Bhuvneshwar Kumar: ఇటీవల జరిగిన ఐపిఎల్ లో అత్యంత పొదుపుగా బౌలింగ్ వేశాడు భువనేశ్వర్. అదే స్థాయిలో వికెట్లు కూడా పడగొట్టాడు.. పర్పుల్ క్యాప్ అందుకున్నాడు. భువనేశ్వర్ చాలా తక్కువగా మాట్లాడుతుంటాడు. కానీ అతడు మాట్లాడినప్పుడు మీడియా మొత్తం సంచలనంగా మారుతుంది. ఎందుకంటే అతడి మాటలు అలా ఉంటాయి కాబట్టి.
తాజాగా టీమిండియాలో తనకు చోటు ఎందుకు లభించడం లేదు.. తను ఎంత గొప్పగా బౌలింగ్ చేస్తున్నప్పటికీ సెలెక్టర్లు ఎందుకు లెక్కలోకి తీసుకోవడం లేదు.. అనే విషయాలపై క్లారిటీ ఇచ్చాడు భువనేశ్వర్ కుమార్. “దేశం కోసం ఆడాలని చాలామందికి ఉంటుంది. అందులో నేను కూడా ఒకడిని. కాకపోతే కొన్ని సందర్భాలలో జరిగిన విషయాలను బయట పెట్టుకోవడం భావ్యం కాదు. నేను నాకు నచ్చిన పని చేస్తున్నా. అందులో నన్ను నేను నిరూపించుకుంటున్నాను. సెలెక్టర్లు వాళ్ల పని వాళ్ళు చేస్తున్నారు. టాలెంట్ ఉండగానే సరిపోదు. జట్టుకు కూడా ఎంపిక కావాలి. జట్టులోకి ఎంపిక కావాలంటే దానిని సెలెక్టర్లు చూసుకోవాలి. వాళ్ళు ఓకే చెబితేనే జట్టులోకి అవకాశం ఉంటుందని” భువనేశ్వర్ వ్యాఖ్యానించాడు.
భువనేశ్వర్ గతంలో జట్టుకు ఎంపికైనప్పుడు అద్భుతమైన ఇన్ స్వింగ్ బౌలింగ్ తో ఆకట్టుకునేవాడు.. తక్కువ ఎత్తులో బంతులు వేసి ప్రత్యర్థి బ్యాటర్లను బోల్తా కొట్టించేవాడు. ముఖ్యంగా వికెట్ టు వికెట్ బంతులు వేయడంలో అతడి తర్వాతే ఎవరైనా. తక్కువ వేగంతో యార్కర్లు వేసి.. వికెట్లు పడగొట్టడంలో భువనేశ్వర్ కుమార్ నేర్పరి. అందువల్లే అతడిని వికెట్ మాస్టర్ అని పిలుస్తుంటారు. ఇటీవల ఐపీఎల్లో బెంగళూరు జుట్టు తరఫున ఆడిన అతడు అదరగొట్టాడు. వికెట్ల మీద వికెట్లు పడగొట్టి సంచలనం సృష్టించాడు. ఇన్ని సంవత్సరాలపాటు ఐపీల్ ఆడుతున్నప్పటికీ.. కొత్త బౌలర్ లాగా బౌలింగ్ వేసి సంచలనం సృష్టించాడు.. ఐపీఎల్ ట్రోఫీ బెంగళూరు గెలవడం వెనక మిగతా ఆటగాళ్ల పాత్ర ఎంతైతే ఉందో.. అంతకు మించిన పాత్ర భువనేశ్వర్ కుమార్ ది ఉంది.
ఐపీఎల్ లో సత్తా చూపించిన తర్వాత భువనేశ్వర్ కుమార్ కు వన్డే సిరీస్ లలో అవకాశం లభిస్తుందని అందరూ అనుకున్నారు. కానీ అది సాధ్యం కాలేదు. కనీసం ఐర్లాండ్, ఇంగ్లాండ్ జట్లో జరిగే టీ20 సిరీస్ లకైనా చోటు లభిస్తుందేమోనని అనుకున్నారు. చివరికి అది కూడా వీలుపడలేదు. మొత్తానికి టన్నుల కొద్దీ టాలెంట్ పెట్టుకుని భువనేశ్వర్ జట్టుకు ఎంపిక కాలేకపోతున్నాడు.
