YS Jagan Mohan Reddy: ఎన్నికల కోడ్ అమల్లో ఉన్నప్పుడు ముఖ్యమంత్రి సైతం ఎన్నికల సంఘం నిబంధనలకు అనుగుణంగా నడుచుకుంటారు. ఎందుకంటే ప్రజాస్వామ్యంలో ఎన్నికలు అనేవి అత్యంత ముఖ్యమైనవి. వీటిని పారదర్శకంగా నిర్వహించడానికి ఎన్నికల సంఘం తీవ్రంగా కసరత్తు చేస్తూ ఉంటుంది. ఎవరైనా నోరు జారీ మాట్లాడినా.. ఓటర్లకు డబ్బులు ఇవ్వడానికి ప్రయత్నాలు చేసినా.. ఇంకా అనేక వ్యవహారాలలో ఎన్నికల సంఘం అత్యంత కఠినంగా ఉంటుంది. నిబంధనలు పారదర్శకంగా అమలు చేస్తుంది.
ఎన్నికల కోడ్ అమల్లో ఉన్నప్పుడు నిబంధనలు అతిక్రమించవచ్చు. పోలింగ్ సిబ్బంది విధులకు ఆటంకం కలిగించవచ్చు. ఈ మాట అంటున్నది ఎవరో కాదు మాజీ ముఖ్యమంత్రి జగన్. ఎన్నికల కోడ్ అమల్లో ఉన్నప్పుడు నిబంధనలు పట్టించుకోకుండా.. పోలింగ్ సిబ్బంది విధులకు ఆటంకం కలిగించినందుకు ఎమ్మెల్సీ లేళ్ల అప్పిరెడ్డిని పోలీసులు అరెస్ట్ చేశారు. గుంటూరు జిల్లా పరిధిలోని నల్లపాడు వద్ద స్థానిక సంస్థల పోలింగ్ జరుగుతున్న నేపథ్యంలో బ్యాలెట్ బాక్స్ లను స్ట్రాంగ్ రూమ్ కు తరలిస్తున్న వాహనాన్ని ఆయన అడ్డగించారు. పోలింగ్ సిబ్బంది నుంచి బ్యాలెట్ బాక్స్ లను లాక్కోవడానికి ప్రయత్నించారు. అర్ధరాత్రి రోడ్డుమీద బైఠాయించారు. శాంతిభద్రతలకు విఘాతం కలిగించారు. నేరపూరితమైన చర్యలకు పాల్పడ్డారు ఈ నేపథ్యంలో ఆయనను పోలీసులు అరెస్ట్ చేశారు. కోర్టు రిమాండ్ కు తరలించింది.
అప్పిరెడ్డి అరెస్టుపై జగన్ ఎక్స్ వేదికగా స్పందించారు. ఆయన అరెస్టు ప్రజాస్వామికమని చెప్పారు. ప్రభుత్వం నిర్బంధాలు చేస్తోందని.. ఇది దుర్మార్గం అంటూ చెప్పుకొచ్చారు. నడిరోడ్డు మీద బ్యాలెట్ బాక్స్ లు తరలించడాన్ని ఆయన తప్పు పట్టారు. వాస్తవానికి ఎన్నికల విధుల్లో ప్రభుత్వ ఉద్యోగులు ఉన్నప్పుడు.. వారిని అడ్డగించడం తప్పనే విషయాన్ని జగన్ పూర్తిగా మర్చిపోయారు. అప్పిరెడ్డి రోడ్డు మీద వీరంగం చేసినప్పటికీ సమర్థించారు. పోలీసులు అరెస్ట్ చేయడం తప్పని పేర్కొన్నారు.
ఎన్నికల నిబంధనలు అమల్లో ఉన్నప్పుడు ఉద్యోగులు నిష్పక్షపాతంగా విధులు నిర్వహిస్తున్నారు. బ్యాలెట్ బాక్స్ లకు విఘాతం కలిగిస్తే.. నాన్ బెయిలబుల్ కేసులు నమోదు చేస్తారు. ఒకవేళ ఎన్నికల ప్రక్రియలో అవకతవకలు జరిగాయని తెలిస్తే అధికారులకు ఫిర్యాదు చేయాల్సి ఉంటుంది. అప్పిరెడ్డి ఈ పని చేయకుండా.. కనీస స్పృహని కూడా వదిలేసి రోడ్డు మీద హంగామా చేశారు. బ్యాలెట్ బాక్స్ లను తనిఖీ చేస్తానని ఆయన ఎన్నికల అధికారిలాగా బిల్డప్ ఇవ్వబోయారు. దీనిని టిడిపి నేతలు గుండాయిజం అంటున్నారు పైగా దానిని మాజీ ముఖ్యమంత్రి జగన్ సమర్థించడం విశేషం.
