US Iran Tensions : యుద్ధంలో ప్రత్యర్థిని ఎదుర్కోవడం ఒక ఎత్తు.. ఆ దేశ రహస్యాలను తెలుసుకోవడానికి ప్రజలకే భారీ బహుమతులు ప్రకటించడం మరో ఎత్తు. ఇరాన్ అణు కార్యక్రమానికి సంబంధించిన కీలక సమాచారం అందిస్తే ఏకంగా రూ.190 కోట్లకు పైగా ఇస్తామంటూ అమెరికా ప్రకటించడం ఇప్పుడు అంతర్జాతీయంగా చర్చనీయాంశంగా మారింది.
ప్రపంచంలోనే అత్యంత శక్తిమంతమైన దేశంగా చెప్పుకునే అమెరికా.. ఇరాన్ విషయంలో అనుసరిస్తున్న వ్యూహాలు ఇప్పుడు ఆసక్తికర చర్చకు దారితీస్తున్నాయి. ఇరాన్ అణు సామర్థ్యాన్ని దెబ్బతీయాలనే లక్ష్యంతో ముందుకు సాగుతున్న అమెరికా.. తాజాగా మరో అడుగు వేసింది. ఇరాన్ అణు కార్యక్రమానికి సంబంధించిన రహస్య సమాచారాన్ని అందించే వారికి ఏకంగా 20 మిలియన్ డాలర్ల (సుమారు రూ.190 కోట్లకు పైగా) భారీ నగదు బహుమతిని ప్రకటించింది.
రహస్యాలు చెబితే కోట్ల వర్షం!
అమెరికా ప్రభుత్వానికి చెందిన ‘రివార్డ్స్ ఫర్ జస్టిస్’ కార్యక్రమం ద్వారా ఈ ఆఫర్ ప్రకటించినట్లు సమాచారం. ఇరాన్ అణు కార్యక్రమానికి సంబంధించిన కీలక వివరాలు అందించే వారికి ఈ భారీ మొత్తాన్ని బహుమతిగా ఇవ్వనున్నట్లు వెల్లడించింది. అంతేకాదు.. సమాచారం అందించిన వ్యక్తులకు అవసరమైతే మరో దేశానికి తరలించే (రిలొకేషన్) సదుపాయాన్ని కూడా కల్పిస్తామని పేర్కొంది.
ఇరాన్ అణు కేంద్రాలు ఎక్కడ ఉన్నాయి? అక్కడ ఎలాంటి పరికరాలు ఉపయోగిస్తున్నారు? ఈ కార్యక్రమంలో పనిచేస్తున్న శాస్త్రవేత్తలు, ఇతర కీలక వ్యక్తులు ఎవరు? అణు సంబంధిత పరికరాల రవాణా ఎలా జరుగుతోంది? వంటి అంశాలపై సమాచారాన్ని అమెరికా కోరుతున్నట్లు తెలుస్తోంది.
ప్రజల నుంచే సమాచార సేకరణ!
సాధారణంగా దేశాల మధ్య నిఘా వ్యవస్థలు, గూఢచార నెట్‌వర్క్‌లు కీలక సమాచారాన్ని సేకరిస్తుంటాయి. అయితే ఇప్పుడు అమెరికా బహిరంగంగానే భారీ నగదు బహుమతిని ప్రకటించి ఇరాన్ అణు కార్యక్రమంపై సమాచారం కోరడం చర్చకు కారణమైంది. ముఖ్యంగా ఇరాన్ అణు వ్యవస్థలో పనిచేస్తున్న వ్యక్తులు, అక్కడి కార్యకలాపాలపై అవగాహన ఉన్నవారు ముందుకు రావాలని అమెరికా పిలుపునిస్తోంది.
అమెరికా బలహీనతా? వ్యూహాత్మక ఎత్తుగడా?
ఈ ప్రకటనపై సోషల్ మీడియాలో భిన్నాభిప్రాయాలు వ్యక్తమవుతున్నాయి. ప్రపంచ అగ్రరాజ్యంగా చెప్పుకునే అమెరికా.. ఒక దేశ అణు రహస్యాల కోసం ఇంత భారీ బహుమతిని ప్రకటించాల్సిన పరిస్థితి వచ్చిందా? అంటూ కొందరు ప్రశ్నిస్తున్నారు. ఇరాన్‌ను నేరుగా ఎదుర్కోలేక ఇలా ప్రజల ద్వారా సమాచారం సేకరించేందుకు ప్రయత్నిస్తోందంటూ విమర్శిస్తున్నారు.
అయితే దీన్ని అమెరికా బలహీనతగా మాత్రమే చూడలేమని మరికొందరి అభిప్రాయం. సైనిక చర్యలతో పాటు నిఘా సమాచారాన్ని సేకరించడం కూడా ఆధునిక యుద్ధ వ్యూహంలో కీలక భాగమే. ప్రత్యర్థి దేశంలోని కీలక వ్యవస్థలపై సమాచారం సంపాదించడం ద్వారా భవిష్యత్ వ్యూహాలను రూపొందించుకోవచ్చన్నది అమెరికా ఆలోచనగా కనిపిస్తోంది.
ఇరాన్‌పై ఒత్తిడి పెంచే మరో వ్యూహమా?
ఇరాన్ అణు కార్యక్రమం చాలాకాలంగా అమెరికా, పాశ్చాత్య దేశాల ఆందోళనకు కారణమవుతోంది. ఈ నేపథ్యంలో ఆ దేశ అణు సామర్థ్యాన్ని పరిమితం చేయాలనే లక్ష్యంతో అమెరికా దౌత్యపరమైన, ఆర్థికపరమైన, నిఘా సంబంధిత చర్యలను కొనసాగిస్తోంది.
మొత్తానికి ఇరాన్ అణు రహస్యాల కోసం అమెరికా ప్రకటించిన రూ.190 కోట్లకు పైగా బహుమతి ఇప్పుడు చర్చనీయాంశమైంది. ఇది అమెరికా అనుసరిస్తున్న వ్యూహాత్మక ఎత్తుగడా? లేక ఇరాన్ విషయంలో పెరుగుతున్న ఆందోళనకు సంకేతమా? అన్నది అంతర్జాతీయ రాజకీయాల్లో ఆసక్తికర ప్రశ్నగా మారింది.
