Apple iPhone 18 : స్మార్ట్‌ఫోన్ మార్కెట్‌లో ఆపిల్‌కు ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. ప్రతి ఏడాది కొత్త ఐఫోన్ సిరీస్‌ను విడుదల చేసే సంస్థ.. ఈసారి మాత్రం తన లాంచ్ వ్యూహంలో కీలక మార్పు చేసింది. ఐఫోన్ 18 సిరీస్‌లో భాగంగా ఐఫోన్ 18 ప్రో, ఐఫోన్ 18 ప్రో మ్యాక్స్ మోడళ్లను ఇప్పటికే సెప్టెంబర్‌లో మార్కెట్లోకి తీసుకొచ్చినట్లు సమాచారం. వీటితో పాటు సంస్థ తొలిసారిగా బుక్‌స్టైల్ ఫోల్డబుల్ ఫోన్ ఐఫోన్ డ్యుయోను కూడా పరిచయం చేసింది. అయితే అందరూ ఆసక్తిగా ఎదురుచూసిన సాధారణ ఐఫోన్ 18 మాత్రం ఈ ఏడాది లైనప్‌లో కనిపించలేదు. ఈ ఫోన్ లాంచ్ వాయిదా పడటానికి శాంసంగ్‌తో ఆపిల్ కుదుర్చుకున్న కొత్త ఒప్పందమే కారణమై ఉండొచ్చని తాజా నివేదికలు వెల్లడిస్తున్నాయి.
కెమెరా సెన్సార్ల కొరతే అసలు సమస్య?
జపనీస్ మీడియా సంస్థ సెమీకాన్‌పోర్టల్ ప్రచురించిన నివేదిక ప్రకారం.. ఐఫోన్ 18 తయారీకి అవసరమైన కెమెరా సెన్సార్లను తగిన స్థాయిలో సమకూర్చుకోవడంలో ఆపిల్ ఇబ్బందులు ఎదుర్కొంటోంది. ఇప్పటివరకు ఐఫోన్ల కోసం కెమెరా సెన్సార్లను ప్రధానంగా సోనీ నుంచే ఆపిల్ సేకరిస్తోంది. అయితే ఆపిల్‌తో సోనీకి ఉన్న దీర్ఘకాలిక భాగస్వామ్యం ముగిసినట్లు ఆ సంస్థ ప్రతినిధులు ధ్రువీకరించినట్లు నివేదిక పేర్కొంది. దీంతో కెమెరా సెన్సార్ల సరఫరా విషయంలో ప్రత్యామ్నాయ సంస్థలపై ఆపిల్ దృష్టి సారించింది.
శాంసంగ్‌తో ఆపిల్ కీలక ఒప్పందం
ఈ నేపథ్యంలో గత ఏడాది ఆగస్టులో శాంసంగ్‌తో ఆపిల్ కీలక ఒప్పందం కుదుర్చుకున్నట్లు సమాచారం. ఈ ఒప్పందం ద్వారా అమెరికాలో తన తయారీ కార్యకలాపాలను మరింత బలోపేతం చేసుకోవాలని ఆపిల్ భావిస్తోంది. ఇందులో భాగంగా శాంసంగ్ అమెరికాలోని టెక్సాస్ రాష్ట్రం ఆస్టిన్‌లో ఉన్న తన తయారీ కేంద్రంలో ఐఫోన్ల కోసం CMOS కెమెరా సెన్సార్లను ఉత్పత్తి చేయనుందని తెలుస్తోంది.
ఇప్పటికే శాంసంగ్ 20 మెగాపిక్సెల్ సామర్థ్యంతో కూడిన హై-పెర్ఫార్మెన్స్ CMOS కెమెరా సెన్సార్ తయారీని ప్రారంభించినట్లు నివేదిక వెల్లడించింది. అయితే కొత్త సెన్సార్ల తయారీ, సరఫరా ప్రక్రియలో జాప్యం ఏర్పడటంతో ఐఫోన్ 18 విడుదల కూడా వాయిదా పడినట్లు తెలుస్తోంది. ఈ పరిణామమే ఆపిల్ తన సాధారణ ఐఫోన్ మోడల్‌ను వచ్చే ఏడాదికి వాయిదా వేయడానికి ఒక కారణమై ఉండొచ్చని టెక్ వర్గాలు విశ్లేషిస్తున్నాయి.
