Chandrababu Jail: ఏపీ స్కిల్ డెవెలప్మెంట్ స్కామ్ కేసులో మాజీ సీఎం, టీడీపీ అధినేత చంద్రబాబు నాయుడును ఏపీ సీఐటీ అరెస్టు చేసి కోర్టులో ప్రవేశపెట్టగా న్యాయమూర్తి రిమాండ్ విధించారు. దీంతో పోలీసులు బాబును రాజమండ్రి సెంట్రల్ జైలుకు తరలించారు. అయితే కోర్టు ఆదేశాలతో ఆయనకు జైలులో స్పెషల్ క్లాస్ కేటగిరీ వసతులు కల్పించారు. జైలులో చంద్రబాబుకు రిమాండ్ ఖైదీగా 7691 నంబర్ కేటాయించారు. ఈ నేపథ్యంలో అసలు ఖైదీలకు నంబర్లు ఎలా కేటాయిస్తారు? చంద్రబాబు నాయుడుకి 7691 అనే నంబర్ ఎలా ఇచ్చారు? అనే చర్చ జరుగుతోంది. ఇందుకు కారణం లేకపోలేదు. బాబుకు అంతగా అచ్చిరాని 23(7+6+9+1=23) నంబర్ రావడమే.
నంబర్ ఎలా కేటాయిస్తారంటే..
ఒక వ్యక్తికి రిమాండ్ లేదా శిక్ష విధించిన అనంతరం ఆ వ్యక్తిని జైలుకు తరలిస్తారు. ఆ తరువాత ఆ ఖైదీకి నంబర్ కేటాయిస్తారు. జైలులో నంబరు కేటాయించే పద్ధతి వరుస సంఖ్య ప్రకారం ఉంటుంది. ఖైదీలను ప్రధానంగా 4 రకాలుగా వర్గీకరిస్తారు.
1. రిమాండ్ ప్రిజనర్స్ ఈ ఖైదీలకు కేటాయించే నంబర్ రికార్డులో ఆర్పీ అనే లెటర్స్ తర్వాత ఉంటుంది.
2. కన్విక్టెడ్ ప్రిజనర్స్ కేటాయించే నంబర్ రికార్డులో íసీపీ అనే లెటర్స్ తర్వాత ఉంటుంది.
3. డిటెన్యూ ప్రిజనర్స్ అని కలెక్టర్ లేదా ఆర్డీవో లేదా తహసీల్దార్ రిమాండ్ చేసిన వారిని డిటెన్యూ ప్రిజనర్స్ అని పిలుస్తారు.
4. విమెన్ ప్రిజనర్స్ అంటే మహిళా ఖైదీలు.
ఈ నాలుగు కేటగిరీల క్రిందనే ఖైదీలకు నంబర్లు కేటాయిస్తున్నారు. ఇక నంబర్ ఎలా ఇస్తారంటే.. జైలు ఏర్పటు చేసినప్పటి నుంచి వస్తున్న ఖైదీల క్రమ సంఖ్య ఆధారంగా ఆయా కేటగిరీల క్రింద నంబర్ కేటాయిస్తారని తెలంగాణ జైళ్ల శాఖ మాజీ డీఐజీ తెలిపారు.
రిమాండ్ ఖైదీ అంటే..
ఇక రిమాండ్ ఖైదీ అంటే, ‘నేరారోపణలు ఎదుర్కొంటున్న వ్యక్తి పై తగిన ఆధారం దొరికినపుడు పోలీసులు ఆ వ్యక్తిని అరెస్టు చేసి కోర్టులో లేదా మేజిస్ట్రేట్ ముందు ప్రవేశపెడతారు’ ఇలా చేయడాన్ని రిమాండ్ అంటారు. కోర్టులో జడ్జి జ్యుడీషియల్ రిమాండ్ విధిస్తే ఆ వ్యక్తిని జైలుకు తరలిస్తారని బీబీసీతో తెలంగాణ హైకోర్టు సీనియర్ లాయర్ చింతపల్లి లక్ష్మీనారాయణ చెప్పారు. జైలు ప్రారంభించినప్పటి నుంచి వస్తున్న క్రమసంఖ్య ఆధారంగా చంద్రబాబు నాయుడికి రిమాండ్ ఖైదీ నంబర్ 7691 కేటాయించారని తెలుస్తోంది.
