Uttar Pradesh : సర్ మీకే ఓటేశాను నాకు పెళ్లి చేయండి.. ఎమ్మెల్యేకు షాకిచ్చిన ఓ పెళ్లికాని ప్రసాద్

Uttar Pradesh : ఉత్తరప్రదేశ్‌లోని మహోబా జిల్లాకు చెందిన ఓ ఎమ్మెల్యేకు ఊహించని సంఘటన ఎదురైంది. చరఖారీ స్థానానికి చెందిన బీజేపీ ఎమ్మెల్యే బ్రజ్ భూషణ్ రాజ్‌పుత్ తన కారులో పెట్రోల్ నింపుకోవడానికి స్థానికంగా ఉన్నప్పుడు ఓ వ్యక్తి తన వింత కోరికను ఎమ్మెల్యే ముందు ఉంచాడు. తన కోరిక విన్న ఎమ్మెల్యే కంగుతిన్నాడు. ఎమ్మెల్యేను చూడగానే ఓ ఉద్యోగి వెంటనే ఆయన వైపు పరుగులు తీశారు. తను ఎమ్మెల్యే నియోజకవర్గానికి చెందిన ఓటరునని పరిచయం చేసుకున్నాడు. ఈ పెట్రోల్ పంపులో పనిచేస్తున్నానంటూ చెప్పుకొచ్చాడు. ఎమ్మెల్యేతో మాట్లాడుతూ.. సర్, నేను నీకు ఓటేశాను అన్నాడు. ఇప్పుడు మీరు నాకు పెళ్లి చేయాలని కోరాడు. దీంతో ఎమ్మెల్యే నవ్వుతూ ఉద్యోగికి త్వరలో వివాహం జరిపిస్తానని హామీ ఇచ్చారు. ఎమ్మెల్యే తనకు అమ్మాయిని కనిపెట్టి పెళ్లి చేసేందుకు శాయశక్తులా ప్రయత్నిస్తానని హామీ ఇచ్చారు. ఎమ్మెల్యే, పెట్రోల్ పంప్ ఉద్యోగి మధ్య జరిగిన సంభాషణకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది. అవుతోంది.

ఎమ్మెల్యే బ్రజ్ భూషణ్ రాజ్‌పుత్ తన కారులో పెట్రోల్ పంప్ వద్దకు చేరుకున్న వెంటనే, పంప్ ఉద్యోగి తన పనిని వదిలి అతని వద్దకు వచ్చాడు. తొలుత సదరు ఉద్యోగికి ఏదో సమస్య వస్తుందని ఎమ్మెల్యే అనుకున్నాడు. అతను ఏదో ఒక అంశంపై ఫిర్యాదు చేసే ఉందని భావించాడు. అప్పుడు సదరు ఉద్యోగి తన సమస్యను చెప్పడంతో ఎమ్మెల్యే ఆశ్చర్యపోయారు. ఎమ్మెల్యేకు తనకు ఇంకా పెళ్లి కాలేదన్న బాధను పంపు ఉద్యోగి వ్యక్తం చేస్తూ.. ఎమ్మెల్యే సాయం చేస్తాడని, అపుడుపెళ్లి చేసుకుంటానన్న ఆశతో ఓటేశానన్నారు. తాను ఓటరునని, ఓటు వేశానని చెప్పారు.

వైరల్ వీడియోలో చరఖారీ ఎమ్మెల్యే బ్రజ్‌భూషణ్ రాజ్‌పుత్ కారులో కూర్చుని, ఉద్యోగితో చాలా సేపు మాట్లాడుతున్నట్లు కనిపిస్తోంది. ఎమ్మెల్యేకు పెళ్లి చేసుకోవాలని కోరినట్లు పెట్రోల్ పంప్ ఉద్యోగి తెలిపారు. వ్యక్తిగత జీవితం గురించి ఎమ్మెల్యే అడగ్గా వివరంగా చెప్పాడు. తనకు ఆరు వేల రూపాయల జీతం ఉందని, 13 బిగాల భూమి కూడా ఉందని చెప్పాడు. దీనిపై ఎమ్మెల్యే మాట్లాడుతూ నువ్వు చాలా ధనవంతుడివి. త్వరలో నీకు పెళ్లి చేస్తానంటూ హామీ ఇచ్చాడు. ఈ సందర్భంగా ఎమ్మెల్యే బ్రజభూషణ్ రాజ్‌పుత్ ఉద్యోగిని తనకు చెందిన కులం అమ్మాయి కావాలా లేదా ఏ కులమైనా చేసుకుంటావా అని ప్రశ్నించారు.

దీనిపై సదరు ఉద్యోగి మాట్లాడుతూ మా కులానికి చెందిన అమ్మాయి అయితే బాగుంటుందని తెలిపాడు. దీనిపై ఉద్యోగిని వివక్ష చూపవద్దని ఎమ్మెల్యే కోరారు. నేను చూస్తాను అని కూడా చెప్పాడు. నీకోసం మంచి అమ్మాయిని చూసి పెడతానన్నారు. ఇప్పుడు ఈ వీడియో సోషల్ మీడియాలో వైరల్ అవుతుంది. నెటిజన్లు ఈ వీడియో కింద ఫన్నీ కామెంట్స్ చేస్తున్నారు. కొందరు మనం కూడా మన ఎమ్మెల్యేల దగ్గరకు వెళ్లి పెళ్లి చేయమని అడుగుదామంటూ పెళ్లి కాని ప్రసాదులు కామెంట్స్ చేశారు.