Man catches thieves: దొంగలను పట్టుకుంటాడు. వారు దోచుకున్న సొమ్మును మొత్తం కక్కిస్తాడు. అవసరమైతే వారిని చంపేస్తాడు. ప్రజల ముందు దోషిగా నిలబెడతాడు.. చదువుతుంటే ఎన్నో సినిమాలు గుర్తుకొస్తున్నాయి కదూ. కానీ ఇతగాడు మాత్రం ఆ సినిమాల నుంచి భారీగానే స్ఫూర్తి పొందినట్టు ఉన్నాడు. అందువల్లే సమాజానికి మేలు కలిగించే పని చేస్తున్నాడు. అన్నిటికంటే ముఖ్యంగా దొంగలకు సింహ స్వప్నం లాగా నిలుస్తున్నాడు. ప్రాంతం కాదు.. ఒక రాష్ట్రం కాదు.. ఒక దేశం మొత్తం ఇతడి పేరు పలకరిస్తోంది. కలవరిస్తోంది. సోషల్ మీడియా మొత్తం ఇతడు పేరు మారు మోగిపోతుంది.
మెక్సికో తెలుసు కదా.. అమెరికాకు పక్కనే ఉంటుంది. దక్షిణ అమెరికాలో ఒక దేశం ఇది. గతంలో ఈ దేశంలో మెరుగైన ఉపాధి అవకాశాలుండేవి. ప్రజలు కూడా ఆర్థికంగా స్థిరంగా ఉండేవారు. కానీ కొంతకాలంగా అక్కడి పరిస్థితులు పూర్తిగా మారిపోతున్నాయి. ఉపాధి అవకాశాలు తగ్గిపోతున్నాయి. దీంతో చాలామంది డబ్బు కోసం రకరకాల దుర్మార్గాలకు పాల్పడుతున్నారు. దొంగతనాలు కూడా చేస్తున్నారు. ఇటీవల కాలంలో మెక్సికో దేశంలో ద్విచక్ర వాహనాలను దొంగిలించే వారి సంఖ్య పెరిగిపోయింది. సైడ్ లాక్ వేసినప్పటికీ.. దానిని అత్యంత చాకచక్యంగా తీస్తూ ద్విచక్ర వాహనాలను దొంగలు తస్కరిస్తున్నారు. ఆ తర్వాత ఆ వాహనాలను బ్లాక్ మార్కెట్లో అమ్మేస్తున్నారు.
ఇటీవల కాలంలో ద్విచక్ర వాహనాల దొంగతనాలపై పోలీసులకు ఫిర్యాదులు పెరిగిపోయాయి. పోలీసులు గస్తి కాస్తున్నప్పటికి దొంగలు దొరకడం లేదు. అయితే ఇటువంటి దొంగలకు ఒక వ్యక్తి సింహ స్వప్నం లాగా నిలుస్తున్నాడు. నిలవడం మాత్రమే కాదు దొంగలను అక్కడికక్కడే పట్టుకుంటూ.. దేహ శుద్ధి చేస్తున్నాడు. అంతేకాదు వారి దొంగిలించిన బైక్లను కూడా అక్కడే ఉంచి.. దొంగలకు అసలు సిసలైన శిక్ష విధిస్తున్నాడు.
మెక్సికో దేశంలో దొంగతనాలు భారీగా జరుగుతున్న నేపథ్యంలో.. వారిని బ్యాట్మన్ అవతారంలో ఉన్న వ్యక్తి పట్టుకుంటున్నాడు. పట్టుకోవడం మాత్రమే కాదు.. వారిని స్తంభాలకు కట్టేసి.. చుట్టూ టేపు చుట్టేస్తున్నాడు. వారు దొంగిలించిన ద్విచక్ర వాహనాలను అక్కడే ఉంచి.. ప్రజలకు తెలిసేలా చేస్తున్నాడు. అంతమంది పోలీసులు ఉన్నప్పటికీ ఈ దొంగలను పట్టుకోలేకపోయారు. కానీ ఆ బ్యాట్మన్ మాత్రం కేవలం 10 రోజుల్లోనే ఐదుగురిని పట్టుకున్నాడు. మెక్సికోలోని మోరెనో ప్రాంతంలో ఈ బ్యాట్మన్ స్టోరీ సంచలనం కలిగిస్తోంది.. అతడిని అక్కడ జనాలు బ్యాట్మన్ అని పిలుస్తున్నారు. మాకోసం వచ్చిన గొప్ప వీరుడు అంటూ పేర్కొంటున్నారు. కానీ పోలీసులు మాత్రం అతడి గురించి తెగ శోధిస్తున్నారు. తాము చేయాల్సిన పని అతడు చేయడంతో.. తమకు పని లేకుండా పోయిందని వారు వాపోతున్నట్టు తెలుస్తోంది.
