Flydubai Co Pilot : దుబాయ్: ఫ్లైదుబాయ్ విమానంలో చోటుచేసుకున్న సంచలన ఘటనపై దర్యాప్తు కొనసాగుతున్న వేళ.. దాడికి పాల్పడ్డాడని ఆరోపణలు ఎదుర్కొంటున్న ఒమన్ కో-పైలట్‌కు సంబంధించిన కీలక విషయాలు ఒక్కొక్కటిగా వెలుగులోకి వస్తున్నాయి. అరబ్ మీడియా, అమెరికా మీడియా సంస్థలు ప్రచురించిన నివేదికల ప్రకారం.. ఈ ఘటనలో నిందితుడిగా ఉన్న కో-పైలట్‌ను 29 ఏళ్ల హమామ్ అల్-హమ్మామిగా గుర్తించారు.
దుబాయ్ నుంచి టెల్ అవీవ్‌కు వెళ్తున్న ఫ్లైదుబాయ్ విమానంలో కెప్టెన్ స్మిత్ మచ్చర్‌పై హమామ్ దాడి చేసినట్లు ఆరోపణలు ఉన్నాయి. విమానం అదుపు తప్పే పరిస్థితి ఏర్పడటంతో ప్రయాణికులు, సిబ్బంది జోక్యం చేసుకున్నారు. అనంతరం మరో ఇద్దరు ఆఫ్-డ్యూటీ పైలట్లు విమానాన్ని సౌదీ అరేబియాలోని తబూక్‌కు సురక్షితంగా మళ్లించినట్లు రాయిటర్స్ తెలిపింది.
ఒమన్ ఎయిర్‌లోనే అనుమానాలు?
హమామ్ గతంలో ఒమన్ ఎయిర్‌లో శిక్షణ పొందిన కో-పైలట్గా పనిచేసినట్లు అధికారులను ఉటంకిస్తూ అమెరికా మీడియా పేర్కొంది. 2024లో అతడి వద్ద తీవ్రవాద భావజాలానికి సంబంధించిన మెటీరియల్ గుర్తించడంతో అతడిని విమానం నడపకుండా నిలిపివేసినట్లు ABC News తెలిపింది. అయితే అప్పట్లో అతడిని పూర్తిగా ఉద్యోగం నుంచి తొలగించకుండా పరిపాలనా విధుల్లో కొనసాగించినట్లు సమాచారం.
ఇదే అంశం ఇప్పుడు దర్యాప్తులో కీలకంగా మారింది. గతంలో భద్రతాపరమైన అనుమానాలు వ్యక్తమైన వ్యక్తి అనంతరం ఫ్లైదుబాయ్‌లో కో-పైలట్గా ఎలా చేరాడు? అతడి గత చరిత్రను నియామక సమయంలో పూర్తిగా పరిశీలించారా? అనే ప్రశ్నలు తలెత్తుతున్నాయి.
సోషల్ మీడియా ఖాతాల్లోనూ సంచలన అంశాలు
హమామ్‌కు చెందినవిగా భావిస్తున్న సోషల్ మీడియా ఖాతాలను కూడా దర్యాప్తు సంస్థలు పరిశీలిస్తున్నాయి. కొన్ని నివేదికల ప్రకారం.. ఆ ఖాతాల్లో తీవ్రవాద భావజాలానికి సంబంధించిన కంటెంట్ ఉన్నట్లు సమాచారం. అయితే సోషల్ మీడియా పోస్టుల ప్రామాణికత, వాటి వెనుక ఉన్న వ్యక్తి, ఘటనకు వాటి సంబంధం వంటి అంశాలపై దర్యాప్తు ఇంకా కొనసాగుతోంది.
సిరియా కనెక్షన్‌పైనా దృష్టి
హమామ్‌కు సిరియాతో సంబంధాలపై కూడా దర్యాప్తు అధికారులు దృష్టి సారించినట్లు పలు నివేదికలు పేర్కొంటున్నాయి. అతడు ఒమన్ వెలుపల, ముఖ్యంగా సిరియాలో గడిపిన కాలం గురించి కూడా విచారణ జరుగుతున్నట్లు సమాచారం. అతడి కుటుంబ నేపథ్యానికి సంబంధించి కూడా కొన్ని వివరాలు అంతర్జాతీయ మీడియాలో ప్రచురితమవుతున్నాయి. అయితే తల్లి సిరియా వాసి అన్న సమాచారం సహా ఈ కుటుంబ నేపథ్య వివరాలను అధికారికంగా ధృవీకరించాల్సి ఉంది.
భద్రతా వ్యవస్థలపై పెరుగుతున్న ప్రశ్నలు
ఈ ఘటనతో అంతర్జాతీయ విమానయాన రంగంలో పైలట్ల నియామకం, బ్యాక్‌గ్రౌండ్ వెరిఫికేషన్, మానసిక-భద్రతా పరిశీలనలు, గత ఉద్యోగ రికార్డుల తనిఖీ వంటి అంశాలపై తీవ్ర చర్చ మొదలైంది. ముఖ్యంగా ఒక దేశంలో భద్రతా కారణాలతో విమానయాన విధుల నుంచి తప్పించిన వ్యక్తి మరో దేశంలోని విమానయాన సంస్థలో ఎలా కీలక బాధ్యతలు చేపట్టగలిగాడన్న ప్రశ్నకు సమాధానం కోసం దర్యాప్తు సంస్థలు ప్రయత్నిస్తున్నాయి.
అయితే హమామ్ చర్య వెనుక అసలు ఉద్దేశం ఏమిటి? అతడు ఒంటరిగానే ఈ దాడికి పాల్పడ్డాడా? దీనికి ఏదైనా ఉగ్రవాద సంస్థతో సంబంధం ఉందా? అనే అంశాలపై ఇంకా స్పష్టమైన అధికారిక నిర్ధారణ రాలేదు. అందువల్ల ప్రస్తుతం వెలుగులోకి వచ్చిన వివరాలను దర్యాప్తు సంస్థల పరిశీలనలో ఉన్న సమాచారంగానే చూడాల్సి ఉంటుంది.
ఫ్లైదుబాయ్ ఘటన నేపథ్యంలో అంతర్జాతీయ విమాన భద్రతపై మరోసారి పెద్ద ప్రశ్నలు తలెత్తుతున్నాయి. ముఖ్యంగా పైలట్ల గత చరిత్రను వివిధ దేశాల విమానయాన సంస్థలు ఎంత సమగ్రంగా పరిశీలిస్తున్నాయి? భద్రతా సమాచారాన్ని దేశాల మధ్య పంచుకునే వ్యవస్థలు ఎంత బలంగా ఉన్నాయి? అన్నది ఇప్పుడు ప్రధాన చర్చగా మారింది.
