Chandrababu Naidu: అప్పట్లో టెక్నాలజీ స్థాయిని గుర్తించి దానికి ప్రోత్సాహం అందించారు చంద్రబాబు. ఆ సమయంలో ఆయనను చాలా మంది విమర్శించారు. వ్యవసాయాన్ని నిర్లక్ష్యం చేస్తున్నారని మండిపడ్డారు. కానీ జోడు ఎద్దుల బండి లాగా వ్యవసాయాన్ని.. టెక్నాలజీని చంద్రబాబు ఏకీకృతం చేశారు. చాలామంది చంద్రబాబు విమర్శించారు గాని.. చంద్రబాబు తీసుకున్న నిర్ణయాలు నేడు రెండు తెలుగు రాష్ట్రాల్లో బ్రహ్మాండమైన ఫలాలు అందిస్తున్నాయి.
విభజిత ఆంధ్రప్రదేశ్ రాష్ట్రంలో చంద్రబాబు తన మార్కు పరిపాలన 2014 నుంచి 2019 వరకు అందించారు. ఈ సమయంలో రాయలసీమ ప్రాంతాన్ని పూర్తిగా మార్చడానికి ఆయన కంకణం కట్టుకున్నారు. కరువు పీడిత ప్రాంతమైన అనంతపురంలో కియా అనే కార్ల తయారీ పరిశ్రమను ఏర్పాటు చేశారు. ఆ పరిశ్రమవల్ల రాయలసీమ రూపు రేఖలు పూర్తిగా మారిపోయాయి. కియా పరిశ్రమ ద్వారా రాయలసీమలో వేలాది మందికి ఉపాధి లభిస్తుంది. పరోక్షంగా లక్షల మందికి ఉపాధి అవకాశం కలుగుతోంది.
రాయలసీమలో విస్తారమైన భూములు ఉన్నాయి. సాగునీటి ప్రాజెక్టులు కూడా ఉన్నాయి. కాకపోతే నిర్లక్ష్యం వల్ల ఇవి నిరుపయోగంగా ఉన్నాయి. అందువల్లే చంద్రబాబు వీటి మీద ప్రధానంగా దృష్టి సారించారు. సాగునీటిపారుదల రంగంలో విప్లవాత్మక మార్పులకు శ్రీకారం చుట్టారు. వెలిగొండ సుబ్బయ్య ప్రాజెక్టును ఇటీవల ప్రారంభించారు. దీని ద్వారా ప్రకాశం.. మార్కాపురం ప్రాంతాలకు సాగునీటి సౌకర్యం కల్పించారు. ప్రస్తుతం ఎల్ నీనో వంటి విపత్కరమైన పరిస్థితులు ఉన్నప్పటికీ ఉమ్మడి ప్రకాశం జిల్లాకు నీళ్లు అందుతున్నాయంటే అది ముమ్మాటికి చంద్రబాబు చొరవ. ఇక అనంతపురం నుంచి మొదలుపెడితే అన్నమయ్య వరకు అన్ని ప్రాంతాలకు సాగునీటి సౌకర్యం కల్పించడానికి రైసింగ్ రాయలసీమ పేరుతో సరికొత్త కార్యక్రమానికి చంద్రబాబు శ్రీకారం చుట్టారు. మొత్తంగా ఈ ప్రాంతాల అభివృద్ధికి లక్ష కోట్లను కేటాయించారు. ప్రభుత్వ రంగం నుంచి 40 వేల కోట్లకు పైగా నిధులు ఖర్చు చేస్తారు. ప్రైవేట్ రంగం నుంచి 60 వేల కోట్లకు పైగా నిధులను వెచ్చింపజేస్తారు.
