Google Layoffs: మన ఏ చిన్న సమాచారం కోసమైనా గూగుల్ మీద ఆధారపడతాం.. ఏ చిన్న సమస్యను పరిష్కరించుకోవాలన్నా గూగుల్ వైపు చూస్తాం. అక్కడిదాకా ఎందుకు ఉదయం లేచి చేసే బ్రౌజింగ్ నుంచి.. జిపిఎస్ లోకేషన్ ద్వారా ఇతర ప్రాంతాలకు వెళ్లే దాకా అన్నింటా మనకు గూగుల్ సహాయపడుతోంది. ఒకరకంగా చెప్పాలంటే గూగుల్ మన జీవితాల్లో విడదీయరాని బంధాన్ని ఏర్పరచుకుంది అలాంటి గూగుల్ కు పెద్ద కష్టం వచ్చింది.. ఆర్థిక మాంద్యం దెబ్బకు గజగజా వణికి పోతుంది. నిన్న మొన్నటి దాకా ఏం కాదు, మరేం పర్వాలేదు అని దగ్గర నుంచి వామ్మో… మా కిందకు కూడా నీళ్లు వస్తున్నాయి అనే స్థాయికి పరిస్థితి దిగజారింది. మునుముందు ఇది ఎలా ఉంటుందో తెలియదు గానీ… ఇప్పుడైతే సంస్థ ఉద్యోగులపై కత్తి వేలాడుతూనే ఉంది.
మాంద్యం వెంటాడుతున్న నేపథ్యంలో
ఆర్థిక మాంద్యం నేపథ్యంలో ఐటీ కంపెనీలు ఆర్థిక భారాన్ని తగ్గించుకోవడంపై దృష్టి సారించాయి. ఇందులో భాగంగా ఉద్యోగుల తొలగింపు ప్రక్రియ చేపట్టాయి. ఇప్పటికే ట్విట్టర్, అమెజాన్ వంటి దిగ్గజ సంస్థలు ఉద్యోగులకు లే_ ఆఫ్ లు ప్రకటించాయి.. కొద్దిరోజుల క్రితం గూగుల్ కూడా పదివేల మంది ఉద్యోగులపై వేటు వేయనుందనే వార్తలు వచ్చాయి.. ఈ తరుణంలో ఆ సంస్థ ఉద్యోగులు సీఈవో సుందర్ పిచాయ్ వద్ద లే_ ఆఫ్ ల గురించి స్పష్టత ఇవ్వాలని ప్రస్తావించారు. ఈ సమయంలో ఆయన భవిష్యత్తు గురించి తాను స్పష్టంగా చెప్పబోనని వివరించారు.
ముప్పు తప్పదు
వాస్తవానికి టెక్ కంపెనీలకు ప్రధానాదాయం కొనుగోళ్ళ ద్వారా వస్తుంది. యూరో జోన్ లో అనిశ్చిత పరిస్థితులు, అమెరికన్ మార్కెట్ లో ధరల పెరుగుదల, ఉక్రెయిన్, రష్యా యుద్ధం ఇవన్నీ కూడా… మార్కెట్ ను అతలాకుతలం చేస్తున్నాయి.. దీంతో చాలావరకు ప్రకటనల ఆదాయం గూగుల్ కోల్పోవాల్సి వస్తోంది. దీంతో కంపెనీ ఆదాయం పడిపోతున్నది. అయితే ఉద్యోగుల తొలగింపు పై గూగుల్ ఇంతవరకు ఎటువంటి ప్రకటన చేయలేదు. రాబోయే రోజుల్లో గూగుల్ మాతృ సంస్థ ఆల్ఫాబెట్ మొత్తం ఉద్యోగుల్లో ఆరు శాతం మందిని తొలగిస్తుందని ఊహాగానాలు వినిపిస్తున్నాయి.. అయితే కంపెనీ అంచనాలకు అనుగుణంగా పనిచేయని ఉద్యోగుల జాబితాను సిద్ధం చేయాలని పలు విభాగాల మేనేజర్లను కోరినట్లు సమాచారం.. పనితీరు సరిగా లేని ఉద్యోగులను గుర్తించేందుకు గూగుల్ కొత్త మేనేజ్మెంట్ సిస్టాన్ని కూడా పరిచయం చేసినట్టు తెలుస్తోంది. ఆ నివేదికల ఆధారంగా కొత్త సంవత్సరంలో తొలగింపులు ఉంటాయని వార్తలు వినిపిస్తున్నాయి.. ఇక ప్రస్తుతం గూగుల్ కు సంబంధించిన వివిధ సంస్థల్లో 1,87,000 మంది పనిచేస్తున్నారు.. ఈ ఏడాది నాలుగో త్రైమాసికంలో రిక్రూట్మెంట్ ప్రక్రియ ను నెమ్మదిగా చేయాలని కంపెనీ ఇప్పటికే ప్రకటించింది. దీంతో కంపెనీ సీఈవో సుందర్ పిచాయ్ చేసిన వ్యాఖ్యలు ఉద్యోగుల లే ఆఫ్ వార్తలను నిజం చేస్తున్నాయి. అయితే మునుముందు ఇది ఎటువంటి పరిస్థితులకు దారితీస్తుందో చూడాలి.
