US Midterm Elections : అమెరికా అధ్యక్ష ఎన్నికల్లో డొనాల్డ్ ట్రంప్ విజయానికి అండగా నిలిచిన దక్షిణాసియా అమెరికన్లు ఇప్పుడు తమ రాజకీయ వైఖరిని మార్చుకుంటున్నారా? తాజా సర్వే ఫలితాలు అవుననే సంకేతాలిస్తున్నాయి. జాతి వివక్ష, విద్వేషపూరిత దాడులతో విసిగిపోయిన ఈ వర్గం వచ్చే మధ్యంతర ఎన్నికల్లో డెమోక్రటిక్ పార్టీకి మద్దతు ఇచ్చేందుకు మొగ్గు చూపుతున్నట్లు వెల్లడైంది.
అమెరికా రాజకీయాల్లో ఓటర్ల మూడ్ వేగంగా మారుతున్నట్లు కనిపిస్తోంది. ముఖ్యంగా దక్షిణాసియా మూలాలున్న అమెరికన్లలో ట్రంప్ ప్రభుత్వంపై అసంతృప్తి పెరుగుతోందని తాజా సర్వే వెల్లడించింది. గత అధ్యక్ష ఎన్నికల్లో ట్రంప్‌కు మద్దతుగా నిలిచిన ఈ వర్గం.. ఇప్పుడు రిపబ్లికన్ పార్టీకి దూరమవుతున్న సంకేతాలు కనిపిస్తున్నాయి. అమెరికాలో పెరుగుతున్న జాతి వివక్ష, విద్వేష ప్రసంగాలు, మైనారిటీలపై దాడులు ఇందుకు ప్రధాన కారణాలుగా తెలుస్తోంది.
సౌత్ ఏషియన్ అమెరికన్ ఓటర్ ఎంపవర్‌మెంట్ ఆఫ్ టెక్సాస్ ఎడ్యుకేషన్ ఫండ్, యూనివర్సిటీ ఆఫ్ కాలిఫోర్నియా శాన్ డియాగో సంయుక్తంగా నిర్వహించిన సర్వేలో ఆసక్తికర విషయాలు వెల్లడయ్యాయి. ముఖ్యంగా దక్షిణాసియా అమెరికన్లు అధికంగా నివసించే టెక్సాస్‌లో డెమోక్రటిక్ అభ్యర్థులకు గణనీయమైన మద్దతు లభిస్తున్నట్లు సర్వే పేర్కొంది.
యూఎస్ సెనేట్ ఎన్నికల విషయానికి వస్తే.. డెమోక్రటిక్ అభ్యర్థి జేమ్స్ తలారికోకు 66 శాతం మంది మద్దతు ప్రకటించారు. రిపబ్లికన్ అభ్యర్థి కెన్ పాక్స్‌టన్‌కు కేవలం 21 శాతం మంది మాత్రమే అనుకూలంగా ఉన్నారు. గవర్నర్ ఎన్నికల విషయంలోనూ ఇదే తరహా పరిస్థితి కనిపిస్తోంది. డెమోక్రటిక్ అభ్యర్థి గినా హినోజోసాకు 63 శాతం మంది మద్దతు తెలపగా.. రిపబ్లికన్ అభ్యర్థి గ్రెగ్ అబాట్‌కు 27 శాతం మంది మాత్రమే మద్దతు ఇచ్చారు.
ఈ గణాంకాలు టెక్సాస్‌లో డెమోక్రటిక్ పార్టీకి అనుకూలమైన వాతావరణం ఏర్పడుతోందనే అభిప్రాయానికి బలం చేకూరుస్తున్నాయి. అయితే ఇవి దక్షిణాసియా అమెరికన్ ఓటర్ల అభిప్రాయాలను మాత్రమే ప్రతిబింబిస్తాయి. రాష్ట్రవ్యాప్తంగా ఎన్నికల ఫలితాలను ముందుగానే నిర్ధారించలేవు.
ఓటు మార్పు వెనుక అసలు కారణం ఇదేనా?
దక్షిణాసియా అమెరికన్లలో రాజకీయ వైఖరి మారడానికి కేవలం పార్టీలు లేదా అభ్యర్థులపై అభిప్రాయాలే కారణం కావని సర్వే సూచిస్తోంది. తమ రోజువారీ జీవితంలో ఎదురవుతున్న సమస్యలు కూడా వారి నిర్ణయాన్ని ప్రభావితం చేస్తున్నాయి. జాతి వివక్షతో కూడిన దాడులు, విద్వేషపూరిత ప్రసంగాలు, ప్రార్థనా మందిరాలపై దాడులు వంటి ఘటనలు ఈ వర్గంలో ఆందోళన పెంచుతున్నాయి.
అమెరికాలో తమకు భద్రత, సమాన హక్కులు, గౌరవప్రదమైన జీవనం కల్పించే రాజకీయ నాయకులకే మద్దతు ఇస్తామని వారు స్పష్టం చేస్తున్నట్లు సర్వే వెల్లడించింది. వివక్షకు వ్యతిరేకంగా కఠిన చర్యలు తీసుకుంటామని హామీ ఇచ్చే అభ్యర్థుల వైపు మొగ్గు చూపుతున్నారు.
మధ్యంతర ఎన్నికల్లో ట్రంప్‌కు పరీక్ష!
గత ఎన్నికల్లో మద్దతుగా నిలిచిన ఓటర్లలోనే అసంతృప్తి పెరగడం రిపబ్లికన్ పార్టీకి రాజకీయంగా సవాలుగా మారే అవకాశం ఉంది. ముఖ్యంగా టెక్సాస్ వంటి రాష్ట్రాల్లో దక్షిణాసియా అమెరికన్ల ఓటింగ్ సరళి ఎన్నికల ఫలితాలపై ప్రభావం చూపవచ్చు.
అయితే ఈ మద్దతు నిజంగా ఓట్ల రూపంలోకి మారుతుందా? ఎన్నికల సమయానికి ఓటర్ల ప్రాధాన్యతలు ఎలా ఉంటాయి? అన్నది ఆసక్తికరంగా మారింది. మొత్తానికి అమెరికా రాజకీయాల్లో దక్షిణాసియా అమెరికన్లు కీలక ఓటు బ్యాంకుగా ఎదుగుతున్న వేళ.. వారి మారుతున్న వైఖరి ట్రంప్ శిబిరానికి హెచ్చరికగా మారుతోందనే చర్చ మొదలైంది.
