Vijay Deverakonda: కొంతమంది హీరోలు ఏమి చేసినా అదొక న్యూస్ గానే నిలుస్తుంది. అలాంటి హీరోల్లో ముందుంటారు మన యంగ్ హీరో విజయ్ దేవరకొండ. తన యటిట్యూడ్ ద్వారా రౌడీ హీరోగా పేరు తెచ్చుకున్న విజయ్ ఈ మధ్య సమంతా హీరోయిన్ గా చేసిన కృషి సినిమాతో ఒక మంచి ఫ్యామిలీ హిట్ అందుకున్నాడు. ఈ సినిమా తమిళంలో, యూఎస్ లో సూపర్ హిట్ గా నిలవగా..తెలుగు రాష్ట్రాల్లో మాత్రం పర్వాలేదు అనిపించుకుంది.
ఇక సినిమాల విషయం పక్కనపడితే విజయ్ సేవా కార్యక్రమాల్లో చురుకుగా పాల్గొంటూ ఉంటారు. కోవిడ్ లాక్డౌన్ సమయంలో మధ్యతరగతి కుటుంబాలకు అండగా నిలిచారు. వారికి నిత్యవసర సరుకులు అందజేశారు. ఇక అదే తీరని కొనసాగిస్తూ ఇటీవల ‘ఖుషి’ సక్సెస్ మీట్ లో భాగంగా వైజాగ్ వెళ్లిన విజయ్ దేవరకొండ.. అక్కడ ఒక ప్రకటన చేశారు. ‘ఖుషి’ సినిమా ద్వారా తనకు వచ్చిన రెమ్యునరేషన్లో కోటి రూపాయలను 100 కుటుంబాలకు విరాళంగా ఇస్తానని ప్రకటించారు.
ఇక తన మాటను రుజువు చేస్తూ.. రెండు తెలుగు రాష్ట్రాల నుంచి 100 కుటుంబాలను ఎంపిక చేసి ఒక్కో కుటుంబానికి లక్ష రూపాయల చెక్ను స్వయంగా అందించారు. హైదరాబాద్లో ‘స్ప్రెడింగ్ ఖుషి’ అనే ఈవెంట్ను నిర్వహించి చెక్లు అందజేశారు. ఈ ఫంక్షన్ లో భాగంగా విజయ్ దేవరకొండ మాట్లాడుతూ.. ‘ఏవేవో చేయాలనిపిస్తుంది. ఈరోజు మీతో ఇలాంటి చిన్న చిన్న మూమెంట్స్ క్రియేట్ చేయగలుగుతున్నా, చేయాలనుకున్నవి చేయగలుగుతున్నా అంటే ఈ శక్తి, సంపాదన, స్థాయి, ధైర్యం నాకు ఇచ్చినందుకు నా అమ్మానాన్నలకి, తెలుగు ప్రజలకి, నా టీమ్కి, ఆ దేవుడికి దండం పెట్టుకోవాలి. నేను యాక్టర్ అయినప్పటి నుంచీ ఇవన్నీ చేస్తున్నాను. కానీ ఎవ్వరికీ తెలియనది ఏంటంటే.. ఇవన్నీ నా వ్యక్తిగత కోరికలు. అంటే, నేను పెరుగుతున్నప్పుడు ఇవన్నీ నేను కోరుకున్నాను. ఈరోజు ఆ కోరికలను నేను తీరుస్తున్నాను’ అని చెప్పుకొచ్చారు ఈ హీరో.
ఇక తాను చిన్నప్పుడు ఎదుర్కొన్న కష్టాల గురించి మాట్లాడుతూ..’నేను డిగ్రీలో ఉన్నప్పుడు నా తమ్ముడు ఇంజినీరింగ్ జాయిన్ అవ్వాలి. డిగ్రీకి ఫీజు చాలా తక్కువ. ఇంజినీరింగ్ ఫీజు ఎక్కువ ఉంటుంది. నా తమ్ముడికి ఫీజు కట్టడానికి ఇంట్లో అమ్మానాన్న పడిన ఒత్తిడి, ఒకరిని అడగలేము అడిగితే ఏమనుకుంటారు అని వాళ్లు పడే వేదన చూశాను. అయినప్పటికీ పిల్లల కోసం అప్పులు చేయడానికి కూడా వెనకాడకుండా వాళ్లు ఎంత కష్టపడతారో చూశాను. ఎవరైనా ఒక లక్ష రూపాయలు ఇస్తే మనకు హెల్ప్ అయ్యేది కదా అని అప్పుడు నేను అనుకునేవాడిని. ఎలాగోలా అవన్నీ దాటుకుని ఈరోజు నేను ఈ స్థితిలో ఉన్నాను. మీకు ఒక ఫ్యామిలీలా ఉన్నాను. ఈరోజు మీ అందరికీ సాయం చేయగలుగుతున్నందుకు నాకు చాలా ఆనందంగా ఉంది’ అని తెలియజేశారు.
‘మీకు ఈ లక్ష రూపాయలు అందిన తరవాత మీ లైఫ్లో కొంచెం సంతోషం, కొంచెం ఒత్తిడి నుంచి బయటపడడం, ఈ డబ్బు ఏదో ఒక పనికి ఉపయోగపడి మీకు కొంచెం అండగా ఉంటే నాకు చాలా తృప్తిగా ఉంటుంది. ఈ చిన్న సాయం మీకు సాయపడుతుందని అనుకుంటున్నాను. నాకు ఎవరూ థాంక్యూలు అవీ చెప్పొద్దు. ఇది మీతో షేర్ చేసుకోవాలి అంతే. ఒక్క బాధ ఏంటంటే.. కేవలం 100 కుటుంబాలకు మాత్రమే సాయం చేయగలుగుతున్నాను. నేను వైజాగ్లో ప్రకటించిన వెంటనే మాకు దాదాపు 50వేలకు పైగా అప్లికేషన్స్ వచ్చాయి. మేము ఒక్కరోజు మాత్రమే ఉంచి ఆపేశాం. ఎందుకంటే మేమిచ్చేది 100 కుటుంబాలకు మాత్రమే కాబట్టి. ఆ 50వేల కుటుంబాల్లో మా టీమ్ ఇక్కడున్న 100 కుటుంబాలను ఎంపిక చేసింది.ఇంకా ఎంతో మందికి చేయాలనే కోరిక నాకు ఉంది. ప్రస్తుతానికి నేను చేయలేను. కానీ, దరఖాస్తు చేసుకుని నా సాయం అందుకోలేకపోయిన కుటుంబాలకు మాటిస్తున్నా.. నాకు సంపాదన ఉన్నన్నిరోజులు నేను ప్రతి సంవత్సరం ఏదో ఒక రకంగా సాయం చేస్తూనే ఉంటాను. ఈరోజు 100 కుటుంబాలు ఇక్కడున్నాయి. మిగిలిన వారందరి దగ్గరికి నేను చేరుకోలేకపోయి ఉండొచ్చు.. రాబోయే ప్రతి సంవత్సరం ఇంకొందరి దగ్గరికి, మరికొందరి దగ్గరికి చేరుకుంటూనే ఉంటా. ఏదో ఒక సాయం చేస్తూనే ఉంటాను’ అంటూ చెప్పుకొచ్చారు విజయ్ దేవరకొండ.
