Bajaj Pulsar NS400Z : ప్రముఖ ద్విచక్ర వాహన తయారీ సంస్థ బజాజ్ ఆటో తన ప్రీమియం పల్సర్ లైనప్‌లో మరో కీలక అప్‌డేట్ తీసుకొచ్చింది. బజాజ్ పల్సర్ NS400Zను కొత్త 5-అంగుళాల TFT ఇన్‌స్ట్రుమెంట్ కన్సోల్‌తో అప్‌డేట్ చేసి భారత మార్కెట్లో విడుదల చేసింది. ఈ కొత్త వెర్షన్ ఎక్స్‌షోరూమ్ ఢిల్లీ ధర రూ.1.90 లక్షలుగా ఉంది. ఇప్పటివరకు అందుబాటులో ఉన్న మోడల్‌తో పోలిస్తే కొత్త అప్‌డేట్ కారణంగా ధర రూ.4,000 పెరిగింది.
కొత్త TFT కన్సోల్ గతంలో ఉన్న బాండెడ్-గ్లాస్ కలర్ LCD యూనిట్ స్థానాన్ని భర్తీ చేసింది. దీంతో NS400Zలో టెక్నాలజీ, కనెక్టివిటీ ఫీచర్లు మరింత మెరుగయ్యాయి. ఇందులో USB Type-C ఛార్జింగ్ పోర్టుతో పాటు పానిక్ బ్రేక్ అలర్ట్ సిస్టమ్‌ను కూడా బజాజ్ అందించింది. హఠాత్తుగా గట్టిగా బ్రేక్ వేసినప్పుడు ఈ వ్యవస్థ ఆటోమేటిక్‌గా బైక్ హజార్డ్ లైట్లను యాక్టివేట్ చేస్తుంది.
ఇంజిన్‌లో మార్పుల్లేవ్
కొత్త అప్‌డేట్‌లో భాగంగా బజాజ్ NS400Z ఇంజిన్ లేదా మెకానికల్ విభాగంలో ఎలాంటి మార్పులు చేయలేదు. ఇదే 349cc సింగిల్ సిలిండర్, లిక్విడ్ కూల్డ్ ఇంజిన్ కొనసాగుతుంది. ఈ ఇంజిన్ 9,000rpm వద్ద 40hp గరిష్ఠ పవర్, 7,500rpm వద్ద 33Nm టార్క్‌ను ఉత్పత్తి చేస్తుంది. ఇంజిన్‌కు 6-స్పీడ్ గేర్‌బాక్స్‌ను జత చేశారు.
బైక్‌లో 43mm USD ఫ్రంట్ ఫోర్క్, డ్యూయల్ ఛానల్ ABS వంటి ఫీచర్లు కొనసాగుతున్నాయి. అలాగే ఎలక్ట్రానిక్ థ్రాటిల్ బాడీ, నాలుగు రైడ్ మోడ్స్, ట్రాక్షన్ కంట్రోల్, రేడియల్ టైర్లు కూడా యథాతథంగా ఉన్నాయి. NS400Z కెర్బ్ వెయిట్ 176 కిలోలు కాగా.. గరిష్ఠ వేగం గంటకు 157 కిలోమీటర్లుగా బజాజ్ పేర్కొంది.
స్మార్ట్ కనెక్టివిటీ ఫీచర్లు
కొత్త 5-అంగుళాల TFT డిస్‌ప్లే బజాజ్ పల్సర్ సిరీస్‌లో క్రమంగా అందిస్తున్న అదే టెక్నాలజీ ఆధారంగా రూపొందింది. ఇది బ్లూటూత్ ద్వారా స్మార్ట్‌ఫోన్‌కు కనెక్ట్ అవుతుంది. గూగుల్ మ్యాప్స్ మిర్రరింగ్ ద్వారా టర్న్-బై-టర్న్ నావిగేషన్‌ను డిస్‌ప్లేలోనే చూసుకోవచ్చు.
అంతేకాకుండా మ్యూజిక్ కంట్రోల్, డాక్యుమెంట్ స్టోరేజ్, ల్యాప్ టైమర్ వంటి ఫీచర్లు కూడా అందుబాటులో ఉన్నాయి. కొత్త TFT ఇంటర్‌ఫేస్ ద్వారా రైడర్లు నాలుగు రైడ్ మోడ్స్‌ను యాక్సెస్ చేయడంతో పాటు ట్రాక్షన్ కంట్రోల్‌ను కూడా నిర్వహించవచ్చు.
పల్సర్ NS400Zలో ఇప్పటికే ఉన్న స్పోర్టీ డిజైన్, పనితీరు లక్షణాలను అలాగే కొనసాగిస్తూ టెక్నాలజీ, కనెక్టివిటీ విషయంలో ఈ అప్‌డేట్‌ను తీసుకొచ్చినట్లు బజాజ్ తెలిపింది. మొత్తంగా చూస్తే రూ.4,000 అదనపు ధరకు కొత్త TFT డిస్‌ప్లే, USB Type-C పోర్ట్, పానిక్ బ్రేక్ అలర్ట్ వంటి ఫీచర్లు లభించడం ఈ ప్రీమియం పల్సర్‌కు అదనపు ఆకర్షణగా చెప్పవచ్చు.
