PV Sindhu Japan Open : భారత బ్యాడ్మింటన్ స్టార్ పీవీ.సిందు మరో చరిత్ర సృష్టించింది. రెండు మూడేళ్లుగా వరుస పరాజయాలు ఎదురైనా ఎక్కడా నిరాశ చెందలేదు. ఓటమినే గులుపుకు నాందిగా భావించింది. పడి లేచిన కెరటంలా ఇప్పటి వరకు భారత బ్యాడ్మింటన్ చరిత్రలో ఎవరికీ సాధ్యం కాని టైటిల్ గెలిచి రికార్డు సృష్టించింది. జపాన్ ఓపెన్ సూపర్ 750 టైటిల్ను కైవసం చేసుకోవడంతో మరోసారి చరిత్ర సృష్టించింది. ఈ విజయం ఆమె కెరీర్లోనే కాకుండా దేశంలోని ఏ ఇతర షట్లర్ సాధించని ఘనతగా నిలిచింది.
అనన్యమైన ఘనతలు
సింధు ఒలింపిక్లో రెండు పతకాలు సాధించిన ఏకైక భారత షట్లర్. బీడబ్ల్యూఎఫ్ వరల్డ్ ఛాంపియన్షిప్స్లో బంగారు పతకం కూడా ఆమెకే సొంతం. జపాన్ ఓపెన్ సూపర్ 750 టైటిల్ను గెలుచుకున్న ఏకైక భారత మహిళా షట్లర్ కూడా ఆమె. ఏ భారతీయుడు గతంలో ఈ ప్రతిష్ఠాత్మక టోర్నమెంట్ ఫైనల్లో విజయం సాధించలేదు. ఈ రికార్డులు ఆమెను భారత బ్యాడ్మింటన్ చరిత్రలో విశిష్ట స్థానంలో నిలబెడతాయి.
నాలుగేళ్ల సవాళ్ల తర్వాత..
2022లో సింగపూర్ ఓపెన్ వంటి పెద్ద టైటిల్ తర్వాత సింధు పెద్ద టోర్నమెంట్లలో విజయాలు సాధించడం కష్టమైంది. గాయాలు, ఫాం కోల్పోవడం వంటి అడ్డంకులు ఆమెను బాగా ఇబ్బంది పెట్టాయి. ఒక దశలో ఆమె ఆట నుండి దూరం అవుతుందేమోనని అభిమానులు ఆందోళన చెందారు. 2024లో సయ్యద్ మోదీ ఇంటర్నేషనల్ వంటి చిన్న టోర్నమెంట్లో విజయం సాధించినప్పటికీ, అది ఆమె సామర్థ్యానికి పూర్తి న్యాయం చేయలేదు. జపాన్ ఓపెన్ విజయం ఆమె స్థిరత్వం, మానసిక బలం ఎంత ముఖ్యమో చాటి చెప్పింది.
ఫైనల్ వరకు ప్రయాణం..
టోర్నమెంట్లో కొంతమంది ప్రత్యర్థులు మధ్యలో వైదొలగడంతో సింధు ఫైనల్కు సులభంగా చేరుకున్నట్లు కొందరు భావించారు. కానీ ఆమె క్వార్టర్ ఫైనల్ వరకు టాప్ ర్యాంకర్లపై ఆధిపత్యం చూపించింది. ఫైనల్లో జపాన్ స్టార్ యమగుచిని ఎదుర్కొన్నప్పుడు మొదటి పాయింట్ నుంచే ఆమె ఆటలో నియంత్రణ సాధించింది. ప్రత్యర్థిని వెనక్కి నెట్టుకుంటూ, స్థిరంగా ముందుకు సాగడం ఆమె అనుభవం, సాంకేతిక నైపుణ్యం ఎంత ఎత్తుకు చేరిందో చూపించింది. ఈ విజయంతో ఆమె మళ్లీ అత్యున్నత స్థాయికి చేరుకుంది.
కుటుంబం, భర్త మద్దతు..
సింధు విజయాల వెనుక ఆమె కుటుంబం ఎప్పుడూ మద్దతుగా ఉంది. తల్లిదండ్రులు కూడా క్రీడాకారులు కావడం ఆమెకు ప్రారంభం నుంచి సరైన వాతావరణం అందించింది. 2024 డిసెంబర్లో వివాహం అయిన దత్త సాయి ఆమె కెరీర్లో కీలక పాత్ర పోషిస్తున్నారు. డేటా సైంటిస్ట్గా ఉన్న ఆయన, మ్యాచ్ విశ్లేషణలు, మానసిక మద్దతు అందిస్తున్నారు. గతంలో ఆస్ట్రేలియన్ ఓపెన్ సమయంలో ఆమె మానసికంగా ఇబ్బంది పడినప్పుడు కోచ్లా మారి సాయపడ్డారు. ప్రతీ టోర్నమెంట్కు ఆమెతో పాటు ప్రయాణించడం ఆమె ఫోకస్ను పెంచుతోంది.
సాధించాల్సిన లక్ష్యాలు..
ఈ విజయం సింధుకు కేవలం ఒక టైటిల్ కాదు. ఆమె ఇంకా అనేక లక్ష్యాలు సాధించాల్సి ఉందని చాటుతోంది. గతంలో ఎదురైన ఓటముల నుంచి నేర్చుకుని, మరింత బలంగా ముందుకు సాగడం ఆమె స్వభావం. ఈ విజయం యువ క్రీడాకారులకు ప్రేరణగా నిలుస్తుంది. మానసిక బలం, కుటుంబ సహకారం, నిరంతర కృషి ఎంత ముఖ్యమో సింధు కథ చెబుతోంది.
సింధు ఇప్పుడు మళ్లీ ప్రపంచ స్థాయిలో పోటీ పడే స్థితిలో ఉంది. ఆమె తదుపరి ప్రదర్శనలు భారత బ్యాడ్మింటన్కు మరిన్ని గర్వకారణాలు అవుతాయని ఆశిద్దాం.