ముఖ్యంగా రాయలసీమ ప్రాంతంలో వరిలాంటి నీటి అవసరం ఎక్కువగా ఉన్న పంటలు కాకుండా.. ఉద్యాన పంటలను ఎక్కువగా సాగు చేయడానికి చంద్రబాబు ప్రోత్సాహకాలు కల్పిస్తున్నారు. అవకాడో నుంచి బ్లూబెర్రీ వరకు విలువ ఎక్కువగా ఉన్న పంటలను సాగు చేయించేలాగా ప్రణాళికలు రూపొందించారు. ఈ పంటలు మొత్తం బిందు.. సూక్ష్మ సేద్యం ద్వారా సాగవుతాయి. తద్వారా నీటి అవసరం తక్కువ పడుతుంది. గ్రీన్ హౌస్ లలో పంటలు సాగు చేయడం వల్ల కూలీల అవసరం కూడా ఉండదు. పైగా అవకాడ నుంచి మొదలుపెడితే బ్లూబెర్రీ వరకు ప్రపంచ మార్కెట్లలో విపరీతంగా డిమాండ్ ఉంటుంది. సేంద్రియ విధానంలో ఈ పంటలు సాగు చేయడం వల్ల అంతర్జాతీయ మార్కెట్లో రేట్ కూడా భారీగా పలుకుతుంది.
అనంతపురం నుంచి కొంతమంది ఔత్సాహిక రైతులు అవకాడో సాగు చేస్తున్నారు. ఇంకా కొంతమంది రైతులు ఆపిల్ పంటను సాగు చేస్తున్నారు. మరికొందరు యెల్లో కలర్ కర్బూజ పంటను సాగు చేస్తున్నారు. ఇదంతా కూడా చంద్రబాబు దృష్టికి వచ్చింది. అందువల్లే ఆయన ఉద్యాన పంటల సాగుకు ప్రోత్సాహం కల్పిస్తున్నారు. దీనివల్ల రైతుల జీవితంలో గణనీయంగా మార్పు వస్తుందని చంద్రబాబు అంచనా వేస్తున్నారు.
ఉమ్మడి ఆంధ్రప్రదేశ్ రాష్ట్రానికి ముఖ్యమంత్రిగా ఉన్నప్పుడు చంద్రబాబు ఇజ్రాయిల్ దేశంలో పర్యటించారు. అక్కడ రైతులు బిందు సేద్యం ద్వారా పంటలు పండిస్తున్న విధానాన్ని పరిశీలించారు. ఆ తర్వాత ఆయన ఆ విధానాన్ని ఇక్కడ అమలు చేయడం మొదలుపెట్టారు. నేడు రెండు తెలుగు రాష్ట్రాల్లో రైతులు బిందు సేద్యం.. సూక్ష్మ సేద్యంలో పంటలు పండిస్తున్నారు అంటే దానికి ప్రధాన కారణం చంద్రబాబు. ఇప్పుడు అదే విధానాన్ని రాయలసీమ ప్రాంతంలో కూడా అమలు చేయడానికి చంద్రబాబు ఏకంగా లక్ష కోట్లు కేటాయించారు. దీనిని బట్టి ఆయన ముందుచూపు ఎలా ఉందో అర్థం చేసుకోవచ్చు.
ఒక పాలకుడికి ప్రజల మీద ప్రేమ ఉండాలి. పుట్టిన గడ్డమీద మమకారం ఉండాలి. ప్రజలకు ఏదైనా చేయాలనే నేర్పరితనం ఉండాలి. అవన్నీ ఉన్నాయి కాబట్టే చంద్రబాబు రాయలసీమను రాయల్ సీమగా మార్చేస్తున్నారు. కత్తుల కొట్లాటకు.. నెత్తుటి వేటకు కేరాఫ్ అడ్రస్ లాగా మార్చిన వాళ్లు ఇప్పుడు చంద్రబాబు చేస్తున్న అభివృద్ధిని చూసి నిశ్శబ్దంగా ఉండిపోతున్నారు. అందుకే అభివృద్ధి కామకుడికి.. విధ్వంసకారుడికి తేడా ఉందని 2024 ఎన్నికల్లో ప్రజలు స్పష్టమైన తీర్పు ఇచ్చారు. ఆ తీర్పు ఫలితమే నేటి రాయల్ సీమ.
