Trump Attack : రిపబ్లికన్ పార్టీ అధ్యక్ష అభ్యర్థి డోనాల్డ్ ట్రంప్ పై హత్యయత్నానికి దారితీసిన భద్రతా లోపాలకు బాధ్యత వహిస్తూ రాజీనామా చేయాలని రిపబ్లికన్, డెమొక్రాటిక్ చట్టసభ సభ్యులు చేసిన డిమాండ్లను యూఎస్ సీక్రెట్ సర్వీస్ డైరెక్టర్ కింబర్లీ చీటెల్ తోసిపుచ్చారు. ఈ ఘటనకు సంబంధించి తగిన వివరాలు ఇవ్వకపోవడంపై సభ్యులు మండిపడ్డారు. యూఎస్ హౌస్ ఆఫ్ రిప్రజెంటేటివ్స్ పర్యవేక్షక కమిటీ రిపబ్లికన్ చైర్మన్ జేమ్స్ కామర్, కమిటీ టాప్ డెమొక్రాట్ జేమీ రాస్కిన్ నుంచి చీటెల్ రాజీనామాకు డిమాండ్లు వచ్చాయి. ‘ఇలాంటి మీటింగ్స్ చాల అరుదుగా జరుగుతాయి. ఈ రోజు మేము నిరాశలో ఏకగ్రీవంగా సమావేశం అయ్యామని నేను అనుకుంటున్నా.’ అని కామెర్ పేర్కొన్నారు. ‘మీరు నాయకత్వం వహించగలరనే నమ్మకం మాకు లేదని’ చీటెల్ ను ఉద్దేశించి అన్నారు. దేశ చరిత్రలో అత్యవసరమైన, సున్నితమైన సమయంలో కాంగ్రెస్ విశ్వాసాన్ని మోసగాళ్లు కోల్పోయారని, దీన్ని అధిగమించాల్సిన అవసరం ఉందని రాస్కిన్ వ్యాఖ్యానించారు. నాలుగున్నర గంటలకు పైగా సాగిన విచారణలో, పెన్సిల్వేనియాలోని బట్లర్ లో జూలై 13న జరిగిన ఓపెన్ ఎయిర్ మీటింగ్ లో జరిగిన కాల్పులను ‘దశాబ్దాల పాటు కొనసాగుతున్న సీక్రెట్ సంస్థ వైఫల్యం’గా చీటెల్ అభివర్ణించారు. ఈ ఘటనను 1981లో మాజీ అధ్యక్షుడు రొనాల్డ్ రీగన్ హత్యాయత్నంతో పోల్చారు. దీన్ని వైఫల్యంగా అంగీకరిస్తున్నప్పటికీ తను రాజీనామా చేయాలని సభ్యుల నుంచి వస్తున్న ఒత్తిడిని చీటెల్ ప్రతిఘటించాడు. ‘ఈ సమయంలో సీక్రెట్ సర్వీస్ కు నాయకత్వం వహించడానికి నేనే ఉత్తమమైన వ్యక్తి అని నేను అనుకుంటున్నా’ అని ఆమె అన్నారు.
ట్రంప్ పై జరిగిన హత్యయత్నంపై కాంగ్రెస్ పర్యవేక్షణ తొలి రౌండ్ ఇది. ర్యాలీలో పాల్గొన్న వారిలో ఒకరు మృతి చెందగా.. మరొకరు గాయపడ్డారు. ఈ ఘటనలో నర్సింగ్ హోమ్ సహాయకుడు థామస్ క్రూక్స్ (20)ను పోలీసులు హతమార్చారు. ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ) డైరెక్టర్ క్రిస్టోఫర్ వ్రే బుధవారం (జూలై 24) రోజున హౌస్ జ్యుడీషియరీ కమిటీ ఎదుట సాక్ష్యం చెప్పనున్నారు. హౌస్ విచారణలను సమన్వయం చేసేందుకు ద్వైపాక్షిక టాస్క్ ఫోర్స్ ను ప్రకటించాలని హౌస్ స్పీకర్ మైక్ జాన్సన్ యోచిస్తున్నారు.
హత్యయత్నం నేపథ్యంలో ట్రంప్‌నకు భద్రతను పెంచినట్లు ఆమె పేర్కొన్నారు. ప్రచారానికి ముందే మాజీ అధ్యక్షుడికి కల్పించిన భద్రత స్థాయి పెరిగిందని, బెదిరింపులు పెరుగుతున్న కొద్దీ భద్రత కూడా పెరుగుతోందని ఆమె చెప్పుకచ్చారు. ట్రంప్ ఎన్నికల క్యాంపెయిన్ భద్రత అభ్యర్థనలను సీక్రెట్ సర్వీస్ తీర్చిందని చీటెల్ పేర్కొన్నారు. రిపబ్లికన్లు, డెమోక్రాట్ల నుంచి వచ్చిన నిర్ధిష్ట ప్రశ్నలకు ఆమె సమాధానం ఇవ్వకపోవడం నిరాశకు గురిచేసింది. ‘ఏం తప్పు జరిగిందో చెప్పండి?’ అని రిపబ్లికన్ ప్రతినిధి పీట్ సెషన్స్ బతిమాలారు. ‘చెప్పండి, మాతో షెల్ గేమ్ ఆడే ప్రయత్నం చేయకు’ అన్నారు
దీనిపై చీటెల్ స్పందిస్తూ కచ్చితమైన సమాచారం ఇవ్వాలనుకున్నానని, అయితే 60 రోజుల్లో ముగియనున్న అంతర్గత దర్యాప్తుతో సహా కొనసాగుతున్న దర్యాప్తులు వివరాలను నిలిపివేసేందుకు కారణమని పేర్కొన్నారు.
ట్రంప్ ప్రచార కార్యక్రమాల్లో అదనపు భద్రత కోసం గతంలో చేసిన అభ్యర్థనలను సీక్రెట్ సర్వీస్ తిరస్కరించిందా? అని రిపబ్లికన్ కాంగ్రెస్ సభ్యుడు జిమ్ జోర్డాన్ చీటెల్ ను ప్రశ్నించడంతో ఆమె మరింత తడబడింది. ‘మీరు కొన్ని ప్రాథమిక ప్రశ్నలకు సమాధానం ఇవ్వరని అనిపిస్తుంది’ అని జోర్డాన్ ఆగ్రహం వ్యక్తం చేశారు. ‘భూమిపై అత్యంత ప్రసిద్ధి చెందిన వ్యక్తుల్లో ఒకరైన వ్యక్తిని రక్షించే విషయంలో మీరు నిర్లక్ష్యంగా వ్యవహరించారు.’
నివేదిక కోసం 60 రోజులు వేచి చూడాలనే ఆలోచనతో ఇరు పార్టీల శాసన సభ్యులు తోసిపుచ్చారు. డెమోక్రటిక్ ప్రతినిధి అలెగ్జాండ్రియా ఒకాసియో-కోర్టెజ్ మాట్లాడుతూ.. ‘పార్టీలతో సంబంధం లేకుండా యూఎస్ లో ఇలాంటి భయానకమైన వాతావరణం ఉన్న సమయంలో 60 రోజుల్లో ఒక నివేదిక వస్తుందనే భావన ఆమోదయోగ్యం కాదు’ అని విమర్శించారు. ట్రంప్ హత్యాయత్నం సీక్రెట్ సర్వీస్ సామర్థ్యాలు, పారదర్శకత గురించి ఆందోళనను రేకెత్తించింది.
