Maruti Suzuki XL6: మారుతి సుజుకి కంపెనీ నుంచి ఇప్పటి వరకు సెడా నుంచి SUV వరకు అనేక కార్లు వచ్చాయి. అయితే MPVలో ఇప్పటి వరకు ఎర్టీగా గురించి మాత్రమే విన్నాం. కానీ బస్సులు, పెద్ద వాహనాల్లో ప్రయాణించే విధంగా తలపించే మరో కారు ఉందన్న విషయం చాలా తక్కువ మందికి తెలుసు. అదే XL6. ఈ కారు రాయల్ లుక్ తో పాటు ఉమ్మడి కుటుంబం కలిసి దూర ప్రయాణాలకు అనుగుణంగా ఉంటుంది. మరి ఈ కారు ధర, ఫీచర్లు ఏ విధంగా ఉన్నాయో తెలుసుకుందాం..
మారుతి సుజుకి XL6 అనేది నెక్సా షోరూమ్ల ద్వారా విక్రయించబడే ఒక ప్రీమియం MPV. ఇది సాధారణ ఫ్యామిలీ కార్లలా కాకుండా, ఒక పవర్ఫుల్ SUV తరహా లుక్ను కలిగి ఉంటుంది. దీని ముందు భాగంలో ఉండే బోల్డ్ గ్రిల్, దాని గుండా సాగే క్రోమ్ లైన్ కారుకు మంచి రాయల్ లుక్ను ఇస్తాయి. నాలుగు చాంబర్లు కలిగిన క్వాడ్ LED హెడ్లాంప్స్, డేటైమ్ రన్నింగ్ లైట్స్, స్మోక్ గ్రే LED టెయిల్ లాంప్స్ రాత్రి వేళల్లో ప్రయాణాన్ని సులభతరం చేస్తాయి. దీనికి ఉండే 16 అంగుళాల డ్యూయల్ టోన్ మెషిన్డ్ అలాయ్ వీల్స్ కారుకు స్పోర్టీ అప్పీయరెన్స్ను ఇస్తాయి.
ఈ కారులో 1.462 cc స్మార్ట్ హైబ్రిడ్ పెట్రోల్ ఇంజిన్ ఉంటుంది. ఇది 101.64 Bhp పవర్ను, 136.8 Nm టార్క్ను ఉత్పత్తి చేస్తుంది. డ్రైవింగ్ అనుభవాన్ని సులభతరం చేయడానికి దీనిలో రెండు రకాల గేర్బాక్స్ ఆప్షన్లు ఉన్నాయి. లాంగ్ రైడ్స్ ఇష్టపడే వారి కోసం 5 స్పీడ్ మాన్యువల్ గేర్బాక్స్, సిటీ ట్రాఫిక్లో హాయిగా డ్రైవ్ చేయడం కోసం 6 స్పీడ్ ఆటోమేటిక్ గేర్బాక్స్ అందుబాటులో ఉన్నాయి.
పెద్ద కారు అనగానే మైలేజ్ తక్కువ ఉంటుందేమో అనే అనుమానం అవసరం లేదు. దీనిలోని స్మార్ట్ హైబ్రిడ్ టెక్నాలజీ (బ్రేక్ ఎనర్జీ రీజెనరేషన్ మరియు ఐడిల్ స్టార్ట్-స్టాప్) వల్ల మైలేజ్ చాలా అద్భుతంగా వస్తుంది. పెట్రోల్ మాన్యువల్ గేర్ బాక్స్ లీటరుకు సుమారు 20.97 కి.మీ, ఆటోమేటిక్ గేర్ బాక్స్ కు 20.27 కి.మీ మైలేజ్ ఇస్తుంది. CNG వేరియంట్ లో 26.32 కి.మీ వరకు వెళ్లొచ్చు.
ఈ కారులో 7 అంగుళాల స్మార్ట్ ప్లే ప్రో టచ్స్క్రీన్ ఇన్ఫోటైన్మెంట్ సిస్టమ్ ఉంది. ఇది వైర్లెస్ ఆండ్రాయిడ్ ఆటో, ఆపిల్ కార్ప్లేలను సపోర్ట్ చేస్తుంది. సంగీత ప్రియుల కోసం ఆర్కమిస్ సౌండ్ సిస్టమ్ అమర్చారు. ఎండ కాలంలో చల్లదనాన్ని ఇచ్చే వెంటిలేటెడ్ ఫ్రంట్ సీట్లు, క్రూయిజ్ కంట్రోల్, ఆటోమేటిక్ క్లైమేట్ కంట్రోల్ ,కారును మొబైల్ ద్వారా ఆపరేట్ చేసుకునే ‘సుజుకి కనెక్ట్’ వంటి అధునాతన ఫీచర్లు ఉన్నాయి.
మారుతి సుజుకి ఈ కార్లో భద్రతకు పెద్దపీట వేసింది. ప్రయాణీకుల రక్షణ కోసం కారు బాడీని సుజుకి హార్ట్టెక్ ప్లాట్ఫారమ్పై నిర్మించారు. బేస్ వేరియంట్ నుండి కారులో 4 నుంచి 6 ఎయిర్బ్యాగ్లు, ABS , EBD తో పాటు ఎలక్ట్రానిక్ స్టెబిలిటీ ప్రోగ్రామ్ వంటి ఫీచర్లను స్టాండర్డ్గా ఇచ్చారు. మారుతి XL6 ప్రధానంగా మూడు వేరియంట్లలో లభిస్తుంది. దీని ఎక్స్-షోరూమ్ ధరలు సుమారు రూ. 11.57 లక్షల నుంచి ప్రారంభమై టాప్ వేరియంట్ రూ. 14.61 లక్షల వరకు అందుబాటులో ఉంది.
