India U19 vs Afghanistan U19 : అండర్-19 ఆసియా కప్ 2026లో టీమిండియా యువ ఆటగాళ్లు మరోసారి తమ సత్తా చాటారు. బ్యాటింగ్, బౌలింగ్ విభాగాల్లో సమష్టిగా రాణిస్తూ అఫ్గానిస్థాన్‌పై ఎనిమిది వికెట్ల తేడాతో ఘన విజయం సాధించారు. ఈ విజయంతో భారత్ ఫైనల్‌కు దూసుకెళ్లడమే కాకుండా.. చిరకాల ప్రత్యర్థి పాకిస్థాన్‌తో టైటిల్ పోరుకు సిద్ధమైంది. సెమీఫైనల్‌లో యువ ఆటగాళ్లు ప్రదర్శించిన ఆటతీరు చూస్తుంటే.. ఫైనల్లోనూ భారత్ గట్టి పోటీ ఇచ్చే అవకాశాలు కనిపిస్తున్నాయి.
బౌలింగ్‌తో ప్రత్యర్థికి కళ్లెం!
టాస్ గెలిచి తొలుత బ్యాటింగ్ ఎంచుకున్న అఫ్గానిస్థాన్‌కు భారత బౌలర్లు ఆరంభం నుంచే సవాళ్లు విసిరారు. ముఖ్యంగా ఇషాన్ సూద్ తన స్పిన్ మాయాజాలంతో ప్రత్యర్థి బ్యాటర్లను కట్టడి చేశాడు. 43 పరుగులు ఇచ్చి మూడు వికెట్లు పడగొట్టిన అతడు అఫ్గాన్ ఇన్నింగ్స్‌ను దెబ్బతీశాడు. ఈ ప్రదర్శనతో టోర్నీలో తన వికెట్ల సంఖ్యను 11కు చేర్చుకున్నాడు. భారత బౌలర్ల సమష్టి కృషితో అఫ్గానిస్థాన్ నిర్ణీత ఓవర్లలో 8 వికెట్ల నష్టానికి 227 పరుగులు మాత్రమే చేయగలిగింది.
ఛేజింగ్‌లో ముగ్గురు హీరోలు!
228 పరుగుల లక్ష్యంతో బరిలోకి దిగిన భారత్‌కు బ్యాటర్లు అదిరిపోయే ఆరంభాన్ని ఇచ్చారు. కెప్టెన్ లక్ష్య రాయ్‌చందాని అద్భుత ఇన్నింగ్స్‌తో జట్టు విజయంలో కీలక పాత్ర పోషించాడు. సెంచరీకి కేవలం మూడు పరుగుల దూరంలో నిలిచిపోయినప్పటికీ.. 97 పరుగులతో జట్టుకు బలమైన పునాది వేశాడు.
మరోవైపు ఆర్యవీర్ సెహ్వాగ్ 51 పరుగులతో తన వంతు సహకారం అందించాడు. అనంతరం వికె వినీత్ 57 పరుగులతో అజేయంగా నిలిచి జట్టును విజయతీరాలకు చేర్చాడు. ఈ ముగ్గురి అర్ధసెంచరీలతో భారత్ కేవలం రెండు వికెట్లు మాత్రమే కోల్పోయి లక్ష్యాన్ని అందుకుంది.
ఇప్పుడు అందరి చూపు భారత్-పాక్ ఫైనల్‌పైనే!
సెమీఫైనల్‌లో అఫ్గానిస్థాన్‌ను చిత్తు చేసిన భారత్ ఇప్పుడు ఫైనల్లో పాకిస్థాన్‌ను ఎదుర్కోనుంది. చిరకాల ప్రత్యర్థుల మధ్య జరిగే ఈ పోరుపై ఇప్పటికే క్రికెట్ అభిమానుల్లో ఆసక్తి నెలకొంది. ఒకవైపు బ్యాటింగ్‌లో టాప్ ఆర్డర్ రాణించడం.. మరోవైపు బౌలింగ్‌లో ఇషాన్ సూద్ వంటి ఆటగాళ్లు కీలకంగా మారడం భారత్‌కు సానుకూల అంశాలు.
అయితే ఫైనల్ పోరు సాధారణ మ్యాచ్‌లా ఉండబోదు. ఒత్తిడిని అధిగమించి ఎవరు మెరుగైన ప్రదర్శన చేస్తారన్నదే విజేతను నిర్ణయించనుంది. అఫ్గానిస్థాన్‌పై చూపించిన ఆధిపత్యాన్ని ఫైనల్లోనూ కొనసాగిస్తే అండర్-19 ఆసియా కప్ ట్రోఫీని భారత్ సొంతం చేసుకునే అవకాశాలు మెరుగవుతాయి. యువ భారత్ ఇప్పుడు టైటిల్ వేటకు సిద్ధమైంది!
