, పనితీరుకు సంబంధించిన కీలక వివరాలు వెలుగులోకి వచ్చాయి.
నవంబర్ 5న గ్లోబల్ లాంచ్
మోటరోలా తన అధికారిక ఎక్స్ (X) ఖాతా ద్వారా సిగ్నేచర్ 27 విడుదల తేదీని ప్రకటించింది. ‘ఎలిగెంట్ డిజైన్.. సౌకర్యవంతమైన వినియోగం’ అనే కాన్సెప్ట్‌తో ఈ ఫోన్‌ను రూపొందించినట్లు కంపెనీ పేర్కొంది. నవంబర్ 5న ఈ కొత్త స్మార్ట్‌ఫోన్‌ను పరిచయం చేయనున్నట్లు వెల్లడించింది. గతంలో నవంబర్‌లోనే లాంచ్ ఉంటుందని సంకేతాలు ఇచ్చినప్పటికీ.. తాజాగా కచ్చితమైన తేదీని ఖరారు చేసింది. ఈ ఫోన్‌ను తొలిసారిగా స్నాప్‌డ్రాగన్ సమ్మిట్ 2026లో పరిచయం చేయగా, ఇండియన్ మొబైల్ కాంగ్రెస్ (IMC) 2026లో కూడా ప్రదర్శించింది.
గీక్‌బెంచ్‌లో అదిరిపోయే స్కోర్లు
లాంచ్‌కు ముందే Motorola Signature 27 గీక్‌బెంచ్ 7 ప్లాట్‌ఫామ్‌పై దర్శనమిచ్చింది. ఇందులో సింగిల్ కోర్ టెస్టులో 3,313 పాయింట్లు, మల్టీ కోర్ టెస్టులో 11,088 పాయింట్లు సాధించినట్లు సమాచారం. ఈ లిస్టింగ్ ప్రకారం ఫోన్ ఆండ్రాయిడ్ 17 ఆపరేటింగ్ సిస్టమ్‌తో పనిచేయనుంది. ఇందులో సుమారు 10.94GB మెమరీ అందుబాటులో ఉన్నట్లు చూపిస్తోంది. దీన్ని బట్టి ఈ స్మార్ట్‌ఫోన్ 12GB ర్యామ్ వేరియంట్‌తో వచ్చే అవకాశం ఉంది.
స్నాప్‌డ్రాగన్ పవర్‌ఫుల్ చిప్‌సెట్
ఈ ఫోన్‌లో QTI SM8975 పేరుతో గుర్తించిన ఆక్టా కోర్ ప్రాసెసర్‌ను ఉపయోగించినట్లు గీక్‌బెంచ్ లిస్టింగ్ వెల్లడించింది. ఇందులో 3.74GHz, 4.03GHz, 5.01GHz క్లాక్ స్పీడ్‌లతో కూడిన కోర్లు ఉన్నట్లు పేర్కొంది. గ్రాఫిక్స్ కోసం అడ్రినో 850 GPUను అందించనున్నట్లు సమాచారం. మోటరోలా వెల్లడించిన వివరాల ప్రకారం ఇందులో Snapdragon 8 Elite Extreme Gen 6 చిప్‌సెట్ ఉండనుంది. అధిక పనితీరుతో పాటు గేమింగ్, మల్టీటాస్కింగ్ సమయంలో వేడి తగ్గించేందుకు కంపెనీ ప్రత్యేకంగా రూపొందించిన ArcticMesh కూలింగ్ సిస్టమ్‌ను కూడా అందించనుంది.
అయితే ప్రస్తుతం బయటకు వచ్చిన గీక్‌బెంచ్ స్కోర్లు ప్రీ-లాంచ్ యూనిట్‌కు సంబంధించినవి మాత్రమే. మార్కెట్లోకి వచ్చే తుది ఫోన్ పనితీరులో కొంత మార్పు ఉండే అవకాశం ఉంది.
రెండు ఆకర్షణీయమైన కలర్ ఆప్షన్లు
డిజైన్ విషయంలోనూ మోటరోలా ప్రత్యేక శ్రద్ధ తీసుకున్నట్లు తెలుస్తోంది. ఈ ఫోన్ Pantone Coal Smoke, Pantone Capulet Green అనే రెండు కలర్ ఆప్షన్లలో అందుబాటులోకి రానుంది. కోల్ స్మోక్ వేరియంట్‌లో ప్రత్యేకమైన నేసిన వస్త్రం తరహా టెక్స్చర్‌ను అందించనున్నారు. ఇది ఫోన్‌కు మెరుగైన గ్రిప్‌తో పాటు మన్నికను అందించనుంది. మరోవైపు క్యాపులెట్ గ్రీన్ వేరియంట్‌లో బ్రష్డ్ టెక్స్‌టైల్ తరహా ఫినిషింగ్ ఉండనుంది.
ఏడేళ్లపాటు సాఫ్ట్‌వేర్ అప్‌డేట్లు
సాఫ్ట్‌వేర్ సపోర్ట్ విషయంలోనూ మోటరోలా కీలక నిర్ణయం తీసుకుంది. Signature 27 స్మార్ట్‌ఫోన్‌కు ఏకంగా ఏడేళ్లపాటు ఆపరేటింగ్ సిస్టమ్ అప్‌గ్రేడ్‌లను అందించనున్నట్లు ప్రకటించింది. దీంతో ఎక్కువ కాలం కొత్త సాఫ్ట్‌వేర్ ఫీచర్లు, భద్రతా మెరుగుదలలను వినియోగించుకునే అవకాశం ఉంటుంది.
ప్రస్తుతం ఈ ఫోన్ ధర, భారత మార్కెట్లో విడుదలయ్యే తేదీకి సంబంధించిన వివరాలను కంపెనీ వెల్లడించలేదు. నవంబర్ 5న జరిగే గ్లోబల్ లాంచ్ కార్యక్రమంలో ధరతో పాటు పూర్తి ఫీచర్లు, విక్రయాల వివరాలు వెల్లడయ్యే అవకాశం ఉంది. శక్తివంతమైన ప్రాసెసర్, ప్రత్యేకమైన డిజైన్, ఏడేళ్ల సాఫ్ట్‌వేర్ అప్‌డేట్లతో వస్తున్న Motorola Signature 27 ఫ్లాగ్‌షిప్ స్మార్ట్‌ఫోన్ మార్కెట్లో ఎలాంటి ఆదరణ పొందుతుందో చూడాలి.
