Dadi Veerabhadra Rao: ఉత్తరాంధ్ర సీనియర్ నేత, మాజీ మంత్రి దాడి వీరభద్రరావు వైసీపీకి దూరమయ్యారా? లేకుంటే నాయకత్వమే ఆయనకు దూరం పెట్టిందా? పొలిటికల్ సర్కిల్లో ఇదే చర్చ నడుస్తోంది. తెలుగుదేశం పార్టీ నుంచి రాజకీయ అరంగేట్రం చేసిన ఈ హిందీ మాస్టర్ సుదీర్ఘకాలం అనకాపల్లి ఎమ్మెల్యేగా పనిచేశారు.మంత్రిగా కూడా పదవి బాధ్యతలు చేపట్టారు. తెలుగుదేశం పార్టీ అధికారంలో లేకపోయినా దాడి వీరభద్ర రావు కు మాత్రం చంద్రబాబు అరుదైన గౌరవం ఇస్తూ వచ్చారు. కానీ శాసనమండలి పదవి ఇవ్వలేదన్న సాకు చూపి ఆయన వైసీపీలో చేరిపోయారు. 2014 ఎన్నికలకు ముందు తెలుగుదేశం పార్టీతో ఉన్న సుదీర్ఘ బంధాన్ని తెంచుకున్నారు.
రాజకీయ నాయకుడిగానే కాకుండా.. హిందీ భాష పండితుడిగా వీరభద్రరావుకు పేరు ఉంది. టిడిపి అధికార ప్రతినిధిగా ప్రత్యర్థులపై విమర్శలు ఓ రేంజ్ లో సంధించేవారు. అయితే ఆది నుంచి దాడి వీరభద్ర రావు ది విలక్షణ శైలే. టిడిపి సంక్షేప సమయంలో ఎన్టీఆర్కు అండగా నిలబడిన 30 మంది ఎమ్మెల్యేల్లో దాడి వీరభద్రరావు ఒకరు. అప్పట్లో చంద్రబాబు మంత్రి పదవి ఆఫర్ చేసినా వెళ్లలేదని టాక్ నడిచింది. అయితే అక్కడికే కొన్నాళ్లకు దాడి వీరభద్రరావు చంద్రబాబు గూటికి చేరారు. 2010 వరకు ఆ పార్టీలోనే పనిచేశారు.
2014 ఎన్నికలకు ముందు వైసీపీలో చేరారు. కానీ దాడి వీరభద్రరావు సీనియారిటీ కి తగ్గట్టు పార్టీలో గౌరవం దక్కలేదు. గత ఎన్నికల్లో అనకాపల్లి ఎమ్మెల్యే సీటును గుడివాడ అమర్నాథ్ ఇచ్చిన జగన్.. దాడి వీరభద్రరావు తనయుడు రత్నాకర్ కు విశాఖ నగరంలోని పశ్చిమ నియోజకవర్గాన్ని కేటాయించారు. కానీ రత్నాకర్ ఓడిపోయారు. అప్పటినుంచి తండ్రీ కొడుకులకు పెద్దగా గౌరవం లభించడం లేదు. అందుకే వ్యూహాత్మకంగా దాడి వీరభద్రరావు మౌనం పాటిస్తున్నట్లు తెలుస్తోంది. అయితే ఇప్పుడు ఎన్నికలు సమీపిస్తుండడంతో యాక్టివ్ కావాలని భావిస్తున్నారు. అయితే సీఎం జగన్ వైఖరి ఆయనకు నచ్చడం లేదు. అలాగని మాతృ పార్టీ టిడిపికి వెళ్లే పరిస్థితి లేదు. ఈ తరుణంలో ఆయన జనసేన వైపు చూస్తున్నట్లు ప్రచారం జరుగుతోంది.
దాడి వీరభద్రరావు సీనియర్ నాయకుడు కావడంతో పవన్ కు ఆయనపై ప్రత్యేకమైన అభిమానం ఉంది. గతంలో ఓసారి నేరుగా దాడి వీరభద్ర రావునే పవన్ కళ్యాణ్ కలిశారు. మర్యాదపూర్వకంగా భేటీ అయ్యారు. విలువైన సలహాలు, సూచనలు తీసుకున్నారు. అప్పటి నుంచే దాడి వీరభద్రరావు జనసేనలో చేరుతారని ప్రచారం జరిగింది. కానీ ఎందుకో ఆయన వెనక్కి తగ్గారు. ఇప్పుడు ఎన్నికలు సమీపిస్తుండడంతో ఆయన జనసేనలో చేరడానికి సన్నాహాలు చేసుకుంటున్నారని ప్రచారం జరుగుతోంది. అతి త్వరలో ఆయన కుమారుడితో పాటు పవన్ గూటికి చేరతారని తెలుస్తోంది. అందులో ఎంతవరకు వాస్తవం ఉందో చూడాలి.
