Nara Lokesh : మంగళగిరిలోని టీడీపీ కేంద్ర కార్యాలయంలో విద్య, ఐటీ శాఖల మంత్రి నారా లోకేష్ ప్రజాదర్బార్ నిర్వహించారు. ఈ సందర్భంగా వివిధ సమస్యలపై పార్టీ కేంద్ర కార్యాలయానికి వచ్చిన ప్రజలు, పార్టీ కార్యకర్తలను ఆయన కలుసుకున్నారు. వారి సమస్యలను నేరుగా అడిగి తెలుసుకుని, అర్జీలను స్వీకరించారు.
ప్రజాదర్బార్‌కు పెద్ద సంఖ్యలో ప్రజలు, కార్యకర్తలు హాజరై తమ సమస్యలను మంత్రి నారా లోకేష్ దృష్టికి తీసుకెళ్లారు. వ్యక్తిగత సమస్యలతో పాటు స్థానికంగా ఎదురవుతున్న పలు సమస్యలపై వారు వినతిపత్రాలు అందజేశారు. ప్రతి ఒక్కరి నుంచి అర్జీలను స్వీకరించిన లోకేష్.. సమస్యలను సావధానంగా విన్నారు.
ప్రజలు, కార్యకర్తలు నేరుగా తమ సమస్యలను ప్రభుత్వ పెద్దల దృష్టికి తీసుకెళ్లేందుకు ప్రజాదర్బార్ వేదికగా నిలుస్తోంది. ప్రజల నుంచి వచ్చిన వినతులను పరిశీలించి, సంబంధిత శాఖల అధికారులతో మాట్లాడి పరిష్కారానికి చర్యలు తీసుకునేలా మంత్రి ఆదేశాలు జారీ చేస్తున్నట్లు పార్టీ వర్గాలు తెలిపాయి.
ప్రభుత్వం ప్రజలకు అందుబాటులో ఉండాలనే లక్ష్యంతో ప్రజాదర్బార్‌లను నిర్వహిస్తున్నామని టీడీపీ నేతలు పేర్కొన్నారు. ప్రజలు తమ సమస్యలను నేరుగా మంత్రికి వివరించడంతో పాటు, వాటి పరిష్కారానికి మార్గం సుగమం అవుతోందని తెలిపారు.
