Train Engine  : ఏం దొంగలు రా బాబూ.. సొరంగం తవ్వి రైలు ఇంజిన్ నే దొంగలించారు..

Train Engine  : వీళ్లు మామూలు దొంగలు కాదు.. ఆవళిస్తే పేగులు లెక్కబెట్టే రకం.. ఏకంగా సొరంగం తవ్వి మరీ రైలు ఇంజిన్ నే దొంగలించారంటే వీరి దొంగతనం ఏ రేంజ్ లో ఉందో అర్థం చేసుకోవచ్చు. తాజాగా బీహార్‌లోని బెగుసరాయ్ జిల్లాలోని రైల్వే యార్డ్ లో మొత్తం డీజిల్ ఇంజన్ ను పాక్షికంగా దొంగిలించబడినట్లు పోలీసులు శుక్రవారం తెలిపారు. యార్డ్‌కు సొరంగం తవ్వి మరీ దొంగలు విడిభాగాలను దొంగిలించడం ప్రారంభించారని, మరమ్మతుల కోసం అక్కడకు తీసుకువచ్చిన మొత్తం ఇంజిన్‌ను నెమ్మదిగా లూటీ చేశారని పోలీసులు తెలిపారు.

“గత వారం, గర్హరా యార్డ్‌కు మరమ్మతుల కోసం తీసుకువచ్చిన డీజిల్ ఇంజిన్ దొంగిలించబడిందని బరౌని పోలీస్ స్టేషన్‌లో కేసు నమోదైంది. దర్యాప్తులో ముగ్గురిని అరెస్టు చేశాము” అని రైల్వే ప్రొటెక్షన్ ఇన్‌స్పెక్టర్ పిఎస్ దూబే తెలిపారు. విచారణ సందర్భంగా వారు ఇచ్చిన సమాచారం ఆధారంగా ముజఫర్‌పూర్ జిల్లా ప్రభాత్ నగర్ ప్రాంతంలోని ఓ స్క్రాప్ గోడౌన్‌లో సోదాలు నిర్వహించగా 13 బస్తాల నిండా రైలు విడిభాగాలు లభించాయని తెలిపారు. స్క్రాప్ గోడౌన్ యజమాని కోసం అన్వేషణ జరుగుతోందని ఆయన తెలిపారు.

స్వాధీనం చేసుకున్న వస్తువులలో ఇంజిన్ భాగాలు, పాతకాలపు రైలు ఇంజిన్ల చక్రాలు, భారీ ఇనుముతో తయారు చేసిన రైల్వే భాగాలు ఉన్నాయని ఆయన తెలిపారు. “వారు రైల్వే యార్డుకు సొరంగం తవ్వారు. దాని ద్వారా రైలు లోకోమోటివ్ భాగాలు, ఇతర వస్తువులను బస్తాలలో తీసుకు వెళ్లేవారు” అని తెలిపారు. స్టీల్ బ్రిడ్జిలను విప్పి వాటి భాగాలను ఈ ముఠా దొంగిలించిందని తెలిపారు.

గత సంవత్సరం కూడా సమస్తిపూర్ రైల్వే ఇంజనీర్‌ పూర్నియా కోర్టు ఆవరణలో ఉంచిన పాత ఆవిరి ఇంజిన్‌ను విక్రయించారనే ఆరోపణలతో సస్పెండ్ చేశారు. ఇంజనీర్ ఇతర రైల్వే అధికారులు , భద్రతా సిబ్బందితో కలిసి ఇంజిన్‌ను విక్రయించడానికి సమస్తిపూర్ డివిజనల్ మెకానికల్ ఇంజనీర్ నుండి నకిలీ లేఖను ఉపయోగించాడు. ఇప్పుడు ఏకంగా దొంగలు ఒక రైలు ఇంజిన్ నే అపహరించడం చర్చనీయాంశమైంది.