KS Bharat Retirement: కేఎస్ భరత్.. తెలుగు కుర్రాడు.. వర్ధమాన క్రికెటర్. వికెట్ కీపర్ కూడా. జాతీయ జట్టులో టెస్ట్ ఫార్మాట్ లో కూడా ఆడాడు. అటువంటి భరత్ కేవలం 32 సంవత్సరాల వయసులోనే అంతర్జాతీయ క్రికెట్ నుంచి తప్పుకుంటున్నట్టు ప్రకటించాడు. సామాజిక మాధ్యమాల వేదికగా అతడు ఈ విషయాన్ని ప్రకటించాడు. ఎంతో ఉజ్వలమైన భవిష్యత్తు ఉన్న భరత్ ఇలా రిటైర్మెంట్ ప్రకటించడంక్రికెట్ వర్గాలకు ఆశ్చర్యంతో పాటు ఆందోళన కలిగించింది.
సరిగ్గా 2023లో ఆస్ట్రేలియా జట్టుతో నాగపూర్ ప్రాంతంలో జరిగిన టెస్ట్ మ్యాచ్ ద్వారా సుదీర్ఘ ఫార్మాట్లోకి భరత్ ఎంట్రీ ఇచ్చాడు. భారత జట్టు తరఫున ఏడు టెస్టులు ఆడాడు. మొత్తం 221 పరుగులు చేశాడు. వికెట్ కీపర్ గా ఇతడు మెరుగైన ప్రదర్శన చేశాడు. మొత్తంగా 18 క్యాచ్లు.. ఒక స్టంప్ అవుట్ తన ఖాతాలో నమోదు చేసుకున్నాడు.
ఇంటర్నేషనల్ లెవెల్ లో పెద్దగా ఆకట్టుకోలేకపోయినప్పటికీ.. డొమెస్టిక్ క్రికెట్ లో మాత్రం సత్తా చూపించాడు. మొత్తం 113 ఫస్ట్ క్లాస్ క్రికెట్ మ్యాచులు ఆడాడు. 6102 రన్స్ చేశాడు. ఇందులో 11 సెంచరీలు, 34 హాఫ్ సెంచరీలు ఉన్నాయి. ఇతడి హైయెస్ట్ స్కోర్ 308.
లిస్ట్ ఏ క్రికెట్ లో ఇతడు మొత్తం 82 మ్యాచ్ లు ఆడాడు. ఇందులో 8 సెంచరీలున్నాయి. పది హాఫ్ సెంచరీలున్నాయి. మొత్తంగా 2692 పరుగులు చేశాడు. దేశవాళీ టి20 లలో 91 మ్యాచ్లు ఆడాడు. ఇందులో 11 హాఫ్ సెంచరీలు ఉన్నాయి. ఈ విభాగంలో అతడు మొత్తం 1812 రన్స్ చేశాడు.. ఇండియన్ ప్రీమియర్ లీగ్ లో భరత్ మొత్తం 11 మ్యాచులు ఆడాడు. ఒక హాఫ్ సెంచరీ చేశాడు..
కారణాలు బయటకు తెలియకపోయినప్పటికీ అంతర్గత రాజకీయాల వల్ల తను ఎదగలేనని విషయం భరత్ కు అర్థమై ఉంటుందని అందువల్లే రిటైర్మెంట్ ప్రకటించాడని వార్తలు వస్తున్నాయి. అయితే దీనిపై భరత్ ఇంతవరకు అధికారికంగా ప్రకటించలేదు. అంతర్జాతీయ క్రికెట్ కు గుడ్ బై చెప్పినప్పటికీ.. భవిష్యత్తు కాలంలో కోచింగ్.. మెంటారింగ్ ద్వారా యంగ్ ప్లేయర్లకు సలహాలు సూచనలు ఇస్తానని అతడు చెప్పాడు.
“నేను భారత జట్టుకు ఆడటం గొప్ప విషయం గా భావిస్తున్నాను. ఈ ప్రయాణంలో నాకు కుటుంబ సభ్యులు అండగా నిలిచారు. శిక్షకులు.. తోటి ప్లేయర్లు.. బీసీసీఐ నాకు సపోర్ట్ చేసింది. కెరియర్ ప్రారంభంలో విరాట్ కోహ్లీ.. రోహిత్ శర్మ.. రాహుల్ ద్రావిడ్ ప్రత్యేకమైన ముద్ర నామీద వేశారు. వారికి ప్రత్యేకమైన నాది కృతజ్ఞతలు” అంటూ భరత్ సోషల్ మీడియాలో పేర్కొన్నాడు.
