India Pakistan Border: భారత్–పాకిస్తాన్ సరిహద్దు అంటేనే ఎప్పుడూ ఉద్రిక్తతలు నెలకొని ఉంటాయి. దాయాది దేశం ఎప్పుడూ కవ్వింపులకు పాల్పడుతూ.. ఉగ్రవాదులను మన దేశంలోకి పంపే ప్రయత్నం చేస్తుంది. అయితే వాఘా సరిహద్దు మాత్రం.. కాస్త ప్రశాంతంగా ఉంటుంది. అయితే తాజాగా ఇండిగో విమానయాన సంస్థ పైలట్ కెప్టెన్ ప్రదీప్ కృష్ణన్ విమాన ప్రయాణికులకు ఓ అద్భుత దృశ్యాన్ని చూపించారు. రాత్రి వేళ తీసిన ఈ వీడియో సోషల్ మీడియాలో వైరల్ అవుతోంది. కాక్పిట్ నుంచి తీసిన ఈ అపూర్వ ఫుటేజ్లో భారత్–పాకిస్తాన్ సరిహద్దు ఒక ప్రకాశవంతమైన కాంతి గీతంలా కనిపించింది. చుట్టూ చీకటి అంచుల మధ్య ఎల్లో ఫ్లడ్లైట్లు వరుసగా వెలుగుతూ రాడ్క్లిఫ్ లైన్ను స్పష్టంగా విభజించి చూపించాయి. విమానం క్రూజింగ్ ఎత్తులో ఉన్నప్పుడు సరిహద్దు ఇరువైపులా ఉన్న బార్డర్ అవుట్పోస్టులు, సెక్యూరిటీ ఏర్పాట్లు కాంతి క్లస్టర్లుగా కనిపించాయి. ఈ దృశ్యం చాలా మందిని ఆకట్టుకుంది.
అత్యంత సున్నితమైన ప్రాంతం..
కెప్టెన్ ప్రదీప్ లేడీస్ అండ్ జెంలిట్మెన్ అంటూ ప్రయాణీకులతో మాట్లాడుతూ, ‘‘ప్రపంచంలోని అత్యంత సున్నితమైన, బలంగా కాపాడబడే సరిహద్దుల్లో ఒకటైన భారత్–పాకిస్తాన్ సరిహద్దును చూడవచ్చు’’ అని ప్రకటించడం వీడియోలో ఉంది. అంతరిక్షం నుంచి కనిపించే గీత‘‘రాత్రి సమయంలో భారత్–పాకిస్తాన్ సరిహద్దును అంతరిక్షం నుంచి కూడా గుర్తించవచ్చు’’ అని వీడియోకు ఇచ్చిన క్యాప్షన్ ఈ దృశ్యం ఎంత ప్రత్యేకమో తెలియజేస్తోంది. భూమి మీది చీకటి నేపథ్యంలో ఈ కాంతి గీతం ఒక డ్రామాటిక్, సర్రియల్ ఇమేజ్ను సృష్టించింది.
నెటిజన్ల స్పందన..
ఈ వీడియో విడుదలైన వెంటనే నెటిజన్ల నుంచి వేలాది ప్రతిస్పందనలు వచ్చాయి. చాలా మంది దీన్ని ‘‘అద్భుతం’’, ‘‘ఇప్పటివరకు ఇలా చూడలేదు’’ అని వ్యాఖ్యానించారు. కొందరు సరిహద్దుల మానవీయ కోణాన్ని ప్రస్తావించారు.‘‘రెండు వైపులా ఉన్న అందమైన ప్రజలు, సరిహద్దు రాజకీయాల అందములేని గోడ వల్ల విభజించబడ్డారు’’ అని ఒకరు రాశారు. ‘‘సరిహద్దు లైట్ల బిల్లు ఎవరు చెల్లిస్తారు?’’ అని మరొకరు జోక్ చేశారు. ‘‘రెండు సముద్రాలు కలిసి ఉన్నా ఎప్పుడూ కలవని లాగా… ఎంత దగ్గరగా ఉన్నా ఎంత దూరం!’’ అని మరొక వ్యాఖ్య ఆకట్టుకుంది.
ఈ ఏరియల్ ఫుటేజ్ కేవలం అందమైన దృశ్యం మాత్రమే కాదు. ఇది రాజకీయాలు, చరిత్ర, భద్రతా అవసరాల వల్ల ఏర్పడిన విభజనను గుర్తు చేస్తుంది. ఒకవైపు అధిక సైనిక భద్రత, మరోవైపు సాధారణ ప్రజల జీవితాలు – ఈ రెండింటి మధ్య ఉన్న వ్యత్యాసాన్ని ఆకాశం నుంచి చూసినప్పుడు మరింత స్పష్టంగా అర్థమవుతుంది. కెప్టెన్ ప్రదీప్ కృష్ణన్ ఇలాంటి సమాచారపరమైన, ఆకర్షణీయమైన వీడియోలు షేర్ చేయడం ద్వారా ప్రయాణీకుల అనుభవాన్ని మరింత గుర్తుండిపోయేలా చేస్తున్నారు. ఈ వీడియో లక్షలాది మంది మనసుల్లో సరిహద్దుల గురించి, వాటి వెనుక ఉన్న వాస్తవాల గురించి ఆలోచనలను రేకెత్తించింది.
