Dairy Milk Chocolate: పురుగులతో డైరీ మిల్క్.. విప్పి చూసి షాక్ అయ్యారు

Dairy Milk Chocolate: కలిసొచ్చే కాలానికి.. నడిసొచ్చే కొడుకు పుడతాడో తెలియదు కానీ.. డైరీ మిల్క్ చాక్లెట్ లో మాత్రం పురుగు పుట్టుకొచ్చింది.. పాకురుకుంటూ ముందుకు సాగుతోంది. కొనుగోలు చేసి తిందామనుకున్న వ్యక్తికి షాక్ ఇచ్చింది. హైదరాబాదులో వెలుగు చూసింది ఈ ఘటన. సాధారణంగా డైరీ మిల్క్ చాక్లెట్స్ అంటే ఇష్టపడని వారు ఉండరు. ముఖ్యంగా పిల్లల గురించి చెప్పనక్కర్లేదు. లొట్టలేసుకొని తింటారు.అయితే అలా తిన్న సమయంలో ఒకటికి రెండుసార్లు చూసుకోవాలి. లేకుంటే మనం అనారోగ్యానికి గురికాక తప్పదు. హైదరాబాద్ చెందిన రాబిన్ జాకీస్ కు ఇదే అనుభవం ఎదురయ్యింది.

అమీర్ పేట్ మెట్రో స్టేషన్ లోని ఓ దుకాణం నుంచి క్యాడ్బరీ డైరీ మిల్క్ చాక్లెట్ ను రాబిన్ జాకీస్ కొనుగోలు చేశాడు. దానిని ఓపెన్ చేసినప్పుడు అందులో ఓ పురుగు కదులుతూ కనిపించింది. ఆ విషయాన్ని ప్రస్తావిస్తూ జాకీస్ ఓ వీడియోను ఎక్స్ లో పోస్ట్ చేశాడు. అది ఇప్పుడు సోషల్ మీడియాలో వైరల్ గా మారుతోంది. ఒకసారి జాకీస్ పోస్టును పరిశీలిస్తే..’ అమీర్ పేట మెట్రో స్టేషన్ లోని రత్నదీప్ స్టోర్ లో క్యాడ్బరీ డైరీ మిల్క్ చాక్లెట్ కొన్నా. తినేందుకు ఓపెన్ చేస్తే చాక్లెట్ లో ఒక పురుగు పాకుతున్నట్లు గుర్తించా. గడువు ముగియనున్న ఉత్పత్తుల విషయంలో నాణ్యత తనిఖీలు ఉండవా? ప్రజారోగ్యానికి ఎవరు బాధ్యత వహిస్తారు?’ అంటూ తన ఆవేదనను వ్యక్తం చేశాడు. ఈ పోస్ట్ పై పెను దుమారమే రేగుతోంది. నేటిజెన్లు విభిన్నంగా కామెంట్లు పెడుతున్నారు.

దేశవ్యాప్తంగా రాబిన్ పెట్టిన పోస్ట్ వైరల్ గా మారింది. దీంతో క్యాడ్బరీ డైరీ మిల్క్ సంస్థ స్పందించాల్సిన అనివార్య పరిస్థితి ఎదురైంది. తమ సంస్థ నాణ్యత ప్రమాణాలు పాటిస్తుందని.. మీకుకలిగిన అసౌకర్యానికి చింతిస్తున్నామని.. మీ పేరు, చిరునామా, కొనుగోలు వివరాలను పంపిస్తే.. సమగ్ర విచారణ చేస్తామని.. మీకు ధన్యవాదములు అంటూ సంస్థ ప్రతినిధులు వివరణ ఇచ్చే ప్రయత్నం చేశారు. మొత్తానికైతే ఈ ఘటన దేశవ్యాప్తంగా సోషల్ మీడియాను కుదిపేసింది.