Yasho Sagar : ఒక హీరో కి అయినా , హీరోయిన్ కి అయినా కేవలం ఒకటి రెండు సినిమాలతో కలలో కూడా ఊహించని గుర్తింపు దక్కడం అనేది ఒక అదృష్టం. పదుల సంఖ్యలో సినిమాలు చేసిన , ఎన్నో ఏళ్ళ అనుభవం ఉన్న హీరోలు కూడా సాధించలేని ఫేమ్ ని కొంతమంది కేవలం ఒక్క సినిమా తోనే సంపాదిస్తూ ఉంటారు. అలాంటి హీరోల్లో ఒకరు యశో సాగర్. ఈ పేరు నేటి తరం ప్రేక్షకులకు పెద్దగా తెలియక పోవచ్చు. కానీ ‘ఉల్లాసంగా ఉత్సాహంగా’ మూవీ హీరో అంటే అందరూ గుర్తుపడతారు. కరుణాకరన్ దర్శత్వం లో తెరకెక్కిన ఈ సినిమా ఆరోజుల్లో కమర్షియల్ గా పెద్ద బ్లాక్ బస్టర్. ఒక కొత్త హీరో ఈ రేంజ్ బ్లాక్ బస్టర్ కొట్టేసరికి ఆరోజుల్లో అందరి చూపు ఈ కుర్ర హీరో మీదకు మరలింది.
నటన పరంగా కూడా మొదటి సినిమాతోనే మంచి మార్కులు కొట్టేసాడు. ఎవరీ అబ్బాయి , చాలా చురుగ్గా ఉన్నాడే, కచ్చితంగా భవిష్యత్తులో పెద్ద రేంజ్ కి వెళ్లాడని అంతా అనుకున్నారు. మొదటి సినిమాతోనే పెద్ద బ్లాక్ బస్టర్ కొట్టడం తో , ఈ యువ హీరో ఇంటి చుట్టూ అప్పట్లో నిర్మాతలు తిరిగేవారు. అతి తక్కువ సమయం లోనే వెండితెర పై ఒక వెలుగు వెలిగే అద్భుతమైన అవకాశం ఈ హీరో కి వచ్చింది. కానీ మనం ఒకటి తలిస్తే , దేవుడు ఒకటి తలుస్తాడు , ఆయన రాసిన ఆ తలరాత ని ఎవ్వరూ మార్చలేరు. అలా పాపం ఈ యువ హీరో గత జన్మలో ఏమి పాపం చేసాడో ఏమో తెలియదు కానీ , దేవుడు సక్సెస్ రుచి చూపించి దాన్ని ఎంజాయ్ చేసేలోపే తన దగ్గరకు తీసుకెళ్లిపోయాడు . 2012 వ సంవత్సరం , డిసెంబర్ 19 న రాత్రి జరిగిన ఒక రోడ్డు ప్రమాదం లో యశో సాగర్ చనిపోయారు.
తన స్నేహితులు విశ్వనాధ్ రెడ్డి , లోకేష్ లతో కలిసి పుణెకు కాస్ట్యూమ్స్ కోసం వెళ్లిన యశో సాగర్ , తిరిగి రిటర్న్ అవుతున్న సమయం లో, కర్ణాటక లోని తుముకూరు దగ్గర తెల్లవారు జామున జరిగిన రోడ్డు ప్రమాదం లో అక్కడికక్కడే చనిపోయారు. ఆరోజుల్లో ఈ హీరో మరణ వార్త విని కోట్లాది మంది సినీ అభిమానులు తీవ్రమైన విచారం వ్యక్తం చేశారు. యశో సాగర్ కన్నడ నిర్మాత బీపీ సోము కొడుకు. తన కొడుకుని ‘ఉల్లాసంగా ఉత్సాహంగా’ అనే చిత్రం తో వెండితెర కి పరిచయం చేశారు. కేవలం నాలుగు కోట్ల రూపాయిల బడ్జెట్ తో తెరకెక్కిన ఈ సినిమా, ఆరోజుల్లోనే 16 కోట్ల రూపాయిల షేర్ వసూళ్లను రాబట్టి సంచలనం సృష్టించింది. ఈ సినిమా తర్వాత మిస్టర్ ప్రేమికుడు అనే చిత్రం లో నటించారు యశో సాగర్. కానీ ఈ సినిమా విడుదలకు ముందే చనిపోవడం దురదృష్టకరం.