వచ్చే ఏడాది ఐఫోన్ 18 లాంచ్?
గతంలో ఐఫోన్ 18 విడుదల వాయిదా పడటానికి పలు కారణాలు వినిపించాయి. ఆపిల్ తొలిసారిగా తీసుకొస్తున్న ఫోల్డబుల్ ఐఫోన్‌పై ఎక్కువ దృష్టి పెట్టాలనే ఉద్దేశంతోనే సాధారణ మోడల్ లాంచ్‌ను ఆలస్యం చేసిందని కొన్ని నివేదికలు పేర్కొన్నాయి. మరోవైపు ప్రపంచవ్యాప్తంగా కొనసాగుతున్న ర్యామ్, స్టోరేజ్ చిప్‌ల కొరత కూడా ఇందుకు కారణమై ఉండొచ్చనే అభిప్రాయాలు వ్యక్తమయ్యాయి. తాజాగా కెమెరా సెన్సార్ల సరఫరా సమస్య మరో కారణంగా తెరపైకి వచ్చింది.
ప్రస్తుత అంచనాల ప్రకారం.. ఐఫోన్ 18ను వచ్చే ఏడాది ప్రారంభంలో మార్కెట్లోకి తీసుకురావచ్చు. అదే సమయంలో తక్కువ ధరలో అందుబాటులోకి వచ్చే ఐఫోన్ 18e, ఐఫోన్ ఎయిర్ 2 మోడళ్లను కూడా ఆపిల్ పరిచయం చేసే అవకాశం ఉందని టెక్ నివేదికలు చెబుతున్నాయి.
ఐఫోన్ 18 ఫీచర్లు ఎలా ఉండబోతున్నాయి?
లాంచ్ ఆలస్యమైనప్పటికీ ఐఫోన్ 18పై అంచనాలు మాత్రం భారీగానే ఉన్నాయి. ఈ ఫోన్‌లో ఆపిల్ సొంతంగా రూపొందించే A20 చిప్‌సెట్‌ను ఉపయోగించే అవకాశం ఉందని సమాచారం. గత మోడల్‌తో పోలిస్తే ఇందులో మరింత పెద్ద బ్యాటరీని అందించవచ్చని తెలుస్తోంది. అలాగే 6.3 అంగుళాల AMOLED డిస్‌ప్లేను ఇవ్వనున్నట్లు అంచనాలు వినిపిస్తున్నాయి.
కెమెరాల విషయానికి వస్తే.. వెనుకవైపు డ్యూయల్ కెమెరా సెటప్ ఉండొచ్చని సమాచారం. ఇందులో 48 మెగాపిక్సెల్ ప్రధాన కెమెరాతో పాటు మరో 48 మెగాపిక్సెల్ అల్ట్రావైడ్ కెమెరాను అందించే అవకాశం ఉంది. అయితే ఈ ఫీచర్లకు సంబంధించి ఆపిల్ నుంచి ఇప్పటివరకు అధికారిక ప్రకటన వెలువడలేదు.
మొత్తానికి సోనీతో భాగస్వామ్యం ముగియడం, శాంసంగ్‌తో కొత్త సరఫరా ఒప్పందం, కెమెరా సెన్సార్ల తయారీలో జాప్యం వంటి పరిణామాలు ఐఫోన్ 18 విడుదల తేదీపై ప్రభావం చూపుతున్నట్లు తెలుస్తోంది. ఆపిల్ మాత్రం ఈ లాంచ్ వాయిదాపై అధికారికంగా ఎలాంటి కారణాన్ని వెల్లడించలేదు. వచ్చే ఏడాది ఐఫోన్ 18 ఎలాంటి ఫీచర్లతో వస్తుంది? శాంసంగ్ తయారు చేసే కెమెరా సెన్సార్లు ఫొటోగ్రఫీ అనుభవాన్ని ఎంతవరకు మెరుగుపరుస్తాయి? అన్నది ఆసక్తికరంగా మారింది.
