Mamata Banerjee latest political setback: ఐదు రాష్ట్రాల అసెంబ్లీ ఎన్నికల్లో బీజేపీ గ్రాండ్ విక్టరీ కొట్టింది. మూడు రాష్ట్రాల్లో జయకేతనం ఎగురవేసింది. బెంగాల్లో గెలిచి చరిత్ర సృష్టించింది. మమతాబెనర్జీ కంచుకోటకు బీటలు వారేలా చేసింది. ఎన్నికల ఫలితాల తర్వాత బెంగాల్లో తృణమూల్ కాంగ్రెస్ ఎదుర్కొంటున్న పరిస్థితి ఒక సాధారణ ఎన్నికల పరాజయం కాదు. ఇది మమతా బెనర్జీ చుట్టూ నిర్మితమైన రాజకీయ ప్రతిష్ఠకు వచ్చిన గట్టి పరీక్ష అదే సమయంలో పార్టీ అంతర్గత క్రమశిక్షణ ఎంత బలహీనంగా మారిందో కూడా బయటపెడుతోంది. ఎన్నికల్లో అధికారాన్ని కోల్పోవడం ఏ పార్టీకైనా పెద్ద దెబ్బే. కానీ దాని తర్వాత జరిగిన ఎమ్మెల్యేల గైర్హాజరు, అసమ్మతి వార్తలు, ఫిరాయింపుల భయం ఇవన్నీ కలిస్తే, సమస్య ఓటమితో ఆగిపోదు. అది నమ్మక సంక్షోభంగా మారుతుంది. నాయకత్వం మీద విశ్వాసం నిలవకపోతే, సీట్ల సంఖ్య కంటే ఎక్కువ నష్టం జరుగుతుంది.
వరుస ఎదురు దెబ్బలు..
మమతా బెనర్జీ రాజకీయాల్లో ఎప్పుడూ సంక్షోభాలను అవకాశాలుగా మలచుకున్న నేతగానే గుర్తింపు పొందారు. కానీ ఈసారి ఎదురవుతున్న సమస్యలు వేరే రకం. ప్రత్యర్థి పార్టీల బలం మాత్రమే కాదు, సొంత శిబిరంలో సడలుతున్న ఐక్యత కూడా ఆమెకు పెద్ద సవాలుగా మారింది. సమావేశానికి హాజరుకాకపోయిన ఎమ్మెల్యేల అంశాన్ని కేవలం షెడ్యూల్ సమస్యగా తీసుకోవడం సరైన విశ్లేషణ కాదు. ఓటమి తర్వాత పార్టీ భవిష్యత్పై సందేహాలు మొదలైన వేళ, ఇలాంటి గైర్హాజరు రాజకీయ సంకేతంగానే చదవాలి. అది నాయకత్వానికి ఇచ్చిన మౌన హెచ్చరిక కావచ్చు, లేదా కనీసం పార్టీ లోపలి అసంతృప్తికి ప్రతీక కావచ్చు.
బీజేపీలోకి వలసలు..
ఇక బీజేపీ వైపు వలసల చర్చ టీఎంసీకి మరింత ప్రమాదకరం. ఒక పార్టీ ఓటమి తర్వాత తన శ్రేణులను కాపాడుకోలేకపోతే, ప్రత్యర్థికి అది అదనపు బలం అవుతుంది. రాజకీయాల్లో గెలుపు ఓటముల కంటే ముఖ్యమైనది కేడర్ నమ్మకం. ఆ నమ్మకం దెబ్బతిన్నప్పుడు పార్టీ భవిష్యత్ కూడా కుదేలవుతుంది.
అసంతృప్త స్వరాలు..
మమతకు ఇప్పుడు అవసరమైనది రక్షణాత్మక భాష కాదు, పునర్నిర్మాణ దక్కోణం. తప్పును అంగీకరించడం, అసంతృప్త స్వరాలను వినడం, సంస్థాగత నియంత్రణను పునరుద్ధరించడం ఆమె ముందు ఉన్న అసలైన మార్గం. లేకపోతే, ఒకప్పుడు అప్రతిహతంగా కనిపించిన టీఎంసీ, లోపలి బీటల వల్ల మరింత బలహీనపడే అవకాశం ఉంటుంది.
ఇది మమతా బెనర్జీకి ముగింపు అన్న నిర్ధారణ కాదు.. కానీ ఆమె రాజకీయ జీవనంలో అత్యంత కఠినమైన పునఃపరీక్ష మాత్రం ఖచ్చితంగా. ఇప్పుడు ఆమె ఎదుర్కోవాల్సింది ప్రతిపక్షం కాదు, సొంత పార్టీలో చెలరేగిన అనిశ్చితి.
