Suzuki V-Strom SX : అడ్వెంచర్ టూరింగ్ బైక్‌లకు భారత్‌లో పెరుగుతున్న ఆదరణను దృష్టిలో పెట్టుకుని సుజుకి మోటార్‌సైకిల్ ఇండియా తన V-Strom SXలో కొత్త కలర్ ఆప్షన్‌ను అందుబాటులోకి తీసుకొచ్చింది. Glass Sparkle Black + Metallic Matte Fibroin Gray పేరుతో వచ్చిన ఈ కొత్త షేడ్‌కు రివైజ్డ్ గ్రాఫిక్స్‌ను కూడా జోడించింది. అయితే బైక్ డిజైన్, ఇంజిన్, ఫీచర్లు, పనితీరు విషయంలో ఎలాంటి మార్పులు చేయలేదు. కొత్త కలర్‌తో V-Strom SX ప్రారంభ ధర రూ.2,02,118 (ఎక్స్-షోరూమ్, ఢిల్లీ)గా ఉంది.
మరిన్ని కలర్ ఆప్షన్లు
కొత్త కలర్‌తో కలిపి సుజుకి V-Strom SX ప్రస్తుతం పలు రంగుల్లో లభిస్తోంది. Champion Yellow No. 2 + Glass Sparkle Black, Pearl Glacier White + Metallic Matte Stellar Blue, Glass Sparkle Black కలర్ ఆప్షన్లు ఇప్పటికే కొనసాగుతున్నాయి. కొత్త షేడ్ ద్వారా యువ రైడర్లకు, అడ్వెంచర్ టూరింగ్‌ను ఇష్టపడేవారికి మరింత ఆకర్షణీయమైన ఎంపికను అందించాలని కంపెనీ భావిస్తోంది.
అంతేకాకుండా V-Strom SX కొనుగోలు చేసే కస్టమర్లకు రూ.5,000 విలువైన Rynox అపారెల్ వోచర్ను సుజుకి అందిస్తోంది. అర్హతలకు లోబడి 100 శాతం వరకు రుణ సదుపాయం కూడా లభిస్తుంది. వడ్డీ రేట్లు 6.99 శాతం నుంచి ప్రారంభమవుతాయని కంపెనీ వెల్లడించింది.
249cc ఇంజిన్.. 6-స్పీడ్ గేర్‌బాక్స్
మెకానికల్‌గా ఎలాంటి మార్పులు లేని V-Strom SXలో 249cc, సింగిల్-సిలిండర్, ఆయిల్-కూల్డ్ SOHC ఇంజిన్ ఉంటుంది. ఈ ఇంజిన్ గరిష్ఠంగా 26.5hp పవర్‌ను 9,300rpm వద్ద, 22.2Nm టార్క్‌ను 7,300rpm వద్ద ఉత్పత్తి చేస్తుంది. దీనికి 6-స్పీడ్ గేర్‌బాక్స్‌ను అనుసంధానం చేశారు.
అడ్వెంచర్ టూరింగ్‌కు అనుగుణంగా ఈ బైక్‌లో 19 అంగుళాల ఫ్రంట్, 17 అంగుళాల రియర్ వీల్స్ ఉన్నాయి. 205mm గ్రౌండ్ క్లియరెన్స్, డ్యూయల్-ఛానల్ ABS వంటి ఫీచర్లు ఉన్నాయి. బీక్-స్టైల్ ఫ్రంట్ డిజైన్, స్లిమ్ అండ్ లైట్‌వెయిట్ ఛాసిస్, అప్‌రైట్ రైడింగ్ పొజిషన్ V-Strom SXకు ప్రత్యేక గుర్తింపును ఇస్తాయి.
ఫీచర్లకు కొదవలేదు
V-Strom SXలో LED లైటింగ్, Suzuki Easy Start System, బ్లూటూత్ కనెక్టివిటీతో కూడిన డిజిటల్ ఇన్‌స్ట్రుమెంట్ క్లస్టర్ ఉన్నాయి. ఇందులో Suzuki Ride Connect సదుపాయం కూడా లభిస్తుంది. అదనంగా విండ్‌స్క్రీన్, నకిల్ కవర్లు, USB ఛార్జింగ్ పోర్ట్, రియర్ క్యారియర్ వంటి టూరింగ్‌కు ఉపయోగపడే పరికరాలను అందించారు.
లడఖ్‌లో V-Strom SX ఎక్స్‌పెడిషన్
సుజుకి ప్రస్తుతం రెండో V-Strom SX Expedition to Ladakh కార్యక్రమాన్ని నిర్వహిస్తోంది. సెప్టెంబర్ 29న ఢిల్లీ నుంచి ప్రారంభమైన ఈ ఎక్స్‌పెడిషన్ అక్టోబర్ 9 వరకు కొనసాగనుంది. ఈ ప్రయాణంలో లేహ్, నుబ్రా వ్యాలీ, పాంగాంగ్ త్సో, హన్లే వంటి ప్రాంతాలను రైడర్లు సందర్శిస్తున్నారు. కఠినమైన కొండ ప్రాంతాల్లో V-Strom SX సామర్థ్యాలను ప్రదర్శించడమే ఈ ఎక్స్‌పెడిషన్ లక్ష్యంగా కనిపిస్తోంది.
ప్రత్యర్థులు వీరే
భారత మార్కెట్లో V-Strom SXకు Hero Xpulse 210, TVS Apache RTX 300, Honda XR300L, Honda XR300 Rally వంటి మోడళ్లు పోటీగా ఉన్నాయి. Xpulse 210 ధర రూ.1.68 లక్షల నుంచి రూ.1.77 లక్షల వరకు ఉండగా, TVS Apache RTX 300 ధర రూ.1.99 లక్షల నుంచి రూ.2.39 లక్షల వరకు ఉంది. Honda XR300L రూ.1.83 లక్షలు, XR300 Rally రూ.2.08 లక్షల ధరతో అందుబాటులో ఉన్నాయి.
కొత్త కలర్, రివైజ్డ్ గ్రాఫిక్స్‌తో V-Strom SXలో పెద్దగా మార్పులు లేకపోయినా.. ఇప్పటికే ఉన్న అడ్వెంచర్ టూరింగ్ ప్యాకేజీకి మరింత స్టైలిష్ లుక్‌ను జోడించడం ద్వారా కొత్త కస్టమర్లను ఆకర్షించేందుకు సుజుకి ప్రయత్నిస్తోంది.
