BRS: తెలంగాణను పదేళ్లు ఏలిన భారత రాష్ట్ర సమితి.. మొన్నటి అసెంబ్లీ ఎన్నికల్లో అధికారం కోల్పోయింది. ప్రజలు కేసీఆర్ నేతృత్వంలోని ఆ పార్టీని ప్రతిపక్షానికి పరిమితం చేశారు. అధికారంలో ఉన్నప్పుడు ఆ పార్టీలో ఉండి పదవులు అనుభవించిన నేతలు ఇప్పుడు అధికార కాంగ్రెస్వైపు చూస్తున్నారు. ఇప్పటికే ముగ్గురు సిట్టింగ్ ఎమ్మెల్యేకు కాంగ్రెస్ కండువా కప్పుకున్నారు. లోక్సభ ఎన్నికల తర్వాత బీఆర్ఎస్లో మెజారిటీ ఎమ్మెల్యేలు అధికార పార్టీలో చేరతారన్న ప్రచారం జరుగుతోంది. మరోవైపు లోక్సభ ఎన్నికలు ముంచుకొస్తున్నాయి. ఈ ఎన్నికల్లో ఉనికి కాపాడుకునేందుకు గులాబీ నేతలు తంటాలు పడుతున్నారు. అయితే ఆ పార్టీకి పెద్దగా ఆశలు మాత్రం లేవు. సున్నా కావొద్దు అన్న లక్ష్యంతోనే పనిచేస్తోంది.
‘స్థానిక’ సమరమే సవాల్..
అసెంబ్లీ ఎన్నికల్లో ఓడిపోయిన బీఆర్ఎస్ లోక్సభ ఎన్నికల్లో ఖాతా తెరవకుంటే జూన్లో వచ్చే స్థానిక సంస్థల ఎన్నికలు మరింత సవాల్గా మారనున్నాయి. లోక్సభ ఎన్నికలు ముగియగానే స్థానిక సంస్థల ఎన్నికలు నిర్వహించాలని సీఎం రేవంత్రెడ్డి భావిస్తున్నారు. ఈ ఎన్నికలు సహజంగానే అధికార పార్టీకి అడ్వాంటేజ్గా ఉంటాయి. ఇక ఈ ఎన్నికల్లో ఎలా గెలవాలో కేసీఆర్ పదేళ్లలో రెండు పర్యాయాలు చూపించారు. ఇప్పుడు అంతకు రెట్టింపు ఉత్సాహంతో రేవంత్రెడ్డి కూడా స్థానిక సమరంలో బీఆర్ఎస్ను చిత్తు చేయాలని చూడడం ఖాయం. ఈ నేపథ్యంలో గ్రామస్థాయి నేతలను కాపాడుకోవడం బీఆర్ఎస్కు సవాల్గా మారనుంది.
బీజేపీ నుంచి కూడా పోటీ..
సాధారణంగా కాంగ్రెస్, బీఆర్ఎస్ మధ్య పోటీ ఉంటుందని అందరూ అనుకుంటారు. కానీ, వచ్చే ఎన్నికల్లో బీజేపీ కూడా కీలకం కానుంది. కాంగ్రెస్ నచ్చని వారు బీజేపీలో చేరడానికి సిద్ధంగా ఉన్నారు. కాంగ్రెస్లో టికెట్ రానివారు కూడా బీజేపీ నుంచి బరిలో దిగుతారు. దీంతో బీఆర్ఎస్ నుంచి పోటీ చేయడానికి నాయకులు కరువయ్యే పరిస్థితి నెలకొంటుంది. లోక్సభ ఎన్నికల్లో బీఆర్ఎస్ ఒక్క సీటు కూడా గెలవకపోతే ఆ పార్టీ పరిస్థితి మరింత దారుణంగా తయారు కావం ఖాయం. బీఆర్ఎస్ను బలహీన పర్చడమే టార్గెట్గా పెట్టుకున్న రేవంత్ ఆ విషయంలో వెనక్కి తగ్గేదే లేదు అంటున్నారు. మరి లోక్సభ ఎన్నికల తర్వాత ఏం జరుగుతుందో చూడాలి.
