RBI : లోన్ తీసుకున్నారా? మీ EMI తగ్గబోతోంది.. ఆర్బీఐ సంచలన నిర్ణయం

RBI : గృహ రుణాల భారం మోస్తున్న వారికి రిజర్వ్ బ్యాంక్ ఆఫ్ ఇండియా (RBI) మరోసారి శుభవార్త చెప్పింది. తాజాగా రెపో రేట్‌ను 25 బేసిస్ పాయింట్లు తగ్గించింది. ఈ ఏడాదిలో ఇది రెండోసారి. ఫిబ్రవరిలోనూ ఇదే స్థాయిలో తగ్గించిన RBI, ఇప్పుడు మళ్లీ అదే నిర్ణయం తీసుకోవడం గమనార్హం. తాజా తగ్గింపుతో రెపో రేటు 6.25% నుంచి 6%కి చేరింది. భవిష్యత్తులో మరిన్ని తగ్గింపులు ఉండొచ్చనే సంకేతాలిస్తూ RBI తన విధానాన్ని ‘తటస్థం’ నుంచి ‘సర్దుబాటు’ ధోరణికి మార్చింది.

ఫ్లోటింగ్ రేటుపై గృహ రుణం తీసుకున్న వారికి ఈ నిర్ణయం వల్ల EMI భారం కాస్త తగ్గుతుంది. ముఖ్యంగా 2019 అక్టోబర్ 1 తర్వాత తీసుకున్న రుణాలకు ఇది వర్తిస్తుంది. బ్యాంకులు ఈ మేరకు వడ్డీ రేట్లను సవరిస్తాయి. కొత్తగా రుణం తీసుకునే వారికి కూడా తక్కువ వడ్డీకే రుణాలు పొందే అవకాశం ఉంటుంది.

Also Read : ఆర్‌బీఐ నుంచి కొత్త అప్‌డేట్‌.. రూ.500, రూ.10 కొత్త నోట్లు.. మరి పాతవి?

RBI రెండు దఫాల్లో కలిపి 50 బేసిస్ పాయింట్లు తగ్గించడం వల్ల EMI కొంత మేర తగ్గుతుంది. ఉదాహరణకు 20 ఏళ్ల కాలవ్యవధితో రూ.50 లక్షల రుణంపై వడ్డీ రేటు 9% ఉంటే, EMI సుమారు రూ.1600 వరకు తగ్గే అవకాశం ఉంది. అయితే, ఇది రుణ మొత్తం, కాలవ్యవధిపై ఆధారపడి ఉంటుంది.

బ్యాంకులు ఈ తగ్గింపును ఎంత త్వరగా అమలు చేస్తాయనే దానిపైనే అసలు ప్రయోజనం ఉంటుంది. ఎక్స్‌టర్నల్ బెంచ్‌మార్క్ లెండింగ్ రేటు (EBLR)పై తీసుకున్న రుణాలకు ఇది త్వరగా వర్తిస్తుంది. రుణ గ్రహీతలు EMI తగ్గించుకోవడం లేదా రుణ కాలవ్యవధి తగ్గించుకోవడం అనే రెండు ఆప్షన్లను పరిశీలించవచ్చు. కాలవ్యవధి తగ్గించుకోవడం దీర్ఘకాలంలో ఎక్కువ వడ్డీ ఆదా చేయడానికి మంచిదని నిపుణులు సూచిస్తున్నారు.

RBI నిర్ణయం రియల్ ఎస్టేట్ రంగానికి కూడా సానుకూలంగా ఉంటుందని క్రెడాయ్ వంటి సంస్థలు ఆశాభావం వ్యక్తం చేస్తున్నాయి. వడ్డీ రేట్లు తగ్గడం వల్ల గృహ కొనుగోళ్లు పెరుగుతాయని వారు భావిస్తున్నారు. మొత్తానికి, RBI తీసుకున్న ఈ నిర్ణయం గృహ రుణదారులకు కొంత ఊరటనిస్తుంది. అయితే, బ్యాంకులు దీనిని ఎలా అమలు చేస్తాయో వేచి చూడాలి. తెలివైన నిర్ణయాలు తీసుకోవడం ద్వారా రుణ భారాన్ని తగ్గించుకునే అవకాశం ఉంది.

Also Read : ఆర్‌బీఐ డిప్యూటీ గవర్నర్‌గా మహిళకు ఛాన్స్‌.. కేంద్రం కీలక నిర్ణయం!