Soumya Rao: రష్మీ ప్లేస్ లో జబర్దస్త్ యాంకర్ గా వచ్చిన సౌమ్య రావు ఎవరు?

Soumya Rao: జబర్దస్త్ షోకి ఉన్న పాపులారిటీ రీత్యా అక్కడ జరిగే ప్రతి చిన్న మార్పు న్యూస్ అవుతుంది. యాంకర్స్, జడ్జెస్ మార్పు కొత్తవారి ఎంట్రీ గురించి మరింత ప్రాధాన్యత సంతరించుకుంటుంది. అనసూయ జబర్దస్త్ మానేయడం పెద్ద న్యూస్ అయ్యింది. ఇక అనసూయ వెళ్ళిపోయాక జబర్దస్త్, ఎక్స్ట్రా జబర్దస్త్ షోస్ కి రష్మీ గౌతమ్ నే యాంకర్ గా వ్యవహరిస్తున్నారు కారణం తెలియదు కానీ సడన్ గా జబర్దస్త్ కోసం రష్మీ స్థానంలో కొత్త అమ్మాయిని దించారు. అంటే రష్మీని ఎక్స్ట్రా జబర్దస్త్ కి పరిమితం చేశారు. నవంబర్ 10 ఎపిసోడ్ నుండి ఈ కొత్త యాంకర్ సందడి చేయనున్నారు. దీనికి సంబంధించిన ప్రోమో విడుదల చేయగా ఆ కొత్త యాంకర్ పేరు సౌమ్య రావు అని తేలింది.

ఈ క్రమంలో ఎవరీ సౌమ్య రావు. ఆమె నేపథ్యం ఏమిటి? అనే ఆత్రుత అందరిలో మొదలైంది. ఆమె డీటెయిల్స్ పరిశీలిస్తే.. అసలు పేరు సౌమ్య శారద. కర్ణాటక రాష్ట్రంలోని శివమొగ్గ సొంత ఊరు. నటనపై మక్కువతో మోడలింగ్ కెరీర్ గా ఎంచుకున్నారు. ఒక న్యూస్ ఛానల్ లో యాంకర్ గా కెరీర్ మొదలుపెట్టారు. మెల్లగా సీరియల్స్ వైపు అడుగులు వేశారు. సీరియల్స్ ఎక్కువగా చూసేవారికి సౌమ్య ముఖం పరిచయమే. కన్నడ సీరియల్ ‘పత్తేదారి ప్రతిభ’ సీరియల్ తో గుర్తింపు తెచ్చుకున్నారు.

తెలుగులో ఈటీవీలో ప్రసారమైన శ్రీమంతుడు సీరియల్ లో సౌమ్య రావు నటించారు. అలాగే తమిళంలో అనేక సీరియల్స్ లో ఈమె ప్రధాన పాత్రలు చేయడం జరిగింది. మెజారిటీ సీరియల్స్ లో సౌమ్య రావు విలన్ రోల్స్ చేశారు. తమిళ డబ్బింగ్ సీరియల్స్ మనసిచ్చి చూడు, హిట్లర్ గారి పెళ్ళాం సీరియల్స్ లో నటించారు. ఇటీవల జరిగిన ఈ టీవీ 27వ యానివర్సరీ ఈవెంట్లో సౌమ్య హైలైట్ అయ్యారు. ఆదిపై వరుస పంచ్లు కురిపించి అందరి కంట్లో పడ్డారు. ఆమెను జబర్దస్త్ యాంకర్ గా నియమించడానికి ఇది కూడా ఒక కారణం.

అయితే ఈ షోకి యాంకర్ గా రావడం పెద్ద ఛాలెంజ్. ఆడియన్స్ నుండి చాలా అంచనాలు ఉంటాయి. ఆ అంచనాలు అందుకోగలగాలి. గ్లామర్ తో పాటు కామెడీ టైమింగ్ చాలా అవసరం. అనసూయ, రష్మీ ఒక బెంచ్ మార్క్ సెట్ చేశారు. దీంతో ఆడియన్స్ వాళ్లతో పోల్చుకుంటారు. వాళ్ళను మరిపించి తన మార్క్ క్రియేట్ చేసినప్పుడు మాత్రమే ప్రశంసలు దక్కుతాయి. గతంలో ఒకరిద్దరు జబర్దస్త్ యాంకర్స్ గా వచ్చి సక్సెస్ కాక మధ్యలో వెళ్లిపోయారు. మరి సౌమ్య ఎంత ప్రభావం చూపిస్తుందో చూడాలి .