Actor Darshan
Actor Darshan: తన ప్రియురాలికి అసభ్యకరమైన సందేశాలు పంపుతున్నాడని, బెదిరింపులకు పాల్పడుతున్నాడని భావిస్తూ రేణుకా స్వామి అనే వ్యక్తిని కన్నడ నటుడు దర్శన్ హత్య చేయించిన సంగతి తెలిసిందే. ఇందులో స్వయంగా అతడు పాల్గొన్నాడని, రేణుకా స్వామిని తీవ్రంగా కొట్టాడని ఆరోపణలు వినిపిస్తున్నాయి. దీంతో దర్శన్ ను, ఈ కేసులో ప్రమేయం ఉన్న పలువురిని పోలీసులు ఇప్పటికే అరెస్టు చేశారు. కేసును ప్రత్యేక బృందంతో దర్యాప్తు చేస్తున్నారు. రేణుకా స్వామి హత్యకు సంబంధించి రోజుకో కొత్త విషయం వెలుగులోకి వస్తుండగా.. దర్శన్, పవిత్రల మధ్య కూడా సరికొత్త విషయాలు బయటపడుతున్నాయి.
రేణుకా స్వామి హత్య కేసులో సీనియర్ అధికారులు పవిత్రను దర్శన్ రెండో భార్యగా చెబుతున్నారు. వాస్తవానికి దర్శన్ పవిత్ర గౌడ్ ను పెళ్లి చేసుకోలేదని తెలుస్తోంది. అదే విషయాన్ని దర్శన్ తరపు న్యాయవాది అనిల్ బాబు స్పష్టం చేశారు. దీంతో కన్నడ నాట తీవ్ర చర్చ జరుగుతోంది..” వారిద్దరూ తోటి నటులు మాత్రమే. ఇద్దరి మధ్య స్నేహం మాత్రమే ఉంది. పెళ్లి చేసుకున్నట్టు నిరూపించే పత్రాలు ఏవీ లేవు. కొంతమంది మీడియా ప్రతినిధులు పవిత్రను దర్శన్ భార్యగా చూపిస్తున్నారు. దీనివల్ల ఆయన భార్య విజయలక్ష్మి తీవ్రంగా బాధపడుతున్నారు.. అవమానభారంతో ఆమె బయటికి కూడా వచ్చేందుకు ఇష్టపడటం లేదు. ఏకైక కుమారుడు తన స్నేహితుల ముందు ముఖం చూపించుకోలేకపోతున్నాడని” లాయర్ అనిల్ బాబు చెబుతున్నారు.
మరోవైపు రేణుకా స్వామి హత్య కేసులో పవిత్ర గౌడ్ మేనేజర్ దేవరాజ్ ను పోలీసులు అరెస్టు చేశారు. రేణుకా స్వామిని హత్య చేసినట్టు భావిస్తున్న కారు షెడ్ ప్రాంతంలోకి దేవరాజ్ కూడా వెళ్లినట్టు పోలీసులు సిసి ఫుటేజ్ ద్వారా గుర్తించారు. అనంతరం పోలీసులు దర్శన్, పవిత్ర గౌడ్ ఇళ్లకు వెళ్లి పంచనామా నిర్వహించారు. హత్యకు ముందు రేణుకాస్వామిని పవిత్ర చెప్పుతో కొట్టినట్టు నిర్ధారించుకున్నారు. ఆమె కొట్టిన చెప్పులను కూడా పోలీసులు స్వాధీనం చేసుకున్నారు. కాగా, రేణుకా స్వామి ని హత్య చేసిన తర్వాత దర్శన్ పవిత్రను కొట్టాడని.. నీవల్లే ఇదంతా జరిగిందని అన్నాడని ప్రచారం జరుగుతోంది. మరోవైపు పవిత్ర దర్శన్ తో ఉన్న బంధాన్ని పలుమార్లు బయటపెట్టింది. సోషల్ మీడియాలో వారిద్దరూ దిగిన ఫోటోలను పోస్ట్ చేసింది. పైగా తమ బంధానికి 10 సంవత్సరాలు నిండాయని పేర్కొంది. వీటిని కూడా పోలీసులు ఆధారాలుగా చూపుతున్నారు.
