Shravana Masam 2026: తెలుగు క్యాలెండర్ ప్రకారం.. శ్రావణమాసం అత్యంత పవిత్రమైన మాసంగా భావిస్తారు. ఈ నెలలో పూజలు, వ్రతాలు, నోములు మాత్రమే కాకుండా పెళ్లిళ్లు, నిశ్చితార్థాలు, గృహ ప్రవేశాలు వంటి శుభకార్యాలు నిర్వహిస్తూ ఉంటారు. ఈ ఏడాది ఆగస్టు 13 నుంచి శ్రావణ మాసం ప్రారంభం కానుంది. సెప్టెంబర్ 11 వరకు కొనసాగనుంది. దీంతో ఇన్ని రోజులు శుభకార్యాల కోసం ఎదురుచూసే వారికి ఈనెల అనుకూలంగా ఉండనుంది. దీంతో తమ కార్యక్రమాలను నిర్వహించుకోవడానికి ఇప్పటికే జ్యోతిష్యులను సంప్రదిస్తున్నారు. అయితే ఈ ఏడాది శ్రావణమాసంలో ఎన్ని మంచి రోజులు ఉన్నాయో చూద్దాం..
పండితులు చెబుతోన్న వివరాల ప్రకారం.. ఆగస్టు నెలలో 16, 17, 20, 21, 22, 23, 26, 27, 28, 29, 30 తేదీల్లో శుభ ముహూర్తాలు ఉన్నాయి. అలాగే సెప్టెంబర్ 3, 4, 5, 8, 10 తేదీల్లోనూ వివాహాలు, ఇతర శుభకార్యాలకు అనుకూలమైన సమయాలు ఉన్నాయని పేర్కొంటున్నారు. అయితే ముహూర్తాలు ప్రాంతం, పంచాంగం, తిథి, నక్షత్రం తదితర అంశాల ఆధారంగా మారే అవకాశం ఉండటంతో ఆయా కుటుంబాలు తమ పురోహితుల సూచనతో తుది సమయాన్ని నిర్ణయించుకోవడం మంచిది.
శ్రావణ మాసంలో వరుసగా శుభ ముహూర్తాలు ఉండటంతో పెళ్లిళ్లు ఎక్కువగా జరిగే అవకాశం ఉంది. ఇప్పటికే చాలా కుటుంబాలు వివాహ తేదీలను ఖరారు చేసుకుని ఫంక్షన్ హాళ్లు, కల్యాణ మండపాలు, క్యాటరింగ్, డెకరేషన్, ఫొటోగ్రఫీ వంటి వాటిని ఏర్పాట్లు చేసుకుంటున్నట్లు తెలుస్తోంది. ఈ సీజన్లో పెళ్లిళ్ల సంఖ్య భారీగా ఉండే అవకాశం ఉందని, దాదాపు 10 వేలకు పైగా వివాహాలు జరిగే అవకాశం ఉందని అంచనా వేస్తున్నారు.
మంచి ముహూర్తాలు పరిమిత తేదీల్లోనే ఉండటంతో ఫంక్షన్ హాళ్లు, కల్యాణ మండపాలకు డిమాండ్ పెరగనుంది. ముఖ్యంగా వారాంతాలు, వరుసగా శుభ ముహూర్తాలు ఉన్న రోజుల్లో ముందస్తు బుకింగ్స్ భారీగా ఉండే అవకాశం ఉంది. చిన్న పట్టణాల నుంచి నగరాల వరకు వివాహ వేదికల బుకింగ్స్ పెరగడంతో నిర్వాహకులు కూడా ఏర్పాట్లను వేగవంతం చేస్తున్నారు.
పెళ్లిళ్ల సీజన్ మొదలైతే వివాహాలతో పాటు మార్కెట్లోనూ సందడి పెరుగుతుంది. వధూవరుల దుస్తులు, బంగారు ఆభరణాలు, ఫర్నిచర్, గృహోపకరణాలు, బహుమతులు, డెకరేషన్ సామాగ్రి వంటి వాటికి డిమాండ్ పెరిగే అవకాశం ఉంది. పెళ్లి కుటుంబాల్లో షాపింగ్ ప్రక్రియ కూడా ముందుగానే ప్రారంభమవుతోంది. దీంతో జువెలరీ షాపులు, వస్త్ర దుకాణాలు, ఫర్నిచర్ షోరూమ్లు, ఈవెంట్ మేనేజ్మెంట్ సంస్థలకు ఈ సీజన్ కీలకంగా మారనుంది.
శ్రావణ మాసంలో కేవలం పెళ్లిళ్లే కాకుండా నిశ్చితార్థాలు, గృహ ప్రవేశాలు, ఉపనయనాలు, ఇతర కుటుంబ శుభకార్యాలు కూడా పెద్ద సంఖ్యలో నిర్వహించేందుకు ప్రజలు ఆసక్తి చూపుతున్నారు. కొత్త ఇంట్లోకి ప్రవేశించేందుకు మంచి ముహూర్తం కోసం ఎదురుచూస్తున్న కుటుంబాలు కూడా ఈ కాలాన్ని ఉపయోగించుకునే అవకాశం ఉంది.