వైయస్సార్‌సీపీ శాసనమండలి సభ్యుడు, పార్టీ ప్రధాన కార్యదర్శి లేళ్ల అప్పిరెడ్డి అక్రమ అరెస్టు, నిర్బంధాన్ని తీవ్రంగా ఖండిస్తున్నాను. ఎన్నికల అక్రమాలను ప్రశ్నిస్తూ పార్టీ అభ్యర్థులతో, ప్రజలతో కలిసి శాంతియుతంగా ఆందోళన చేస్తే, దానిపై తప్పుడు కేసులు పెట్టి, అడ్డగోలుగా అరెస్టు చేసి, నిర్బంధానికి గురిచేయడం దుర్మార్గం. ఎమర్జెన్సీని తలపించే ఈ పాలన అత్యంత హేయం.
గుంటూరు రూరల్‌ మండలం వెంగళాయపాలెంలో గురువారం పరిషత్‌ ఎన్నికల పోలింగ్ ముగిసిన తర్వాత, నేరుగా నాగార్జున వర్శిటీకి చేరాల్సిన బ్యాలెట్ బాక్సులను మధ్యలో నల్లపాడు వద్ద ఎందుకు దింపారు? ఎవరి ఆదేశాలమేరకు ఆ బ్యాలెట్ బాక్సులను దింపారు? అసలు బ్యాలెట్ బాక్సులకు ఉండాల్సిన భద్రత ఏమైంది? స్ట్రాంగ్ రూంకు చేరాల్సిన బ్యాలెట్ బాక్సులు నడిరోడ్డుమీద కనిపిస్తే, కళ్లెదుటే వాటిని రెడ్‌హ్యాండెడ్‌గా పట్టుకుని, శాంతియుతంగా ఆందోళన చేస్తున్న మా పార్టీకి చెందిన కార్యకర్తలు, నాయకులు, ప్రజలమీద లాఠీఛార్జి చేస్తారా? తప్పులు మీరుచేసి, ఏకంగా బ్యాలెట్ బాక్సులు మార్చే ప్రయత్నంచేసి, మళ్లీ మావాళ్లపై అక్రమకేసులా? చివరకు ఒక ఎమ్మెల్సీమీద డెకాయిటీ, దొంగతనం కేసులుకూడా పెడతారా? ఇంతకంటే దుర్మార్గం ఏముంటుంది?
ఈ స్థానిక ఎన్నికల్లో… నామినేషన్లు రిగ్గింగ్, నామినేషన్ల స్క్రూట్నీ రిగ్గింగ్, పోలింగ్ బూత్‌ల రిగ్గింగ్, పోలింగ్ సైక్లింగ్‌, పోలింగ్ పర్సంటేజీల రిగ్గింగ్, చివరకు పోలింగ్ ముగిశాక ఇలా బ్యాలెట్ బాక్సులు కూడా రిగ్గింగ్? చంద్రబాబుగారూ ఈ స్థానిక ఎన్నికల్లో మీరు ఈ రకంగా ప్రజాస్వామ్యాన్ని ఖూనీచేస్తుంటే, ఈ తప్పుల్ని ఎవరైనా ప్రశ్నిస్తే, వారిని అరెస్టు చేసి జైలుకు పంపుతారా? @ncbn గారూ మీ అధికార, పోలీసు బలాన్ని ప్రయోగించి కట్టడిచేయాలని అనుకున్నంత మాత్రాన, మీరు చేసిన ఎన్నికల అక్రమాలు దాచిపెట్టలేరు. మీ అప్రజాస్వామిక పద్ధతులను దేశమంతా చూస్తూనే ఉంది. ప్రజలు చూస్తూ ఊరుకోరు, ఇలాంటి దుర్మార్గాలను సహించరు, మీకు తగిన బుద్ధిచెప్తారు.
#CBNJungleRaj
#SaveDemocracyInAP— YS Jagan Mohan Reddy (@ysjagan) November 7, 2026
