Anti Begging Law : భయపెడుతున్న కొత్త చట్టం.. బిచ్చం అడిగితే అరెస్ట్.. జైలు..

Anti Begging Law : భారతదేశంలో భిక్షాటన సమస్యపై వివిధ రాష్ట్రాలు చర్యలు తీసుకుంటున్నాయి. అయితే, మధ్యప్రదేశ్ ప్రభుత్వం దీన్ని మరింత కఠినంగా నియంత్రించేందుకు కొత్త చట్టాన్ని అమలు చేయడంతో ఈ అంశం దేశవ్యాప్తంగా చర్చనీయాంశమైంది. తాజాగా, భోపాల్‌లో ట్రాఫిక్ సిగ్నల్ వద్ద బిచ్చం అడుగుతున్న ఓ వ్యక్తిని పోలీసులు అరెస్టు చేశారు.

బిచ్చం అడగడం, వేయడం రెండూ నేరమే!
భోపాల్‌లో ఓ వ్యక్తి వాహనదారులకు ఇబ్బంది కలిగిస్తూ భిక్షాటన చేస్తుండడంతో, స్థానికంగా ఉన్న ఓ పౌరుడు పోలీసులకు ఫిర్యాదు చేశాడు. వెంటనే స్పందించిన పోలీసులు అతడిని అదుపులోకి తీసుకున్నారు. ఇటీవల మధ్యప్రదేశ్ ప్రభుత్వం భిక్షాటన నిరోధక చట్టాన్ని ప్రవేశపెట్టింది. ఈ చట్టం ప్రకారం బిచ్చం అడిగినా, యాచకులకు దానం చేసినా, రెండూ నేరంగా పరిగణించబడతాయి.

ఇండోర్‌లో మరో కేసులో ఓ గుడి ముందు అడుక్కుంటున్న యాచకురాలికి ఓ వ్యక్తి డబ్బు ఇచ్చాడు. దీంతో అతనిపై భారతీయ న్యాయ సంహిత (BNS) సెక్షన్ 223 కింద కేసు నమోదు చేశారు. ఈ రెండు కేసులూ దేశవ్యాప్తంగా కలకలం రేపాయి.

భారత ప్రభుత్వ ప్రణాళిక – 10 నగరాల్లో పైలట్ ప్రాజెక్ట్
భిక్షాటన నిర్మూలన కోసం కేంద్ర ప్రభుత్వం 10 ప్రధాన నగరాల్లో పైలట్ ప్రాజెక్ట్ ప్రారంభించింది. ఇందులో హైదరాబాద్, ఢిల్లీ, బెంగళూరు, చెన్నై, ఇండోర్ వంటి నగరాలు ఉన్నాయి. ఈ నగరాల్లో ఎవరైనా బిచ్చం అడిగినా, ఎవరో ఒకరు బిచ్చం వేశినా, పోలీసులు వారిపై చర్యలు తీసుకుంటారు. దీనివల్ల యాచకుల సంఖ్య తగ్గించడంతో పాటు, ట్రాఫిక్ సమస్యలు పరిష్కరించే అవకాశం ఉంది.

అక్రమ భిక్షాటన మాఫియాలకు చెక్!
భారతదేశంలో బిచ్చగాళ్ల మాఫియాలు పనిచేస్తున్నాయని, ఇవి చిన్న పిల్లలను బలవంతంగా భిక్షాటనకు వినియోగిస్తున్నాయని అనేక ఆరోపణలు ఉన్నాయి. కొంతమంది భిక్షగాళ్లు అసలు పేదలే కాదని, వారికి వాహనాలు, ఇళ్లు, బ్యాంక్ ఖాతాల్లో డిపాజిట్లు ఉన్నప్పటికీ, ప్రజల జాలిని ఆసరాగా చేసుకుని యాచకత్వాన్ని వ్యాపారంగా మార్చుకున్నారని అధికారవర్గాలు చెబుతున్నాయి. భిక్షాటనపై మధ్యప్రదేశ్ ప్రభుత్వం తీసుకుంటున్న చర్యలు దేశవ్యాప్తంగా చర్చనీయాంశంగా మారాయి. భవిష్యత్తులో మరిన్ని రాష్ట్రాలు ఇలాంటి చట్టాలను అమలు చేసే అవకాశం ఉంది. ప్రభుత్వం పేదలకు సహాయం చేసే మరింత మెరుగైన విధానాలను అన్వేషించాలని నిపుణులు సూచిస్తున్నారు.