Tata Group: భారతీయ కార్పొరేట్ రంగంలో ‘టాటా’ (TATA) గ్రూప్ మరోసారి తన తిరుగులేని ఆధిపత్యాన్ని చాటుకుంది. ప్రముఖ బ్రాండ్ వాల్యుయేషన్ కన్సల్టెన్సీ సంస్థ ‘బ్రాండ్ ఫైనాన్స్’ తాజాగా విడుదల చేసిన నివేదిక ప్రకారం.. దేశంలోనే అత్యంత విలువైన టాప్ 100 బ్రాండ్ల జాబితాలో టాటా గ్రూప్ మొదటి స్థానాన్ని కైవసం చేసుకుంది. విశేషం ఏమిటంటే ఈ జాబితాలో టాటా అగ్రస్థానంలో నిలవడం ఇది వరుసగా 10వ సారి. టాటా తరువాత ఇంకా ఏమేం సంస్థలు ఉన్నాయో చూద్దాం..
ప్రస్తుతం టాటా గ్రూప్ బ్రాండ్ విలువ రూ. 3.24 లక్షల కోట్లకు (సుమారు 39 బిలియన్ డాలర్లు) చేరినట్లు ‘బ్రాండ్ ఫైనాన్స్’ నివేదిక వెల్లడించింది. వైవిధ్యభరితమైన వ్యాపారాలు, నమ్మకమైన సేవలు, ప్రపంచవ్యాప్తంగా ఉన్న విస్తృతి టాటా బ్రాండ్ విలువను ఇంతలా పెంచడానికి ప్రధాన కారణాలుగా నిలిచాయి.
టాప్ 5 లో నిలిచిన ఇతర దిగ్గజాలు
ఈ జాబితాలో టాటా తర్వాత ఐటీ దిగ్గజం ఇన్ఫోసిస్ (Infosys) ద్వితీయ స్థానాన్ని దక్కించుకుంది. ఇన్ఫోసిస్ బ్రాండ్ విలువ రూ. 1.58 లక్షల కోట్లుగా నమోదైంది. ఆ తర్వాతి స్థానాల్లో దేశీయ బ్యాంకింగ్, భీమా రంగానికి చెందిన ప్రముఖ సంస్థలు నిలిచాయి.
రెండో స్థానం: ఇన్ఫోసిస్ (రూ. 1.58 లక్షల కోట్లు)
మూడో స్థానం: ఎల్ఐసీ – LIC (రూ. 1.47 లక్షల కోట్లు)
నాలుగో స్థానం: హెచ్డీఎఫ్సీ బ్యాంక్
ఐదో స్థానం: రిలయన్స్ ఇండస్ట్రీస్
భారత ఆర్థిక వ్యవస్థ జోరుకు నిదర్శనం
ఈ నివేదిక ప్రకారం, భారతదేశంలోని టాప్ 100 బ్రాండ్ల మొత్తం సంయుక్త విలువ రూ. 24.34 లక్షల కోట్లకు చేరింది. ఇది భారతీయ కంపెనీల బ్రాండ్ ఇమేజ్ అంతర్జాతీయ స్థాయిలో ఎంతలా బలపడుతుందో తెలియజేస్తోంది. బ్యాంకింగ్, ఐటీ, టెలికాం, ప్యాకేజ్డ్ గూడ్స్ వంటి రంగాలు ఈ వృద్ధిలో కీలక పాత్ర పోషించాయి.
గత కొన్ని ఏళ్లుగా ఎదురవుతున్న ప్రపంచ ఆర్థిక సవాళ్లను తట్టుకుని మరీ భారతీయ బ్రాండ్లు ఇంతటి వృద్ధిని నమోదు చేయడం విశేషం. ముఖ్యంగా డిజిటలైజేషన్, కస్టమర్ నమ్మకాన్ని గెలుచుకోవడం వల్లే ఈ బ్రాండ్ల విలువ భారీగా పెరిగినట్లు విశ్లేషకులు చెబుతున్నారు.
